Yund 3
3
Nevukatinesa Aitwaĩwa Ũtũmani wa Kũseũvya Mũuo
1Andũ ma nthĩ isu syonthe nĩmatũmie andũ matwaĩe Mũsumbĩ Nevukatinesa ũtũmani wa kũseũvya mũuo. Ũtũmani ũsu waĩtye atĩĩ: 2“Ithyĩ twĩendeea kwĩthĩwa twĩ aĩkĩĩku kũla ũĩ we mũsumbĩ mũnene Nevukatinesa. Twĩ mokonĩ maku, na nĩtwĩyũmbanĩtye kũkwĩw'a na ũkũthũkũma ũndũ ũkwenda. 3Myako yaitũ, nthĩ yaitũ yonthe, mĩũnda yaitũ ya nganũ, indo sitũ na maeema maitũ, syonthe syĩ ungu wa ũtonyi waku; itũmĩe ũndũ ũkwenda. 4Andũ maitũ nĩmeũtw'ĩka ngombo syaku, na nũtonya kũtũmĩa ndũa sitũ ũndũ ũkwenda.”
5Andũ ala matwaĩte ũtũmani wa kũseũvya mũuo mamina kũmũnenga Olovenesi ũtũmani ũsu, 6Olovenesi nĩwatongoeisye asikalĩ mathi nginya ũtee wa Ũkanga wa Menditelenia. Nĩwaiie asikalĩ ndũanĩ syonthe ila syaiĩĩwe na ũkũta, na o ta ũu anyuva aũme kuma ndũanĩ isu methĩwe asikalĩ ma kũtetheesya. 7Andũ ma ndũa isu na ma ila ingĩ syonthe syaithyũlũlũkĩte nĩmathokisye Olovenesi. Mamũthokisye meyovete malaa, makũnĩte ndambulĩnĩ na masũngĩte. 8#Kuma 34.13; 2Mav 17.6 Ĩndĩ Olovenesi nĩwaanangie ithembeo syoo na atemanga mĩtĩ yoo ya kũthaithĩa. Eekie ũu nũndũ eeyĩaĩĩtwe anange mĩvw'anano yonthe ya ngai sya andũ ma nthĩ ingĩ, nĩ kana andũ onthe mathaithe Nevukatinesa e weka, na andũ ma kĩla kĩthyomo na kĩla nthĩ maimwĩta ngai woo.
9Nĩvo ĩndĩ Olovenesi wesĩlile Mwandanĩ wa Yesileeli katĩ vakuvĩ na Ndothani ngalĩko ĩla ĩngĩ ya iĩma sya Yutia. 10Nĩwambie maeema katĩ wa ndũa ya Ngeva na ya Sithovoli. Nĩwekalile vau vandũ va mwei ũmwe nĩ kana ombanĩsye asikalĩ make syĩndũ syonthe ila maaĩlĩte kũtũmĩa.
Currently Selected:
Yund 3: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011