Yund 2
2
Nevukatinesa Ayũkita na Nthĩ ila syaĩ Ũthũĩlonĩ wa Syũa
1Mũthenyanĩ wa mĩongo ĩlĩ na ilĩ, mwei wa mbee, mwakanĩ wa ĩkũmi na nyanya wa kũsumbĩka kwa Nevukatinesa, Nevukatinesa vamwe na atai make nĩmavangie kwĩanĩsya mũvango woo wa kwĩyĩĩvanĩsya kũla kwĩ andũ onthe ala maleile kũmũtetheesya, o tondũ waneenete akasya akeeka. 2Mũsumbĩ nĩweetie anini make onthe, na atongoi me ndaĩa na amatavya mũvango wake wa kĩmbithĩ wa kũmina andũ ma nthĩ isu onthe. Nĩwamatavisye vyũ maũndũ onthe mathũku ala andũ asu meekĩte. 3Onthe nĩmeetĩkĩlanile kana andũ onthe ala maleete kwĩanĩsya ũndũ mũsumbĩ wameaĩĩte meke nĩmekũawa.
4Nevukatinesa amina kũmatavya mũvango ũla waĩ naw'o, nĩweetie Olovenesi ũla waĩ mũtongoi wa asikalĩ onthe, na waĩ mũnini wa mũsumbĩ na amwĩa atĩĩ, 5“Nyie Nevukatinesa mũsumbĩ mũnene ũla ũsumbĩkĩte nthĩ yonthe, nĩkwĩaĩa ũnyuve asikalĩ mesĩ kũkita nesa ta ũũ: Asikalĩ ngili ĩana na mĩongo ĩlĩ ma kũthi na maũũ, na asikalĩ angĩ ngili ĩkũmi na ilĩ ma kũlĩsa mbalasinĩ. 6Enda ũkavithũkĩe andũ ma nthĩ ila syĩ ngalĩko ya ũthũĩlonĩ wa syũa, nũndũ nĩmanaleile kũatĩĩa mwĩao wakwa. 7Matavye ũmee nĩmeyũmbany'e kũnengane nthĩ na kĩw'ũ, monany'e kana nĩmenenganĩte vate kũingĩĩw'a, nũndũ nĩnũkĩte kũmavithũkĩa nĩthatĩte mũno na nĩngũmamina vyũ. Asikalĩ makwa meĩsĩla kĩla vandũ nthĩ syoo na maitava syĩndũ syoo syonthe maendete. 8Nĩngusũsya myanda na simba syoo, na kusũsya kĩla kalũsĩ, na kĩla ũsĩ na mĩĩ mingĩ ya andũ akw'ũ. 9Nĩngũtava onthe ala mekũtiala, na kũmatwaa me ove kũla nthĩ ĩthelele.
10“Ĩndĩ we Olovenesi, nĩkwĩaĩa ũthi mbee wakwa ũkalike isionĩ syoo syonthe. Nĩmekwĩnengane kũla ũĩ, naku ũimakwata nginya nũke kũmakany'a. 11Malea kwĩka ũu, ndũkamaeke. Moae na ũitava syĩndũ syoo syonthe ila syĩ kĩsionĩ kĩla ũkwatĩte. 12Nĩnĩvĩtĩte na thayũ wakwa w'onthe, na ũtonyinĩ wa ũsumbĩ wakwa kana nĩngwĩka maũndũ ala neevĩta kwĩka. 13Ndũkalee kũmbĩw'a kwa nzĩa o na yĩva. Lilikana kana ninyie mũsumbĩ waku, na ũyĩka maũndũ onthe ala nakwĩaĩa ũte kwĩkalanga.”
