Yund 7
7
Asuli Mayĩlingĩla Mbethulia
1Mũthenya ũla waatĩĩe, Olovenesi nĩweeaĩie asikalĩ make onthe, na asikalĩ angĩ ala maĩ ngwatanĩo nake mathi makavithũkĩe Mbethulia, na maikwata tũsĩla tũtheke tũla tũendete nthĩ yĩ iĩma, na kũkita na andũ ma Ĩsilaeli. 2Kwoou mũthenya ũsu asikalĩ onthe nĩmaendie: Asikalĩ ma ikundi sya kũthi na maũũ maĩ ngili ĩana na mĩongo mũonza, asikalĩ ma kũlĩsa mbalasinĩ maĩ ngili ĩkũmi na ilĩ, na vaĩ asikalĩ angĩ ma kũthi na maũũ ala makuĩte mĩio. Asikalĩ asu maĩ aingĩ mũno. 3Nĩmambie maeema mwandanĩ ũla waĩ vakuvĩ na Mbethulia, ũtee wa kĩthima. Kĩsio kĩu mambĩte maeema kyaĩ kĩnene mũno nũndũ ũthanthau wakyo waĩ kuma ndũanĩ ya Ndothani kũthi kũvika Mbalambaimu, na ũasa wakyo waĩ kuma Mbethulia kũthi kũvika ndũanĩ ya Siamoni ĩla yĩ ngalĩkonĩ ĩla ĩngĩ ya Mwanda wa Yesileeli.
4Yĩla andũ ma Ĩsilaeli moonie ũndũ asikalĩ asu maingĩvĩte, nĩmatelemile mũno, na maneenany'a ũmwe na ũla ũngĩ mayasya atĩĩ, “Asikalĩ aa meya lĩu w'onthe ũla wĩ nthĩ ĩno. O na lĩu w'onthe ũla wĩ iĩmanĩ ndũlu, myandanĩ na tũlĩmanĩ ũkombanw'a, ndũmavũny'a.” 5#1Mak 12.28-29 Nĩvo ĩndĩ kĩla mũndũ woosie mũio wake wa kaũ, na mavuva myaki myakonĩ yoo mĩtũlu ya kũsyaĩĩsya, na mekala masyaĩĩsye ũtukũ w'onthe. 6Mũthenya ũla waatĩĩe, Olovenesi nĩwaumaalilye asikalĩ make ala malĩsĩte mbalasinĩ amatongoesya, andũ onthe ma Ĩsilaeli me Mbethulia mamasyaĩĩsye. 7Nĩwasiisye amanya nesa nzĩa ila iendete ndũanĩ ĩsu, na athi ithimanĩ ila andũ ma Ĩsilaeli matavaa kĩw'ũ. Nĩwakwatie ithima isu, na aia asikalĩ maisunge na ĩndĩ asyoka kũla kwĩ asikalĩ make.
8Atongoi onthe ma Aetomu, na ma asikalĩ ma Amoavi, vamwe na anene ma asikalĩ kuma isionĩ ila syĩ ũtee wa Ũkanga wa Menditelenia, nĩmookie kũla kwĩ Olovenesi mamwĩa atĩĩ, 9“Mũnene, ĩthukĩĩsye ũndũ tũũkwĩa, nĩ kana asikalĩ maku maikasindwe. 10Andũ aa ma Ĩsilaeli mayĩkwatasya matumo moo, ĩndĩ mekwatasya ũtũlu wa iĩma vala matũaa, nũndũ kwambata iĩmanĩ isu mũthya nĩ ũndũ wĩ vinya. 11Kwoou mũnene, ndũkathi kũkita namo asikalĩ mevangĩte ũndũ mevangaa me kaũnĩ, na vai ũmwe wa asikalĩ maku wĩũawa. 12Ĩkala ĩeemanĩ yaku, na asikalĩ maeemanĩ moo, ĩndĩ ũyĩaĩa athũkũmi maku mathi makakwate ithima ila syumĩte nguumo wa iĩma. 13Vau nĩvo andũ ma Mbethulia mokaa kũtava kĩw'ũ. Kwoou nĩmeũkwatwa nĩ waũni mwingĩ, na mayĩtĩkĩla kũnengane ndũa yoo. Ĩvindanĩ o yĩu ithyĩ na andũ maitũ nĩtũkwambata mĩthyanĩ ya iĩma ila syĩ vakuvĩ, twambe maeema vo nĩ kana tũsyaĩĩsye mũndũ o na ũmwe ndakaumaale ndũanĩ. 14Aũme, iveti na syana, onthe nĩmekũawa nĩ nzaa. Tũtanamba kũmavithũkĩa meĩthĩwa mavalũkangĩte nzĩanĩ syoo me akw'ũ. 15Kwa nzĩa ĩsu wĩĩthĩwa wamaĩvĩthya nũndũ wa ũng'endu woo na nũndũ wa kũlea kwĩnengane kũla ũĩ kwa nzĩa ya mũuo.” 16Olovenesi e na athũkũmi make onthe nĩmendeeiw'e nĩ ndeto isu, na kwoou eeaĩa andũ asu meke ũndũ maisye. 17Kwoou asikalĩ ma Moavi nĩmaendanisye na Asuli ngili itano, na mamba maeema mwandanĩ. Nĩmakwatie ithima, na kũndũ kw'onthe kũla andũ ma Ĩsilaeli maumasya kĩw'ũ. 18Aetomu na Aamimoni nĩmambatie iĩmanĩ na mamba maeema nthĩ yĩ iĩma ngalĩko ĩla ĩngĩ ya ndũa ya Ndothani. Nĩmatũmie asikalĩ amwe moo ngalĩko ya ĩtheo na ya wumĩlonĩ wa syũa kwelekela Engilembe, ĩla yĩ vakuvĩ na Kyusi, vakuvĩ na Ũsĩ wa Mokimũli. Asikalĩ ala angĩ ma Asuli nĩmambie maeema moo mwandanĩ na mausũa kĩla vandũ nthĩ ĩsu, nũndũ maeema moo, na syĩndũ ila maĩ nasyo kwondũ wa asikalĩ aingĩ ta ũu syaĩ mbingĩ mũno.
