Yund 8
8
Yundithi Mũndũ Mũka Ndiwa wa Ĩsilaeli
1Ĩvindanĩ yĩu Yundithi nĩweewie maũndũ ala maendee. Yundithi aĩ mwĩĩtu wa Melali mwana wa Osi. Osi aĩ mwana wa Yosevu, nake Yosevu mwana wa Osieli. Osieli aĩ mwana wa Elekia mwana wa Anania. Anania aĩ mwana wa Ngitioni mwana wa Lavaimu. Nake Lavaimu aĩ mwana wa Aitovu mwana wa Eliya. Eliya aĩ mwana wa Kyelikiasi ũla waĩ mwana wa Eliavu. Eliavu nake aĩ mwana wa Nathanieli mwana wa Salamieli, ũla waĩ mwana wa Salasandae mwana wa Ĩsilaeli. 2Mũũme wa Yundithi ũla weetawa Manase, na waĩ wa mbaĩ ĩmwe na mũsyĩ ũmwe nake, aĩ anakwie ĩvindanĩ ya ngetha ya nganũ ĩla yĩtawa mbaale. 3Manase avĩviw'e nĩ syũa mũno e mũũndanĩ aũngamĩe athũkũmi ala moovaa iia sya mbaale. Auma vau aendie kũkoma ũkomonĩ wake. Akw'ĩĩie Mbethulia ndũanĩ yake, na athikwa vala aaũmae make mathikĩtwe, katĩ wa ndũa ya Ndothani na ya Mbalamoni.
4Yundithi ekalile mũsyĩ e ndiwa vandũ va myaka ĩtatũ na myei ĩna. 5#Asi 3.20; 2Asu 4.10 Ĩvindanĩ yĩu ya kyeva, nĩwambie ĩeema kĩalanĩ kya nyũmba yake na ekala vo. Eeyovete ngũa ngaamu sya makunia kĩnyunyunĩ, na akekĩa ngũa sya ndiwa. 6Kuma Yundithi atw'ĩka ndiwa, nĩwatĩĩaa kũya kĩla ĩvinda, ate o mĩthenya ĩla andũ mataaĩlĩte kũtĩĩa kũya: Mũthenya ũla waĩ mbee wa Savato, mũthenya wa Savato, mũthenya ũla wĩ mbee wa Mboka ya Kũtisa kwa Mwei, na Mũthenyanĩ wa Mboka ya Kũtisa kwa Mwei. O ta ũu ndatĩĩaa kũya ĩvindanĩ ya mboka ila ingĩ na mĩthenyanĩ ĩla andũ ma Ĩsilaeli meethĩawa maitana. 7Yundithi aĩ mũndũ mũka mũmbe nesa mũno na wa kwendeesya. Mũũme wake Manase amũtiĩe thaavu na silĩva, athũkũmi ma aũme na ma aka, indo na itheka, na Yundithi nĩwasũvĩaa syĩndũ isu. 8Vai mũndũ waneeneaa Yundithi naĩ, nũndũ aĩ na kĩkĩo kya Ngai mũno.
Yundithi Aikomana na Atongoi ma Ndũa
9Yundithi nĩweewie ndeto nthũku ila andũ maneeneaa Usia, nũndũ wa kwĩthĩwa me na waũni mwingĩ nũndũ wa kwaĩwa nĩ kĩw'ũ. O ta ũu nĩweewie ũndũ Usia wamatavisye, na ũndũ weevĩtie kana akanengane ndũa ya Mbethulia kũla kwĩ Asuli ĩtina wa mĩthenya ĩtano. 10Yundithi nĩwatũmie mũthũkũmi wake mwĩĩtu ũla waũngamĩe syĩndũ syake syonthe, athi akete Usia#8.10 Usia: Maandĩko amwe ma tene mai na ĩsyĩtwa yĩĩ., Kyavilisi na Kyalimisi, ala maĩ atumĩa ma ndũa.
11Yĩla mavikie, Yundithi nĩwameie atĩĩ, “Mbĩthukĩĩsyei inyw'ĩ atongoi ma andũ ma Mbethulia, nĩmwĩkie mavĩtyo kũtavya andũ ũndũ mũmeie ũmũnthĩ. Nĩmwĩvĩtie, na mwasya kana wĩvĩto ũsu wĩĩthĩwa katĩ wenyu na Ngai. Nĩmwathanie kana nĩmũũnengane ndũa kũla kwĩ amaitha, ethĩwa Mwĩai ndetũtetheesya ĩvindanĩ yĩana ũndũ mũna. 12#Kũt 6.16; Yovu 38.2 Ninyw'ĩ aaũ nĩ kana mũtate Ngai ũndũ mwĩkie ũmũnthĩ, na kwosa mwanya wake, kwĩanĩsya mavata ma andũ? 13Mwĩtata Mwĩai Mwene Ũtonyi W'onthe, ĩndĩ vai ũndũ o na ũmwe mwĩmanya. 14#Alo 11.33-34; 1Ako 2.11 Mũitonya kũmanya maũndũ ala me ngoonĩ ya mũndũ, kana kũmanya ũndũ mũndũ ũkũsũanĩa. Mũtonya ata ĩndĩ kũmanya mosũanĩo ma Ngai ũla woombie syĩndũ syonthe, kana kũmanya kĩlĩko na mũvango wake? Ana-a-ia, mũikamũthatye Mwĩai, Ngai waitũ. 15O na akalea kũtũtethya mĩthenyanĩ ĩsu ĩtano, e na ũtonyi wa kũtũsũvĩa ĩvinda o na yĩva yĩla ũkwenda. O ta ũu nũtonya kũtũeka tũminwe nĩ amaitha maitũ. 16Mũyaĩlĩte kũvangĩa Mwĩai, Ngai waitũ maũndũ ala waĩlĩte kwĩka, nũndũ Ngai ti mũndũ; ndatethasya kwa kũtelemw'a, na ndatonya kũingĩĩw'a anengane ũtw'ĩo. 17Kwoou tũendee kweteela atũtangĩĩe; tũmwĩkaĩle atũtetheesye na nũkũtwĩw'a, ethĩwa ũu nũũmwendeesya.