Olovenesi Ayĩanĩsya Mwĩao wa Mũsumbĩ Nevukatinesa
14Olovenesi nĩwaumie vala ve mũsumbĩ na oombany'a anene onthe ma asikalĩ, anene moo na atongoi ala angĩ onthe ma asikalĩ ma Asuli. 15O tondũ mũsumbĩ weeaĩte, Olovenesi nĩwanyuvie asikalĩ ma kũthi na maũũ ala aseo vyũ ngili ĩana na mĩongo ĩlĩ, na angĩ ma kũlĩsa mbalasinĩ ngili ĩkũmi na ilĩ. 16Nĩwavangie asikalĩ asu meethĩwa me nguthu yĩyũmbanĩtye kũthi kũkita. 17O ta ũu Olovenesi nĩwoosie ngamĩle, mang'oi na nyũmbũ mbingĩ sya kũkua mĩio, na oosa malondu, ng'ombe na mbũi itatalĩka syĩthĩwe lĩu woo. 18Kĩla mũsikalĩ nĩwanengawe lĩu mwĩanĩu, na thaavu na silĩva mwingĩ kuma ũthwiinĩ wa kĩ-ũsumbĩ. 19Nĩvo ĩndĩ Olovenesi waumaalile e na asikalĩ make onthe matongoesya mũsumbĩ Nevukatinesa. Makasya ma kaũ, asikalĩ malĩsĩte mbalasinĩ, na asikalĩ ma kũthi na maũũ nĩmaendie nthĩ sya ngalĩko ya ũthũĩlonĩ wa syũa mausũa kĩla vandũ. 20#Asi 7.12; Yoe 2.2-11 Asikalĩ angĩ nĩmaendanisye vamwe namo. Asikalĩ asu maĩ aingĩ ũkethĩa maitalĩka. Maingĩvĩte ta ngie, na ta kĩthangathĩ kĩla kĩ ũtee wa ũkanga.
21Mĩthenya ĩtatũ ĩtina wa mauma Nineva, nĩmavikie ũiĩnĩ wa Mbekitilethi vakuvĩ na iĩma ila syĩ ngalĩko ya ĩũlũ wa Silisia, na mamba maeema vau. 22Kuma vau Olovenesi nĩwaendie kũvithũkĩa nthĩ yĩ iĩma e na asikalĩ make onthe; asikalĩ ma kũthi na maũũ, asikalĩ malĩsĩte mbalasinĩ na makasya ma kaũ. 23Nĩwaanangie vyũ nthĩ ya Limbya na ya Luti, na matava syĩndũ sya andũ ma Lasisi na sya Aĩsumaeli ala matwĩe ũtee wa weũ, ngalĩko ya ĩtheo ya nthĩ ya Akeleani.
24Nĩvo ĩndĩ Olovenesi waingie Ũsĩ wa Euvalati, na aananga vyũ ndũa ila syaĩ ũtee wa Ũsĩ wa Avoloni kũthi kũvika Ũkanganĩ wa Menditelenia esĩlĩte nthĩ ya Mesovotamia. 25Nĩwakwatie kĩsio kya nthĩ kya Silisia, na ooaa andũ onthe ala mamũsiĩĩie. Nĩwaendie kũvika mĩvakanĩ ya ĩtheo ya nthĩ ya Yavethi vakuvĩ na nthĩ ya Alavia. 26Nĩweelingĩlile Amitiani, avĩvya maeema moo, na ooaa malondu moo.
27Olovenesi nĩwatheeie ũiĩnĩ ũla wĩlingĩlĩte Ndamasikũ ĩvinda ya ngetha ya nganũ, na avĩvya mĩũnda yoo ya nganũ yonthe, ooaa indo syoo, atava syĩndũ ila syaĩ ndũanĩ, na syĩndũ syonthe ila syaĩ isionĩ ila syĩlingĩlĩte ndũa. O ta ũu nĩwooaie anake onthe. 28Andũ onthe ala matwĩe ũtee wa Ũkanga wa Menditelenia nĩmakwatiwe nĩ w'ĩa mwingĩ, nginya matetema. Andũ onthe ndũanĩ ya Tile, Sitoni, Suli, Osina, Yamunia, Asotu na Asikeloni nĩmatelemilw'e mũno nĩ Olovenesi.
Currently Selected:
Yund 2: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011