Yel 16
16
Ngai Aitavya Yelemia ũndũ Waĩlĩte Kwĩkala
1Mwĩai Ngai nĩwaneenie nakwa ambĩa atĩĩ, 2“Ndũkatwae kĩveti na ndũkasyaĩe syana nthĩ ĩno. 3Nũndũ ũũ nĩ w'o nyie Mwĩai Ngai ngwasya ĩũlũ wa syana ila isyaĩwe vaa, na ĩũlũ wa asyai masyo: 4Makooawa nĩ mowau mathũku mũno. Vaikethĩwa mũndũ wa kũmaĩĩa kana kũmathika, makeethĩwa ta vũũ ĩũlũ wa nthĩ. Makooaĩwa kaũnĩ kana moawe nĩ yũa, na simba syoo ikaĩwa nĩ nyũnyi na nyamũ sya kĩthekanĩ.
5“Nyie Mwĩai Ngai nĩkwĩa: We Yelemia, ndũkalike nyũmbanĩ yĩna kĩĩo; ndũkamaĩĩe kana kwĩthĩwa na kyeva nũndũ woo, nũndũ nĩnĩvetete mũuo, wendo wakwa ũtaolekaa na tei kuma vala maĩ. 6Andũ ala anene vamwe na ala anini me nthĩ ĩno makakw'a. Maikathikwa na vai mũndũ ũkamaĩĩa, kana etemange kana kwenza mũtwe wake onany'e kana e na kyeva. 7Vai mũndũ ũkatwaĩa ũla ũkũĩa mũkate kana kĩndũ kya kũnyw'a, amũkiakisye nũndũ wa kũkw'ĩĩwa. Ndakakiakiw'a o na akw'ĩĩwa nĩ ĩthe kana nyinyia.
8“O na ndũkalike nyũmba vala andũ mekũtana wĩkale nthĩ ũĩsanĩe na kũnyusanĩa namo. 9#Yel 7.34; 25.10; Ũvu 18.23 Nũndũ nyie Mwĩai Ngai Mwene Ũtonyi W'onthe, Ngai wa Ĩsilaeli nĩasya: Ngamina kũtheka na ũtanu, na ngĩmina mboka sya mũtwaano kuma nthĩ ĩno. Ngeeka maũndũ asu ĩvindanĩ ya thayũ wenyu mũsyaĩĩsye.
10“Watavya andũ aa ndeto ii syonthe na mo maĩkũkũlya atĩĩ, ‘Nĩkĩ Mwĩai Ngai ũtũtw'ĩĩe ũthũku ũũ mũnene? Twĩkĩte ĩvĩtyo yĩva? Nĩ naĩ yĩva tũmũvĩtĩsye Mwĩai Ngai, Ngai waitũ?’ 11Nĩvo ĩndĩ wĩmasũngĩa ũmee nyie Mwĩai Ngai nĩasya: Nĩkwĩthĩwa aaũmae menyu nĩmandiie na maatĩĩa ngai ingĩ, maithũkũma na maithaitha na mayaakwata mĩao yakwa. 12Inyw'ĩ nenyu nĩmwĩkĩte ũthũku mũnene kũvĩtũka wa aaũmae menyu, nũndũ kĩla ũmwe wenyu aatĩĩaa ũng'endu na kwenda kwake kũthũku, na mũimbĩw'aa. 13Kwoou nakwa ngamwĩkya mume nthĩ ĩno mũkekale nthĩ mũtamĩsĩ, na o na aaũmae menyu mataamĩmanya. Mwĩ kũu mũkathũkũma ngai ingĩ ũtukũ na mũthenya, na ndikamwĩw'ĩa tei.”
Kũtũngwa kwa Andũ ma Yuta kuma Nthĩ ya Ũeninĩ
14Mwĩai Ngai easya atĩĩ, “Ĩvinda nĩyũkĩte yĩla andũ matakaendeea kwĩvĩta mayasya, ‘O tondũ Mwĩai Ngai wĩ thayũ, ũla waumisye andũ ma Ĩsilaeli nthĩ ya Misili.’ 15Ĩndĩ makeevĩtaa mayasya, ‘O tondũ Mwĩai Ngai wĩ thayũ, ũla waumisye andũ ma Ĩsilaeli nthĩ ya ngalĩko ya ĩũlũ, na kuma nthĩ syonthe kũla wamanyaĩĩkĩsye.’ Makeevĩtaa ũu nũndũ ngamatũnga nthĩ yoo ĩla nanengie aaũmae moo.”
Ũkany'o ũla Wũkĩte
16Mwĩai Ngai easya atĩĩ, “Nĩngwĩta atei aingĩ ma makũyũ, na mo makamakwatya. Ĩtina wa ũu, ngeeta asyĩmi aingĩ, na mo makamasyĩma iĩmanĩ syonthe na tũlĩmanĩ tw'onthe, na kuma mĩvatĩnĩ ya mavia. 17Nũndũ nĩnĩsyaĩĩsye mĩendele yoo yonthe, vai ũmwe mũvithe mbee wakwa, o na nĩnene ũthũku woo w'onthe. 18Kwoou mbee makaĩvĩa kũndũ kwĩlĩ nũndũ wa ũthũku woo na naĩ yoo, nĩkwĩthĩwa nĩmavukĩtye nthĩ yakwa na mĩvw'anano yoo ĩte thayũ ĩla nĩmenete, na makausũsya nthĩ yakwa na maũndũ ala mekaa ma kũthatya.”
Mwĩai Ngai nĩ we Wĩkwatyo wa Yelemia
19Ame Mwĩai Ngai, we vinya wakwa na ũsũvĩo wakwa,
wĩvitho wakwa ĩvinda yĩla nĩ na thĩna,
andũ ma mbaĩ mbingĩ makooka kũla ũĩ,
kuma kĩla vandũ ĩũlũ wa nthĩ mayasya,
“Aaũmae maitũ mayaĩ na kĩndũ ate o ngai sya ũvũngũ,
mĩvw'anano ya mana ĩla ĩtaamatethya.
20Mũndũ nũtonya kwĩseũvĩsya ngai?
Isu ti Ngai o na vanini!”
21“Kwoou nyie Mwĩai Ngai ngatuma mamanya vinya wakwa na ũtonyi wakwa ĩngĩ, na makamanya kana ĩsyĩtwa yakwa nĩ Mwĩai Ngai.”
Currently Selected:
Yel 16: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