18“Tũithaithaa ngai iseũvĩtw'e nĩ andũ. Vai mũsyĩ, mbaĩ, andũ kana ndũa yaitũ yaathaitha ngai isu, ate o aaũmae maitũ. 19Kĩu nĩkyo kyatumie Ngai aekana namo moawe nĩ amaitha, na syĩndũ syoo syatavwa. Nĩvo ĩndĩ mathĩnie mũno nũndũ wa kũvithũkĩwa nĩ amaitha. 20Ĩndĩ ithyĩ tũithaithaa ngai ĩngĩ ate o Mwĩai, na kwoou twĩthĩwe na mũĩkĩĩo wa kana ndetũtia, kana atie nthĩ yaitũ.
21“Ethĩwa nĩtũũkwatwa, kwa w'o kĩsio kyonthe kya Yutia kĩĩthĩwa kyakwatwa. O ta ũu syĩndũ sya Ĩkalũ yitũ yĩla yĩ Yelũsalemu nikũtavwa, na Ngai nũkũtuma tũĩvĩa ũndũ ũsu na mathayũ maitũ twaeka Ĩkalũ yĩvukw'e. 22Ana-a-ĩthe maitũ mooawa, nthĩ yaitũ yakwatwa, na ũtiĩwa witũ waanangwa, maũndũ asu makatuma tũtalĩlwa mavĩtyo nĩ andũ ma nthĩ ingĩ ila twĩthi kwĩthĩwa twĩ ngombo, na anene maitũ kũu makatũvũthasya na kũtwona twĩ andũ ma mana. 23Vai ũndũ mũseo tũkakwata ĩtina wa ũkombo witũ. Mwĩai, Ngai waitũ akatw'ĩkĩthya ũkombo ũsu kĩvũthya kwitũ.
24“Kwoou mbaitũ, twĩthĩwei twĩ ngelekany'o nzeo kũla kwĩ andũ maitũ, nĩkwĩthĩwa nithyĩ masyaĩĩsye. O ta ũu Ĩkalũ na kĩthembeo syĩ ũsũvĩonĩ witũ. 25Maũndũnĩ asu onthe, nĩtũtũngĩei Mwĩai, Ngai waitũ mũvea, ũla ũkũtũtata o ũndũ watatie aaũmae maitũ. 26#Mwa 22.1-18; 29.1—31.55 Lilikanai ũndũ watatie Avalaamu na Isaka na ũndũ weekie Yakovo e Mesovotamia nthĩ ya Silia, yĩla waĩthasya malondu ma Lavani ĩnaũme wake. 27Ngai ndatũtatĩte na matatwa momũ ũndũ watatie aaũmae maitũ, nĩ kana amanye nesa mũĩkĩĩo woo. Ndekwĩyĩĩvanĩsya kũla tũĩ, ĩndĩ ekany'a ala mamwĩkwatasya, nĩ kana amekĩe vinya.”
28Nĩvo ĩndĩ Usia wasũngĩie Yundithi amwĩa atĩĩ, “Ndeto isu syonthe waneena na ngoo ntheu, na vai mũndũ ũtonya kũleana nasyo. 29Ũmũnthĩ ti yo yambee kwaku kwonany'a ũĩ waku. Kuma wĩ mũnini, andũ onthe nĩmamanyie kana wĩ mũĩ, nĩkwĩthĩwa motw'ĩo ma thayũ waku nĩ maw'o. 30Ĩndĩ andũ maitũ nĩmekũawa nĩ waũni. Nĩmanatũingĩĩisye tũneene ũndũ tũnaisye, na tweevĩta wĩvĩto tũtatonya kwananga. 31Kwoou tũvoyee, nũndũ wĩ mũndũ mũka wĩ kĩkĩo kya Ngai, nĩ kana Mwĩai atũetee mbua, ithima sitũ ilike kĩw'ũ, na tũieka kũawa nĩ waũni.”
32Nĩvo ĩndĩ Yundithi wameie atĩĩ, “Mbĩthukĩĩsyei, ngilĩlye kwĩka ũndũ ũlilikanawe andũnĩ ma nthĩ yaitũ nzyawanĩ syonthe. 33Ũmũnthĩ wĩoo, ũngamai mũvĩanĩ wa ndũa. Nĩĩsa kumaala nĩ na mwĩĩtu wakwa mũthũkũmi, na mũthenya ũla mwathanĩte kũnengane ndũa yaitũ kũla kwĩ amaitha maitũ ũtanavika, Mwĩai nũkũndũmĩa nĩtangĩĩe andũ ma Ĩsilaeli. 34Ĩndĩ mũikatate kũngũlya ũndũ ngwenda kwĩka; ngamũtavya namina kũwĩka.”
35Usia na atongoi ala angĩ ma ndũa nĩmeeie Yundithi atĩĩ, “Enda na mũuo, na Mwĩai Ngai nĩakũtongoesye ũkeeyĩĩvanĩsye kũla kwĩ amaitha maitũ.” 36Nĩvo ĩndĩ atongoi asu maumie ĩeemanĩ ya Yundithi, na masyoka mĩvĩanĩ kũla masungaa.
Currently Selected:
Yund 8: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011