Yel 13
13
Yelemia Ayĩaĩwa nĩ Ngai Athooe Ngũa
1Mwĩai Ngai nĩwaneenie nakwa ambĩa atĩĩ, “Enda ũkathooe ngũa nzeo ndũmu ya kwĩyova kĩnyunyunĩ na ũyĩyova, na ndũkamĩinde kĩw'ũnĩ.” 2Kwoou nĩnathooie ngũa ya kwĩyova kĩnyunyu kwĩanana na ũndũ Mwĩai Ngai wandavĩtye, na namĩyova kĩnyunyunĩ kyakwa. 3Nĩvo ĩndĩ Mwĩai Ngai waneenie nakwa ĩvinda ya kelĩ ambĩa atĩĩ, 4“Osa ngũa ĩla wathooie na wĩyovete kĩnyunyunĩ kyaku, ũthi kalũsĩnĩ ka Velathi,#13.4 kalũsĩnĩ ka Velathi: Kĩthyomonĩ kya Kĩevelania, ndeto ĩno Velathi ĩtamũkĩkaa ta Euvalati na ũimĩvitha mũvatĩnĩ wa ĩvia.” 5Kwoou nĩnaendie navitha ngũa ĩsu kalũsĩnĩ ka Velathi, o tondũ Mwĩai Ngai wambĩaĩĩte.
6Ĩtina wa matukũ maingĩ, Mwĩai Ngai nĩwaneenie nakwa ambĩa atĩĩ, “Enda kalũsĩnĩ ka Velathi ũkose ĩla ngũa ya kwĩyova kĩnyunyunĩ nakwĩaĩe ũkamĩvithe vo.” 7Kwoou nĩnaendie kalũsĩnĩ ka Velathi na nenza naumya ngũa ĩsu vala namĩvithĩte. Ĩndĩ neethĩie yĩ mbunyũkangu ĩkatw'ĩka ya mana.
8Nĩvo ĩndĩ Mwĩai Ngai waneenie nakwa ambĩa atĩĩ, 9“Nyie Mwĩai Ngai nĩasya kana ũu nĩw'o nĩananga ngathĩĩo sya Yuta, na ngathĩĩo mbingĩ sya Yelũsalemu. 10Andũ aa athũku, ala maleaa kũmbĩthukĩĩsya, ala maatĩĩaa kwenda kwa ngoo syoo mbũmũ, na menenganĩte kũthaitha na kũthũkũma ngai ingĩ, makatw'ĩka ta ngũa ĩno ya kwĩyova kĩnyunyunĩ, ĩla ĩtw'ĩkĩte ya mana. 11O tondũ ngũa ĩsu yoovwa ĩlũmanasya na kĩnyunyu kya mũndũ, no w'o nendaa andũ onthe ma Ĩsilaeli na andũ onthe ma Yuta malũmany'e nakwa, matw'ĩke andũ makwa na maituma ĩsyĩtwa yakwa yĩtaĩwa na kũkumw'a, ĩndĩ nĩmaleile kũmbĩw'a.”
Ũmanyĩsyo wa Sũva Syusũĩte Ndivai
12Mwĩai Ngai, Ngai wa Ĩsilaeli ambĩie nĩtavye andũ ma Ĩsilaeli nĩmee easya atĩĩ, “Kĩla sũva ũkausũaw'a na ndivai.” Nĩwambĩie ethĩwa makanzũngĩa mambĩe, “Wĩtũtavya ũu nũndũ tũtesĩ kana kĩla sũva nĩwaĩlĩte kusũw'a ndivai?” 13Nakwa naĩlĩte kũmasũngĩa ngamea atĩĩ, “Ũũ nĩw'o Mwĩai Ngai ũkwasya, ‘Ngamausũsya na ũthengi onthe ala matwĩe nthĩ ĩno: Asumbĩ ala mekalĩlaa kĩvĩla kya kĩ-ũsumbĩ kya Ndeviti, athembi, athani, na andũ onthe ala matwĩe Yelũsalemu. 14Ngasyoka nĩmakũnangany'e ũmwe na ũla ũngĩ, aaĩthe vamwe na ana moo. Nyie Mwĩai Ngai nĩmatavya kana ndikamew'ĩa tei, ndikamaeka, kana kũmew'ĩa ĩnee nĩlee kũmamina.’ ”
Yelemia Aitavya Andũ Maeke Kwĩkathĩĩa
15Teai matũ na mũyĩthukĩĩsya;
mũikethĩwe na ngathĩĩo,
nũndũ Mwĩai Ngai nũkũneena nenyu.