19Andũ ma Ĩsilaeli nĩmeekaĩlile Mwĩai, Ngai woo, nĩkwĩthĩwa nĩmakwie ngoo, nũndũ amaitha moo onthe nĩmamelingĩlĩte, na mayaĩ na nzĩa ya kũkĩĩla. 20Asikalĩ onthe ma Asuli: Ma ikundi sya kũthi na maũũ, asikalĩ ma kũlĩsa mbalasinĩ, na ma makasya ma kaũ nĩmeelingĩlile andũ ma Ĩsilaeli vandũ va mĩthenya mĩongo ĩtatũ na ĩna, nginya syĩndũ syonthe sya kwĩkĩa kĩw'ũ sya andũ ma Mbethulia syatiwa syĩ nthei. 21Kĩw'ũ kĩla maiĩte nĩkyathelile na vai mũndũ wanyusaa kĩw'ũ kwa mũthenya akalaũka, nũndũ nĩmathimĩawa kĩw'ũ. 22Syana syoo nĩsyambĩĩie kwĩthĩwa ite na vinya, iveti na andũ ma mũika nĩmavalũkangaa nzĩanĩ sya ndũa na mĩvĩanĩ nũndũ wa waũni. Vai ũmwe woo waĩ na vinya.
23Nĩvo ĩndĩ andũ onthe: Anake, iveti na syana moombanĩie vala ve Usia, na atongoi onthe ma ndũa na maĩa na wasya mũnene mayasya atĩĩ, 24“Ngai nũkũmũkany'a nũndũ wa ũndũ mũtwĩkĩte! Maũndũ aa maendee nũndũ wa ĩvĩtyo yenyu, nũndũ mũineeseũvya wĩw'ano wa mũuo na Asuli. 25Yu tũi na mũndũ wa kũtũtetheesya. Ngai nũtũnenganĩte ũtonyinĩ woo, na nĩtũũkw'a twĩ mbee woo nũndũ wa kwaa vinya, na kwĩthĩwa twĩ na waũni. 26Ĩtai yu andũ ma Asuli, na mũinengane ndũa yonthe kũla kwĩ asikalĩ ma Olovenesi na kũla kwĩ nguthu syake syonthe sya kaũ, nĩ kana matave syĩndũ syayo syonthe. 27Wĩthĩwa wĩ ũseo kwitũ ithyĩ kũkwatwa nĩmo, tũtw'ĩke ngombo na tũilea kũkw'a. Kwa nzĩa ĩsu tũisyaĩĩsya tũũkenge twitũ tũikw'a, na o ta ũu tũiona iveti na syana sitũ iikw'a. 28Nĩtũkwĩta ĩtu na nthĩ syĩthĩwe ngũsĩ, na o ta ũu nĩtũkwĩta Ngai waitũ, Mwĩai wa aaũmae maitũ, ũla ũtũkanasya nũndũ wa naĩ sitũ na naĩ sya aaũmae maitũ. Twĩenda mwĩke ũndũ twamwĩa mwĩke ũmũnthĩ.”
29Andũ onthe ala maĩ vau nĩmambĩĩie kũĩa na wasya mũnene, na kũvoya Mwĩai, Ngai woo. 30Nĩvo ĩndĩ Usia wameie atĩĩ, “Mbaitũ, ĩthĩwai na vinya! Nĩtũmĩĩsyei vandũ va mĩthenya ĩngĩ ĩtano. Mĩthenya ĩsu ĩithela, Mwĩai, Ngai waitũ akatwĩw'ĩa tei ĩngĩ, nĩkwĩthĩwa ndakatũtia vyũ. 31Ĩndĩ mĩthenya ĩsu yathela vate ũtethyo tũkwatĩte, ngeeka ũndũ mwasya.” 32Nĩvo ĩndĩ Usia waekie andũ mathi. Aũme onthe nĩmasyokie, kĩla mũndũ vala wasungaa ũkũtanĩ na myakonĩ mĩtũlu ya ndũa syoo. Iveti na syana nĩsyenũkie. Andũ onthe kĩla vandũ ndũanĩ nĩmakw'ĩte ngoo.
Currently Selected:
Yund 7: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011