Yel 14
14
Mũnyao Mũnene Ũikwata Nthĩ ya Yuta
1Ii nĩsyo ndeto ila Mwĩai Ngai watavisye Yelemia ĩũlũ wa mũnyao:
2“Andũ ma Yuta me na kyeva,
na ndũa syoo iina vinya.
Meĩa mailyĩ nthĩ mũthanganĩ,
kĩĩo kya andũ ma Yelũsalemu nĩkĩkwĩw'ĩka.
3Andũ me ndaĩa mematũma athũkũmi moo makatave kĩw'ũ,
ĩndĩ athũkũmi asu mathi ithimanĩ,
mayĩthĩa ite kĩw'ũ,
na maisyoka na ikuu nthei,
mavw'ĩkĩte mĩtwe yoo nĩ nthoni na kũsaanĩw'a.
4Nĩkwĩthĩwa nthĩ nĩ nyũmũ nũndũ wa kwaa mbua,
aĩmi nĩmavw'ĩkĩte mĩtwe yoo nĩ nthoni.
5O na ndaatai yasyaĩa katena kĩthekanĩ,
nĩkatiaa nũndũ ndĩ na nyeki ya kũya.
6Namo mang'oi ma kĩthekanĩ nĩmaũngamaa iĩmanĩ ĩũlũ kũla kũte kĩndũ,
na kũvevaveva ta mbĩwa makwate nzeve.
Metho mamo matikwona nthĩ nesa,
nũndũ wa kwaĩwa nĩ kya kũya.”
Andũ ma Yuta Maimwĩkaĩla Ngai Amatethye
7“O na kau mothũku maitũ nĩmeũkũsĩĩa ũndũ tũthũkĩte,
tũtethye ame Mwĩai Ngai kwondũ wa ndaĩa ya ĩsyĩtwa yaku;
nũndũ nĩtũsyokete ĩtina mavinda maingĩ na nĩtũkũvĩtĩsye.
8We wĩkwatyo wa andũ ma Ĩsilaeli,
we Mũtangĩĩi woo yĩla me thĩnanĩ,
nĩkĩ wĩkalĩte ta mũndũ mũeni kũũ Yuta?
Nĩkĩ ũilyĩ ta mũndũ ũvĩtĩte na nzĩa,
ũla wathũkaa vandũ akome ũtukũ o ũmwe?
9Nĩkĩ ũilyĩ ta mũndũ mũvũavũanu,
ta ngũmbaũ ĩtatonya kũtangĩĩa?
Ĩndĩ we Mwĩai Ngai wĩ katĩ waitũ,
naitũ twĩ andũ maku.
Ndũkatũtie.”
Ngai Aisũngĩa Kĩĩo kya Andũ ma Yuta
10Mwĩai Ngai easya ũũ ĩũlũ wa andũ ma Yuta:
“Nĩmendete mũno kwanganga,
mailũmawa nĩ nthĩ.
Kwoou nyie Mwĩai Ngai ndimetĩkĩla,
ĩndĩ yu nĩngũlilikana mavĩtyo moo,
na ngĩmakany'a nũndũ wa naĩ syoo.”
11Nĩvo ĩndĩ Mwĩai Ngai waneenie nakwa ambĩa atĩĩ, “We Yelemia ndũkavoyee andũ aa mone ũseo. 12O na matĩĩa kũya ndiĩthukĩĩsya kĩĩo kyoo, na o na maumya nthembo sya kũvĩvw'a na sya lĩu wa mbaa mbeke, ndisyĩtĩkĩla. Vandũ va ũu, ngamamina na kaũ, yũa na ũwau mũthũku.”
13Nĩvo ĩndĩ naisye, “Ai, Mwĩai Ngai Mũsumbĩ, athani meĩa andũ atĩĩ, ‘Mũyĩĩthĩwa na kaũ, o na mũyĩĩthĩwa na yũa, nũndũ Mwĩai Ngai akamũnenga mũuo wa w'o nthĩ ĩno.’ ”
14Nake Mwĩai Ngai nĩwanzũngĩie ambĩa atĩĩ, “Athani aa meathana ũvũngũ ĩsyĩtwanĩ yakwa. Ndyaamatũma, o na ndyaameaĩa kana nganeena na mo. Memwathanĩa woni wa ũvũngũ, maaũasya mana na memũtavya ũkengani wa ilĩko syoo ene. 15Kwoou ũũ nĩ w'o nyie Mwĩai Ngai ngwĩa athani ala mathanaa ĩsyĩtwanĩ yakwa o na kau ndyaamatũma, ala meaa andũ, ‘Kũyĩĩthĩwa kaũ kana yũa nthĩ ĩno:’ Athani asu makaminwa nĩ kaũ na yũa. 16Namo andũ ala athani asu mekwathanĩa makekangw'a nzĩanĩ sya Yelũsalemu, moaĩtwe nĩ yũa na kaũ, na vaikethĩwa mũndũ wa kũmathika: Mo ene, iveti syoo, ana moo na eĩtu moo! Nũndũ ngatuma maĩvĩa ũthũku woo.”
Yelemia Akĩmaĩĩa Andũ ma Yuta
17Mwĩai Ngai nĩwambĩaĩie nĩmatavye ndeto ii:
“Eka metho makwa metĩkye methoi ũtukũ na mũthenya,
nĩmetĩkye matekũeka,
nũndũ andũ makwa nĩ akũne makaũmĩw'a mũno,
nĩ akũne mũno.
18Naumaala na kũthi isesinĩ,
nĩĩthĩa ala moaĩwe kaũnĩ!
Na nalika ndũanĩ,
nĩĩthĩa andũ mayũawa nĩ yũa!
Nũndũ athani na athembi maendee kwanganga nthĩ ĩno maitandĩthya,
na mo mai na ũmanyi.”
Andũ ma Yuta Maimwĩkaĩla Ngai ĩngĩ
19We Mwĩai Ngai nũndũ ũleete andũ ma Yuta vyũ?
Nũndũ ũmenete andũ ma Saioni?
Nĩkĩ ũtũkũnĩte mũno ũkethĩa tũivoa?
Tweekwatasya kwĩthĩwa na mũuo,
ĩndĩ tũyaaona ũseo;
tweekwatasya tũkavow'a,
ĩndĩ twatelemw'a.
20Ame Mwĩai Ngai nĩtũkwĩtĩkĩla mothũku maitũ,
o na nĩtũkwĩtĩkĩla mavĩtyo ma aaũmae maitũ,
nũndũ nĩtũkũvĩtĩsye.
21Kwondũ wa ndaĩa ya ĩsyĩtwa yaku ndũkatũvũthye;
ndũkasonokye kĩvĩla kyaku kya kĩ-ũsumbĩ kya ndaĩa,
lilikana ũtianĩo waku naitũ na ndũkawanange.
22Nĩkũlya, ve imwe katĩ wa ngai sya ũvũngũ sya mbaĩ ingĩ itonya kusya mbua?
Namo matu me na ũtonyi wa kusya mbua?
We Mwĩai Ngai nue Ngai waitũ,
nue twĩkwatĩtye,
nũndũ nue wĩkaa maũndũ aa onthe.
Currently Selected:
Yel 14: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
