Yund 6
6
Ũneeni wa Olovenesi
1Yĩla andũ ala mathyũlũlũkĩte nzama maekie kũlonzany'a, Olovenesi, mũnene wa asikalĩ ma Asuli nĩwaneenie na Akĩoli e mbee wa andũ onthe ala maumĩte isionĩ ila syaĩ ũtee wa Ũkanga wa Menditelenia, Amoavi, na asikalĩ ma Aamimoni ala maĩvĩtwe moke kũkita.#6.1 asikalĩ ma Aamimoni ala maĩvĩtwe moke kũkita: Maandĩko amwe ma Ndeto ya Ngai mai na ndeto ii. 2Nĩwamũkũlilye atĩĩ, “Akĩoli, wĩsũanĩa nue ũũ, we vamwe na asikalĩ aa maĩvĩtwe kũkita ma Evalaimu, nĩ kana ũtwathanĩe ũndũ weeka ũmũnthĩ na watwĩa tũikathi kũkita na andũ ma Ĩsilaeli nũndũ Ngai woo nũkũmasũvĩa? Ve Ngai ũngĩ eka Nevukatinesa? 3Nevukatinesa nũkũtwaa asikalĩ make makamine andũ asu maume ĩũlũ wa nthĩ. Ngai woo ndematangĩĩa; ithyĩ athũkũmi ma mũsumbĩ twĩmamina ta mũndũ o ũmwe. Maitonya kũsiĩĩa ũtonyi wa asikalĩ maitũ. 4Twĩmavĩvya mathele vyũ; iĩma syoo syĩusũa nthakame yoo, na mĩũnda yoo ĩyusũa simba syoo. Maitonya kũsindana naitũ. Mũsumbĩ Nevukatinesa, mwĩai wa nthĩ yonthe nũneenete akasya no nginya maminwe vyũ, na ndeto syake ti sya mana. 5Ĩndĩ we Akĩoli, wĩ o mũsikalĩ ũandĩkĩtwe nĩ Aamimoni, na ndeto isu waneena nĩ sya kũleana na mũsumbĩ. Kuma ũmũnthĩ ndũkambona ĩngĩ nginya nĩyĩĩvanĩsye kũla kwĩ andũ asu maumie Misili. 6Namina kwĩka ũu, asikalĩ makwa makakũaa na mbyũ na matumo. Ũkeethĩwa wĩ ũmwe wa ala makoawa.
7“Ngombo syakwa yu nĩũkũtwaa nthĩ yĩ iĩma ikaũtie ndũanĩ ĩmwe yĩ vakuvĩ na tũsĩla tũtheke, 8na ndũkakw'a nginya yĩla wĩũawa vamwe na andũ ma nthĩ ĩsu. 9Ndũkethĩwe na thĩna ethĩwa nĩwĩsĩ kana andũ ma nthĩ ĩsu maikasindwa. Nĩnaneena, na vai ĩmwe ya ndeto syakwa ĩkalea kwĩanĩa.”
Akĩoli Aitwawa Mbethulia
10Nĩvo ĩndĩ Olovenesi weeaĩie ngombo syake ila syamũthũkũmaa ĩeemanĩ yake ikwate Akĩoli imũtwae Mbethulia ikamũnengane kũla kwĩ andũ ma Ĩsilaeli. 11Kwoou ngombo isu nĩsyamũkwatie, na syamumya vala maeema mambĩtwe syamũtwaa. Kuma vau nĩsyamũtwaie nthĩ yĩ iĩma nginya ithimanĩ ila syĩ ĩtheo wa Mbethulia.
12Yĩla andũ ma Mbethulia mamonie nĩmoosie mĩio yoo ya kaũ, na masemba mauma ndũanĩ, mathi kĩĩmanĩ mũthya, na ala matũmĩaa ikũtha nĩmekisye mavia mamasiĩĩe maikambate. 13Andũ ma Asuli nĩmeevithanisye na kĩĩma. Nĩmoovanisye Akĩoli na mamũtia avalũkĩte nguumo wa kĩĩma, na ĩndĩ masyoka kũla kwĩ mũnene woo.
14Yĩla andũ ma Ĩsilaeli matheeie kuma Mbethulia na meethĩa Akĩoli, nĩmamũthaisye na mamũtwaa Mbethulia vala ve atongoi ma ndũa. 15Ĩvindanĩ yĩu atongoi ma ndũa ĩsu maĩ Usia mwana wa Mika, kuma mbaĩnĩ ya Simioni, Kyavilisi mwana wa Ngothonieli, na Kyalimisi mwana wa Melikieli. 16Atongoi asu nĩmeetie atumĩa ma ndũa onthe, namo anake na iveti masemba mathi wũmbanonĩ ũsu. Akĩoli nĩwaetiwe mbee wa andũ onthe, na Usia amũkũlya ũndũ kweekĩkĩte. 17Akĩoli nĩwamasũngĩie amatavya maũndũ ala meekĩkie nzamanĩ ya Olovenesi, na maũndũ onthe ala waneenie mbee wa atongoi ma Asuli. O ta ũu nĩwamatavisye maũndũ onthe ala Olovenesi weekathĩĩaa kana akeeka andũ ma Ĩsilaeli. 18Yĩla andũ meewie ũu, nĩmavalũkile nthĩ na mathaitha Ngai, na o ta ũu mamwĩkaĩla mayasya atĩĩ, 19“Ame Mwĩai Ngai wa ĩtunĩ, sisya ũndũ amaitha maitũ mekwĩkathĩĩa, na ũndũ mavangĩte kũtũthĩny'a. Twĩw'ĩe tei ithyĩ andũ maku na ũitũtethya.” 20Nĩvo ĩndĩ maĩkĩĩthisye Akĩoli kana e ũsũvĩonĩ, na mamũkathĩĩa nũndũ wa maũndũ ala weekĩte. 21Wũmbano wathela, Usia nĩwatwaie Akĩoli nyũmba kwake na amwĩkĩĩa mboka nene e vamwe na atumĩa ma ndũa. Ũtukũ w'onthe nĩmavoyie Ngai wa Ĩsilaeli nĩ kana amatethye.
Currently Selected:
Yund 6: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011