Yund 4
4
Andũ ma Ĩsilaeli Makĩyũmbany'a Kũkita
1Andũ ma Ĩsilaeli ala matwĩe Yutia nĩmeewie ũndũ Olovenesi, mũtongoi wa asikalĩ ma Mũsumbĩ Nevukatinesa weekanĩte na nthĩ ingĩ. Nĩmeewie ũndũ waanangĩte makalũ ma nthĩ isu, na akatava syĩndũ ila syaĩ makalũnĩ asu. 2Kwoou andũ ma Ĩsilaeli nĩmakwatiwe nĩ w'ĩa mũno. Makĩaa nũndũ wa ũndũ Olovenesi ũtonya kwĩkana na Yelũsalemu, Ĩkalũ ya Mwĩai, na Ngai woo. 3Ĩvindanĩ yĩu maĩ manaumie kũla matavĩtwe makatwawa na makenũka Yutia. O ta ũu maĩ manavatha ĩngĩ Ĩkalũ, mĩio ya yo, na kĩthembeo nũndũ syaĩ mbukye. 4Kwoou nĩmatavisye andũ onthe ma Samalia, Kona, Mbethi-oloni, Mbelimaini, Yeliko, Kyomba, Aesola na ma Mwanda wa Salemu nĩ kana mesũvĩe. 5Nĩvo ĩndĩ kwa mĩtũkĩ matũie iĩmanĩ ila ndũlu syonthe ĩũlũ, na maiĩĩa ndũa ila syaĩ kw'o. Nĩmoombanisye lĩu nĩ kana meyũmbanĩsye kaũ. Yaĩ ĩvinda ĩseo nũndũ maĩ o manakethie lĩu mĩũndanĩ yoo mĩtũkĩ.
6Mũthembi Mũnene Yoakimu, ũla waĩ Yelũsalemu ĩvindanĩ yĩu, nĩwaandĩkĩie andũ ala matũaa ndũanĩ sya Mbethulia, na Mbetomesithaimu vakuvĩ na Mwanda wa Yesileeli, ngalĩko ya ũiĩnĩ wa Ndothani. 7Amaandĩkĩie ameaĩĩte mathi makekale tũsĩlanĩ tũtheke tũla tũendete Yutia twĩsĩlĩte iĩmanĩ. Me kũu makeethĩwa matonya kũsiĩĩa amaitha ala matonya kũmavithũkĩa, nũndũ tũsĩla tũu twaĩ tũtheke ũkethĩa andũ aingĩ maitonya kwĩsĩla vo ĩvindanĩ yĩmwe; no andũ elĩ maĩ matonya kwĩsĩla. 8Kwoou andũ ma Ĩsilaeli nĩmeekie ũndũ Mũthembi Mũnene Yoakimu waĩtye, na ũndũ nzama ya andũ onthe ma Ĩsilaeli ĩla yakomanĩĩte Yelũsalemu yameaĩĩte.
Mboya ĩla Andũ ma Ĩsilaeli Mavoyie Matanamba Kũthi Kaũnĩ
9Aũme onthe ma Ĩsilaeli nĩmeekaĩlile Ngai na kĩthikii, na matĩĩa kũya menyivĩtye. 10#Yona 3.7-8; Est 4.1-3 Onthe vamwe na iveti syoo, syana syoo, na indo syoo, aeni ala matwĩe nthĩ yoo, athũkũmi na ngombo, nĩmeekĩie ngũa ngaamu sya makunia. 11Andũ onthe ma Ĩsilaeli ala matwĩe Yelũsalemu, aũme, iveti na syana syoo nĩmakomie nthĩ na ĩvu mbee wa Ĩkalũ, na meeyũmba mũu mũtwe. O ta ũu nĩmalanilye ngũa syoo ngaamu sya makunia mbee wa Mwĩai. 12O na nĩmavw'ĩkie kĩthembeo ngũa ngaamu sya makunia. Nĩmavoyie Ngai wa Ĩsilaeli na kĩthito nĩ kana ndaketĩkĩle syana syoo ikuwe, na iveti syoo iitavwa, na ndũa syoo ila nĩ ũtiĩwa woo iyanangwa. Nĩmeesũvie Ngai ndaketĩkĩle Andũ-ma-mbaĩ-ingĩ meanĩsye mũvango woo wa kwananga Ĩkalũ na kũyĩvukya. 13#Est 4.16 Mwĩai nĩweewie mboya syoo, na amew'ĩa tei nũndũ wa thĩna ũla maĩ naw'o. Eekie ũu nũndũ andũ ma Ĩsilaeli ala maĩ kĩla vandũ Yutia na Yelũsalemu, nĩmatĩĩie kũya mĩthenya mingĩ me mbee wa Ĩkalũ ya Mwĩai Mwene Ũtonyi W'onthe. 14#Yoe 2.17 Mũthembi Mũnene Yoakimu, athembi, vamwe na andũ ala mathũkũmaa Ĩkalũnĩ ya Mwĩai mekĩĩte ngũa ngaamu sya makunia inyunyunĩ, nĩmaumasya kĩla mũthenya nthembo sya kũvĩvw'a, nthembo ila syumaw'a na ngoo ya kwenda, na nthembo sya kwĩanĩsya mawĩvĩto sya andũ ma Ĩsilaeli. 15Nĩmoombie mũu itambaa syoo sya kũlingĩla mũtwe, na mavoya Mwĩai maĩĩte na wasya mũnene nĩ kana ew'ĩe andũ ma Ĩsilaeli onthe tei.
Currently Selected:
Yund 4: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011