Yund 5
5
Nzama ya Kaũ ĩla Yoombanĩie Ĩeemanĩ ya Olovenesi
1Yĩla Olovenesi, mũnene wa asikalĩ ma Asuli wamanyie kana andũ ma Ĩsilaeli nĩmeyũmbanĩsye kaũ, na kana nĩmalindĩte tũsĩla tũtheke tũla twesĩlĩte iĩmanĩ, na makaiĩĩa mĩthya ya iĩma syonthe ila ndũlu na kwĩkĩa syĩndũ sya kũsiĩĩa amaitha ũiĩnĩ, 2nĩwathatie mũno. Kwoou nĩweetie atongoi onthe ma Amoavi, anene ma asikalĩ ma Aamimoni, na makavana ma kĩsio kĩla kĩ ũtee wa Ũkanga wa Menditelenia mombane vamwe. 3Nĩweeie atongoi asu atĩĩ, “Inyw'ĩ Akanaani nzũngĩei makũlyo aa: Andũ asu matwĩe iĩmanĩ naaũ, nĩ ndũa syĩva ila matwĩe, asikalĩ moo ma kaũ nĩ meana, na ũtonyi na vinya woo wĩana ata? O ta ũu ndavyei mũsumbĩ woo nũũ, ũla ũtongoesye asikalĩ moo ma kaũ? 4Nĩkĩ no mo me oka, katĩ wa andũ ala matũaa ngalĩko ya ũthũĩlonĩ wa syũa, maleile kũka tũkomane?”
Ũneeni wa Akĩoli
5Nĩvo ĩndĩ Akĩoli mũtongoi wa Aamimoni weeie Olovenesi atĩĩ, “Mũnene, nĩngũkwĩsũva wĩthukĩĩsye ũndũ nyie mũthũkũmi waku ngũkwĩa. Nĩngũũtavya ũw'o ĩũlũ wa andũ asu mekalaa isionĩ syĩ iĩmanĩ vakuvĩ naku. Nyie mũthũkũmi waku ndineena ũvũngũ. 6Andũ asu nĩ nzyawa sya Akalitei. 7Ĩvinda yĩmwe matwĩe Mesovotamia, nũndũ nĩmaleile kũthaitha ngai ila aaũmae moo mathaithaa me nthĩ ya Mbavilonĩ. 8Nĩmaleile kũatĩĩa ũthaithi wa aaũmae moo na mathaitha Ngai wa ĩtunĩ, Ngai ũla mamanyĩte. Kwoou Akalitei nĩmamalũngilye maume vala ve ngai syoo, namo makĩa mathi Mesovotamia, na matũa kũu vandũ va ĩvinda ĩasa.
9 #
Mwa 11.31—12.5
“Nĩvo ĩndĩ Ngai woo wameaĩe maume vala matwĩe mathi nthĩ ya Kanaani. Nĩmatũie vo, na makwata ũthwii mwingĩ mũno wa thaavu, silĩva na indo mbingĩ. 10#Mwa 42.1-5; Kuma 1.7 Yĩla kwookie yũa nthĩ yonthe ya Kanaani, nĩmatheeie Misili vala matũie, nĩkwĩthĩwa nĩmakwataa lĩu ũmeanĩe. Me vau nĩmaingĩvie mũno nginya weethĩa maitalĩka. 11#Kuma 1.8-14 Kwoou mũsumbĩ wa Misili nĩwamamenie, amathĩny'a na amombĩthya mavali na vinya na amatw'ĩkĩthya ngombo. 12#Kuma 7.1—12.29,46 Nĩmeekaĩlile Ngai woo, na aetee nthĩ yonthe ya Misili mowau matavoaa. Kwoou andũ ma Misili nĩmamalũngilye mauma nthĩ yoo. 13#Kuma 14.21-22 Yĩla mavikie Ũkanganĩ Mũtune, Ngai woo nĩwatumie kĩw'ũ kyaw'o kĩng'ala, 14na amatongoesya mesĩla Kĩĩmanĩ kya Sinaĩ, na Katesi-mbalinea. Nĩmalũngilye andũ onthe ala matwĩe weũnĩ. 15Nĩmatũie nthĩ ya Aamoli, na nũndũ wa ũtonyi woo mũnene mamina andũ onthe ala matwĩe Esivoni. Nĩvo ĩndĩ maingie Ũsĩ wa Yolotani na mamesya nthĩ yonthe ĩla yĩ iĩma. 16Nĩmalũngilye Akanaani, Avelisi, Ayevusi, Asekemu na Angilikasi onthe, na matũa vau vandũ va ĩvinda ĩasa.
17 #
Kũt 28.1-68
“Yĩla malea kũvĩtĩsya Ngai woo, nĩmaendeeaa nesa, nĩkwĩthĩwa Ngai ũla ũmenete naĩ eethĩawa vamwe namo. 18Ĩndĩ yĩla malea kwĩka kwĩanana na kwenda kwake, nĩmasindawa mathi kaũnĩ, nginya mũminũkĩlyo makwatwa matwawa me ove nthĩ ya ũeninĩ. Ĩkalũ ya Ngai woo nĩyaanangiwe, na amaitha moo matũa ndũanĩ syoo. 19Ĩndĩ yu nĩmasyokeete Ngai woo; nĩmasyokete kuma nthĩ ila manyaĩĩkĩw'e na makatũa Yelũsalemu, vala ve Ĩkalũ yoo. Nĩmatũĩte nthĩ yĩ iĩma, ĩla ĩtatwĩe andũ.
20“Yu ĩndĩ, mũnene wakwa mũsumbĩ, kethĩwa andũ asu nĩmekĩte naĩ makamũvĩtĩsya Ngai, o na ethĩwa mekĩte matesĩ, na kethĩwa nĩtũmanya kana nĩmavĩtĩtye, notũmavithũkĩe tũkamasinda vate thĩna. 21Ĩndĩ ethĩwa andũnĩ ma nthĩ yoo vai ũmwe wĩkĩte naĩ, mũnene wakwa ekana namo. Mwĩai woo nũkũmatetea, Ngai woo nũkũmasũvĩa, naitũ nĩtũkwĩkĩĩthw'a nthoni mbee wa nthĩ yonthe.”
Ũndũ Andũ Maneenie
22Akĩoli amina kũneena, andũ onthe ala meelingĩlĩte ĩeema nĩmambĩĩie kũnyungunyĩsya. Anini ma Olovenesi na andũ onthe ala maumĩte isionĩ ila syĩ ũtee wa Ũkanga wa Menditelenia, na Amoavi nĩmaisye no nginya Akĩoli oawe.
23Maneenaa na kwasya atĩĩ, “Tũikĩa andũ ma Ĩsilaeli; nĩ andũ mate vinya, na mai na ũtonyi wa kũkita. 24Kwoou mũnene waitũ Olovenesi, eka twambate, na asikalĩ maku aingĩ nĩmeũmamina vate thĩna.”
Currently Selected:
Yund 5: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011