Yund 9
9
Mboya ya Yundithi
1Nĩvo ĩndĩ Yundithi weeyũmbie mũu mũtwe na eevua ngũa ya ĩũlũ nĩ kana ngũa ngaamu ya ĩkunia ĩla weekĩĩle nthĩnĩ yoneke. Nĩwakumanie atina nthĩ na ũthyũ. Kwaĩ ĩa mawĩoo yĩla nthembo ya wĩoo ya ũvani yaendee kũthembewa Ĩkalũnĩ ya Yelũsalemu. Yundithi nĩwavoyie Mwĩai na wasya mũnene ayasya atĩĩ: 2#Mwa 34.1-31 “Ame Mwĩai, Ngai wa ũmae wakwa Simioni, kwa lilikana ũndũ wanengie Simioni ũvyũ akeyĩĩvanĩsye kwa andũ ma nthĩ ĩngĩ ala makwatie Ndina, ũla ũtaĩ aamanyana kĩ-mwĩĩ na mũndũ-ũme. Andũ asu nĩmatembũangĩie Ndina ngũa na mamũvukya. Nĩmamumisye ngũa syonthe mamwĩkĩĩthye nthoni, nĩmamanyanie kĩ-mwĩĩ nake na vinya, na matuma avũthw'a; meekie ũu o na vala we Mwĩai nĩwavatanĩte ũu. 3Kĩu nĩkyo kyatumie ũeka atongoi moo moawe na ũkomo woo ũla wavukiw'e nĩ ũthũku ũsu meekie nĩwakwatiwe nĩ nthakame. Nĩwamaminie onthe: Ngombo, ana ma asumbĩ na atongoi ala maendee kũsumbĩka. 4Nĩwatumie iveti syoo syoswa, eĩtu moo matavwa na ũthwii woo watavwa nĩ andũ maku anyuve Ĩsilaeli, ala mendaa mũno kwĩka kwenda kwaku. Ana-a-inyia ma Ndina nĩmathatie mũno nũndũ wa mwĩĩtu-a-inyia woo kwĩkĩĩthw'a nthoni. Kwoou yĩla makũvoyie ũmatetheesye, nĩwamatetheeisye.
“Ame Ngai, Ngai wakwa ĩthukĩĩsye mboya yakwa, nyie mũndũ mũka ndiwa. 5Nue weekie maũndũ onthe ala meekĩkie ĩvindanĩ yĩu; ala meekĩkie mbeenĩ na ĩtina wa ũu. Nĩwavangie maũndũ onthe, ala mekwĩkĩka yu, na ala makekĩka. Ĩĩ, mĩvango yaku yonthe nĩyĩanĩaa. 6Maũndũ ala ũkwenda mekĩke meanene na ala maminĩte kwĩkĩka. Nĩwĩthĩawa wĩsĩ mĩvango yaku na motw'ĩo ala ũkumya. 7Yu vinya wa Asuli nĩwongelekete. Nĩmekwĩkathĩĩa na mbalasi syoo sya kaũ na asikalĩ masyo. Nĩmekwĩkumya nũndũ wa ũtonyi wa asikalĩ moo ala maendaa na maũũ. Nĩmekwatĩtye ngao na ĩtumo, ũta na kĩkũtha ĩndĩ mayĩsĩ kana we nue Mwĩai ũla ũminaa kaũ. Mwĩai nĩyo ĩsyĩtwa yaku. 8Nũndũ wa ũthatu waku, tũmĩa ũtonyi waku kũnyaĩĩkya asikalĩ moo ma kaũ me vinya. Nũndũ mevanga kũvukya Ĩkalũ yaku vala ũthaithĩawa, na maitemanga mĩthya ya kĩthembeo kyaku na mbyũ syoo. 9Kwa sisya ũndũ mang'endete. Nũndũ wĩ mũthatu mamine! Nenga nyie, mũndũ mũka ndiwa ũtonyi wa kwĩka ũndũ ngũvanga. 10Nĩũkũlya ũtũmĩe ndeto syakwa sya ũvũngũ kũmamina onthe; anene na ngombo syoo o ũndũ ũmwe. Eka mĩkathĩĩo yoo ĩminwe nĩ ũtonyi wa mũndũ mũka. 11Ũtonyi waku ndumanaa na ũtalo wa andũ kana vinya wa asikalĩ ma kaũ. We nue Ngai, mũsũvĩi wa ala menyivasya, mũtethya wa ala mathĩnaw'a, mũkwatĩĩi wa ala mate na vinya, mũsũvĩi wa ala matetonya, na mwovosya wa ala mate na wĩkwatyo. 12Yu ĩw'a mboya yakwa, Ame Ngai, Ngai wa ĩthe wakwa, Ngai ũla andũ ma Ĩsilaeli mekwatasya, Mwĩai wa ĩtu na nthĩ, Mũmbi wa mbũsĩ na mokanga, Mũsumbĩ wa syũmbe syonthe, ĩw'a mboya yakwa. 13#Est-Kĩk C.24-25 Eka ndeto syakwa sya ũvũngũ iũmĩsye na kũaa andũ ala mavangĩte ũndũ ũthũkĩte ũu ĩũlũ wa ũtianĩo waku na Ĩkalũ yaku ĩtheu, ĩũlũ wa Kĩĩma kyaku kya Saioni na nthĩ yonthe ĩla wanengie andũ maku. 14Tuma nthĩ yaku yonthe na mbaĩ syonthe imanya kana nue Ngai ũla wĩ vinya na wĩ ũtonyi mwingĩ, na kana nue wĩ weka ũsũvĩaa andũ ma Ĩsilaeli!”
Currently Selected:
Yund 9: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011