16Mũkumyei Mwĩai Ngai, Ngai wenyu,
atanamba kũmũetee kĩvindu,
na mũtanamba kũtulw'a maũũ menyu,
mwĩsĩlĩte iĩmanĩ syĩ kĩvindu.
Yĩla mũkwĩkwatya kwĩthĩwe na kyeni,
akĩalyũlaa kĩkatw'ĩka kĩvindu,
akĩtw'ĩkĩthasya kĩvindu kingĩ.
17Ĩndĩ mwalea kwĩthukĩĩsya,
ngaĩa nĩvithĩte nũndũ wa ngathĩĩo syenyu;
ngaĩa mũno methoi manyũlũlũke kuma methonĩ makwa,
nĩkwĩthĩwa andũ ma Mwĩai Ngai nĩmakwatĩtwe makatwawa me atave.
18Tavya mũsumbĩ na inyia wake ũmee atĩĩ,
“Ũkĩlai mume ivĩlanĩ syenyu sya kĩ-ũsumbĩ,
nũndũ ngovia syenyu mbanake sya kĩ-ũsumbĩ,
nivalũkĩte kuma mĩtwenĩ yenyu.”
19Ndũa ila syĩ kĩsionĩ kya Nengevu nĩ mbinge,
vai mũndũ wa kwivingũa.
Andũ onthe ma Yuta nĩmatavĩtwe makatwawa nthĩ ya ũeninĩ,
nĩmatwaĩtwe vyũ me atave.
20Sisya wone ala mokĩte kuma ngalĩko ya ĩũlũ.
Ĩĩva ndĩthya ĩla wanengiwe,
ndĩthya yaku mbanake?
21Ũkasya ata yĩla Mwĩai Ngai wĩia amaitha maku ĩũlũ waku,
andũ asu wĩthĩĩtwe ũisũanĩa kana nĩ anyanyau?
Ndwĩkwatwa nĩ woo,
ta wa mũndũ mũka ũkwaũnya?
22Na ethĩwa ũkeekũlya ngoonĩ yaku,
“Maũndũ aa mambũkĩe nĩkĩ?
Manya kana makũkĩe nũndũ wa ũthũku waku mwingĩ;
ũvuĩtwe ngũa na ũkakwatwa na vinya.
23Nĩkũlya, mũndũ nũtonya kũalyũla langi wa kĩkonde kyake,
kana ngo ĩkaalyũla malangi ma kĩkonde kyayo?
O tondũ ũu ũtatonyeka, no w'o o nenyu mũtatonya kwĩka ũseo,
inyw'ĩ ala mwamanyĩie kwĩka ũthũku.
24Nyie Mwĩai Ngai ngamũnyaĩĩkya ta mavuti,
maũlũkĩtw'e nĩ kĩseve kyumĩte weũnĩ.
25Nyie Mwĩai Ngai nĩasya kana kĩu nĩkyo kĩanda kĩla nĩmũtw'ĩĩe,
nĩkwĩthĩwa nĩmũlĩtwe ninyie,
na mũkaĩkĩĩa ũvũngũ.
26Nyie mwene ngamũvua ngũa mũtiwe mwĩ athei,
na andũ makoona nthoni syenyu.
27Nĩnonete maũndũ ala mwĩkĩte ma kũnthatya,
nĩnonete mũithaithĩa ngai ingĩ iĩmanĩ na isesinĩ,
mwĩ na wendi wasyo ta wa mũndũ ũkwenda kĩveti kya mũtũi wake,
kana ta wa mbalasi nũme ĩkwanĩsya ĩla nga.
Kyeva nĩ kwenyu andũ ma Yelũsalemu!
Mwĩĩkala mũte athesye kũvika ĩndĩĩ?”
Currently Selected:
Yel 13: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
