Yund 10
10
Yundithi Aithi vala Olovenesi Wambĩte Maeema.
1Yundithi amina kũvoya Ngai wa Ĩsilaeli, 2nĩwookĩlile vala wakomete na ĩvu na eeta mũthũkũmi wake mwĩĩtu. Nĩwatheeie kuma ĩeemanĩ yĩla yaĩ kĩalanĩ kya nyũmba yake, alika nyũmba nthĩnĩ vala wekalaa mĩthenyanĩ ya Savato na ya mboka. 3Nĩwaumisye ngũa yake ngaamu ya ĩkunia ĩla weekĩĩte, na o ta ũu aumya ngũa yake ya ndiwa. Nĩwathambie na eevaka mauta ma thooa mũnene. Nĩwasanũie nzw'ĩĩ na amyova na mũkumbũ, na eekĩa ngũa sya kwendeesya ila weekĩaa ĩvinda yĩla kwĩ syathĩ sya ũtanu, yĩla mũũme wake Manase waĩ thayũ. 4Nĩweekĩie iatũ, eekĩa mbangili, masoa, mbete, mĩnaĩ na syĩndũ syake syonthe sya wanake. Eeyanakavisye weethĩa nĩwĩsĩ kana nũkwendeesya mũndũ-ũme o na wĩva ũla wamwona. 5Yundithi nĩwanengie mũthũkũmi wake mwĩĩtu kĩkuu kya kĩthuma kĩ ndivai na sũva wa mauta. Nĩwausũisye mũvuko na ngetha ya mbaa mbeke ngaange, tũkũmbwa twa matunda mavovu na mũkate mũseo. Nĩwavw'ĩkie mĩio yake yonthe na amĩnenga mũthũkũmi wake mwĩĩtu akue. 6Nĩvo ĩndĩ maendie mũvĩanĩ wa ndũa ya Mbethulia, na meethĩa Usia aũngyĩ vau e na Kyavilisi na Kyalimisi ala maĩ atumĩa ma ndũa. 7Yĩla aũme asu masyaisye Yundithi, na moona ũndũ ũthyũ wake waalyũkĩte na akekĩa ngũa ingĩ, nĩmendeeiw'e mũno nĩ wanake wake na mamwĩa atĩĩ, 8“Ngai wa aaũmae maitũ nĩakũathime na ayĩanĩsya mĩvango yaku, nĩ kana ũetee andũ ma Ĩsilaeli ũsindi, na ndũa ya Yelũsalemu ũkumyo.” Nĩvo ĩndĩ Yundithi wathaithie Ngai.
9Nĩwaneenie namo amea atĩĩ, “Ĩyĩaei mbingũĩwe mũvĩa wa ndũa na nĩngũthi ngeanĩsye maũndũ ala tũnaneenie.” Nĩvo ĩndĩ meeaĩe anake mavingũĩe Yundithi. 10Mamina kũmũvingũĩa, Yundithi nĩwaumaalanilye na mũthũkũmi wake mwĩĩtu. Aũme asu nĩmamũsyaĩĩisye atheete kuma kĩĩmanĩ athi kũlika mwandanĩ weethĩa maitonya kũmwona ĩngĩ. 11Aka asu elĩ maendete me mwandanĩ, nĩmakomanie na nguthu ya asikalĩ ma Asuli maisunga. 12Nĩmakwatie Yundithi na mamũkũlya atĩĩ, “Wĩ wa nthĩ yĩva? Wauma va na ũendete va?”
Yundithi nĩwamasũngĩie amea atĩĩ, “Nĩ Mũevelania ĩndĩ nĩkĩĩte andũ maitũ nũndũ Ngai akilĩlye kũmanengane ũtonyinĩ wenyu mũmamine. 13Nĩendete kwonana na Olovenesi mũnene wa asikalĩ menyu ma kaũ nĩ kana nĩmũnenge ũvoo wa w'o. Nĩngũmwony'a ũndũ ũkũthi na aikwata nthĩ yonthe yĩ iĩma vate ũmwe wa asikalĩ make ũkũkwatwa kana kũawa.”
14Yĩla aũme asu meewie ũndũ Yundithi wasya, na mamũsisya nesa, nĩmoonie e mwanake mũno na mamwĩa atĩĩ, 15“Nĩwoovosya thayũ waku yĩla wooka kũũ nĩ kana wonane na mũnene waitũ. Yu enda mĩtũkĩ ĩeemanĩ yake; amwe maitũ nĩmeũkũtwaa vala ũĩ. 16Wathi vala ũĩ ndũkakĩe. Mũtavye o ũndũ watũtavya na nũkũkwĩka nesa.” 17Asikalĩ asu nĩmanyuvie katĩ woo asikalĩ ĩana maendany'e na Yundithi e na mwĩĩtu wake mũthũkũmi, na mamatwaa ĩeemanĩ ya Olovenesi.
18Kwaĩ ũtanu mũnene mũno maeemanĩ ma asikalĩ ma Asuli, nũndũ ũvoo wa kũka kwa Yundithi nĩwatavaniw'e kuma ĩeemanĩ yĩmwe kũthi yĩla yĩngĩ. Yundithi aũngamĩte nza wa ĩeema ya Olovenesi eteelete nĩ kana alikw'e vala ũĩ, asikalĩ aingĩ ma Asuli nĩmookie maũngama mamũthyũlũlũkĩte. 19Nĩmaseng'iw'e mũno nĩ wanake wa Yundithi, na mendeew'a mũno nĩ andũ ma Ĩsilaeli ethĩwa aka moo manakavĩte ta Yundithi. Nĩmakũlanasya ene kwa ene atĩĩ, “Nũũ ũtonya kũvũthĩĩsya andũ me na aka manakavĩte mũno wĩana ũu? Nĩ kavaa tũkoaa aũme moo onthe, nũndũ twalea kwĩka ũu Ayuti aa nĩmeũlikya nthĩ yonthe mũteonĩ.”
20Nĩvo ĩndĩ asikalĩ ala masungaa Olovenesi na athũkũmi make onthe maumaalile na malikya Yundithi ĩeemanĩ nthĩnĩ. 21Ĩvindanĩ yĩu Olovenesi athũmũĩte ũkomonĩ wake ũla wavw'ĩkĩtwe neti ĩtumĩtwe na kĩtambaa kya ũlii wa langi ũilyĩ ta mũtune, ũvulanĩtw'e na thaavu, na ĩkanakavw'a na mavia ma emelandi na angĩ ma thooa mũnene. 22Yĩla mamũtavisye ĩũlũ wa Yundithi, Olovenesi nĩwookie ĩeemanĩ mumĩlo atongoew'e nĩ andũ makuĩte taa iseũvĩtw'e na silĩva. 23Yĩla Yundithi waendie mbee wa Olovenesi na athũkũmi make, onthe nĩmaseng'iw'e nĩ ũndũ waanakavĩte. Yundithi nĩwakomie nthĩ mbee wa Olovenesi amũnenge ndaĩa, ĩndĩ athũkũmi ma Olovenesi mamũkĩlya.
Currently Selected:
Yund 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011