Yund 1
1
Kaũ wa Nevukatinesa na Alivakasandi
1Yĩla Mũsumbĩ Nevukatinesa wasumbĩkĩte nthĩ ya Asuli e ndũanĩ yake nene ya Nineva, nake Alivakasandi asumbĩkĩte nthĩ ya Metia e ndũanĩ yake nene ya Ekivatana. Ũsu waĩ mwaka wa ĩkũmi na ilĩ wa kũsumbĩka kwa Nevukatinesa. 2Mũsumbĩ Alivakasandi nĩwaakie ũkũta kwĩlingĩla ndũa ya Ekivatana. Ũkũta ũsu waĩ na ũtũlu wa mita mĩongo ĩtatũ na ũthanthau wa mita mĩongo ĩlĩ na ilĩ, na waakĩtwe na mavia mase. Kĩla ĩvia yaĩ na ũthanthau wa sendimita ĩana na mĩongo ĩtatũ, na ũasa wa sendimita maana elĩ na mĩongo thanthatũ. 3Kĩla mũvĩanĩ wa ndũa ya Ekivatana, Alivakasandi nĩwaakie mwako mũtũlu waĩ na ũtũlu wa mita mĩongo ĩna na inya. Myako ĩsu yaĩ na mũsingi waĩ na ũthanthau wa mita mĩongo ĩlĩ na thanthatũ. 4Aakie kĩla mũvĩa wĩ na ũtũlu wa mita mĩongo ĩtatũ, na ũthanthau wa mita ĩkũmi na nyanya. Mĩvĩa ĩsu yaĩ nthanthau ũkethĩa asikalĩ make onthe nĩmatonya kwĩsĩla vo, me na asikalĩ ma kũthi na maũũ.
5Ĩvindanĩ yĩu, mũsumbĩ Nevukatinesa nĩwambĩĩie kũkita na mũsumbĩ Alivakasandi. Kaũ ũsu wokitĩawa ũiĩnĩ mũnene ũla weelingĩlĩte ndũa ya Langau. 6Andũ ma nthĩ mbingĩ nĩmookie kũtetheesya Mũsumbĩ Alivakasandi; andũ onthe ala matwĩe iĩmanĩ, onthe ala matwĩe ũtee wa Ũsĩ wa Tingilisi, Ũsĩ wa Euvalati, na Ũsĩ wa Indasivesi o vamwe na andũ ala matwĩe ũiĩnĩ ũla wasumbĩkĩtwe nĩ Alioko mũsumbĩ wa Elamu. Andũ ma nthĩ mbingĩ nĩmookie ngwatanĩonĩ ĩno ĩla yeetawa ngwatanĩo ya Kelondi.
7Nĩvo ĩndĩ Nevukatinesa mũsumbĩ wa Asuli watũmanie kũla kwĩ andũ onthe ma Velisia, kũla kwĩ andũ ala matwĩe ngalĩko ya ũthũĩlonĩ wa syũa, isionĩ sya Silisia, Ndamasikũ, Levanoni, Atilevanoni, isionĩ ila syĩ ũtee wa ũkanga, 8isionĩ sya Kalimeli, Ngileati, Kalilii ya ĩũlũ, vamwe na ala matwĩe ũiĩnĩ mũnene wa Esitoloni. 9O ta ũu mũsumbĩ Nevukatinesa nĩwatũmanie kũla kwĩ andũ ala matwĩe Samalia na ndũanĩ ila syamĩlingĩlĩte, na ala matwĩe ngalĩko ya ũthũĩlonĩ wa syũa ya Ũsĩ wa Yolotani kũthi kũvika ndũanĩ ya Yelũsalemu, Mbethani, Kelũsi, Katesi na kĩsio kya nthĩ kya Ngoseni. Ũtũmani ũsu nĩwatwaĩiwe andũ ala matwĩe ũtee wa Ũsĩ wa Naeli ndũanĩ sya Tavanesi na Lamesesi, na kĩsionĩ kyonthe kya Ngoseni. 10Ũtũmani ũsu nĩwatwaiwe nginya ndũanĩ ya Tanisi na Memivisi, na kwa andũ onthe ala matwĩe Misili o na kũthi kũvika mĩvakanĩ ya Ethiovia. 11Ĩndĩ andũ onthe ma isio isu nĩmaleile ũtũmani wa Nevukatinesa mũsumbĩ wa Asuli, na kwoou mayaamũtetheesya kũkita. Mayamũkĩaa, nĩkwĩthĩwa moonaa atatonya kũsinda kaũ ũsu, na kwoou nĩmatũngĩthisye andũ asu watũmĩte me na nthoni na vate ũndũ maneanĩsya.
12Nĩvo ĩndĩ mũsumbĩ Nevukatinesa wathatiw'e nĩ andũ ma kĩsio kĩu kyonthe, nginya eevĩta kũtũmĩa ũthwii w'onthe wa ũsumbĩ wake eyĩĩvanĩsye kũla kwĩ andũ ma isio isu, ala maleile kũmũtetheesya kũkita. Nĩweevĩtie kana nũkũaa andũ onthe ma Silisia, Ndamasikũ, Silia, Moavi, Amimoni, Yutia na ma Misili o na kũthi kũvika ndeenĩ sya Ũkanga wa Menditelenia nginya Velisia.
13Mwakanĩ wa ĩkũmi na mũonza wa kũsumbĩka kwake, Mũsumbĩ Nevukatinesa nĩwatongoeisye asikalĩ make mathi kũkita na Mũsumbĩ Alivakasandi. Nĩwasindie asikalĩ onthe ma Alivakasandi, vamwe na asikalĩ make ma kũlĩsa mbalasinĩ, na asikalĩ make ma makasya ma kaũ. 14Nĩvo ĩndĩ Nevukatinesa wameisye ndũa syonthe ila syĩ nthĩ ya Metia, na athi kũvithũkĩa ndũa ya Ekivatana. Nĩwakwatie myako mĩtũlu ya ndũa ĩsu, atava syĩndũ syayo syonthe sya kũtandĩthya, na aananga ndũa ĩsu mbanake yatw'ĩka kĩvumbu. 15Nĩwakwatĩie mũsumbĩ Alivakasandi iĩmanĩ ila syĩ ũtee wa ndũa ya Langau, na amũaa na matumo ma kũsyĩma, na kwoou amũmina vyũ. 16Amina kũaa Mũsumbĩ Alivakasandi, Nevukatinesa nĩwasyokie ndũanĩ ya Nineva e na asikalĩ make onthe, makuĩte ũthwii mwingĩ mũno wa syĩndũ ila matavie kaũnĩ. E vamwe na asikalĩ make kũu Nineva, nĩmathũmũie na meethĩwa na mboka vandũ va myei ĩna.
Currently Selected:
Yund 1: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011