Yund 15
15
1Yĩla asikalĩ ala maĩ maeemanĩ ma Asuli meewie maũndũ ala meekĩka, nĩmaseng'ie mũno. 2Nĩmambĩĩie kũtetema nĩ w'ĩa. Onthe nĩmataanĩisye kĩla mũndũ athi ngalĩko yake. Mayaaĩtĩkĩla kweteelana; masembie manyaĩĩkĩa nzĩanĩ ila syaĩ iĩmanĩ na myandanĩ. 3Asikalĩ ala mambĩte maeema moo iĩmanĩ ila ithyũlũlũkĩte ndũa ya Mbethulia o namo nĩmasembie makĩa. Nĩvo ĩndĩ asikalĩ onthe ma Ĩsilaeli mamasembanisye.
4Usia nĩwatũmie andũ mathi Mbetomesithaimu, Mbembai, Kyomba, Kola na isionĩ syonthe sya Ĩsilaeli makatavany'e maũndũ ala meekĩka, na maitavya andũ matetheesye kũsembany'a amaitha moo na kũmamina. 5Yĩla andũ ma Ĩsilaeli makwatie ũtũmani ũsu, onthe nĩmavithũkĩie Asuli na mamaatĩĩa nginya Kyomba. Mooaie Asuli asu maendee na kũmalũngya. Andũ ala maĩ Yelũsalemu na ala maĩ nthĩ yĩ iĩma o namo nĩmookie, nũndũ nĩmataviw'e maũndũ ala meekĩkie maeemanĩ ma amaitha moo. Andũ ma Ngileati na Kalilii nĩmavingie nzĩa ila Asuli mesĩlĩte makĩĩte na mamoaa mũno. Mamaatĩĩie o na mathi kũvika isionĩ ila syĩ mbee wa Ndamasikũ na ila ivakanĩte nayo.
6Andũ ala angĩ ma Mbethulia nĩmalikile vala Asuli mambĩte maeema, na matava syĩndũ syoo meethusya mũno. 7Yĩla asikalĩ ma Ĩsilaeli masyokie kuma kũla mooaĩaa Asuli, nĩmoosie syĩndũ ila syatialĩte. Nũndũ wa wingĩ wa syĩndũ isu, o namo andũ ala maĩ motũinĩ na ndũanĩ ila syĩ nthĩ yĩ iĩma, na me nthĩ ndindimalu nĩmakwatie syĩndũ mbingĩ.
Andũ ma Ĩsilaeli Maitanĩa Ũsindi woo
8Mũthembi Mũnene Yoakimu, vamwe na nzama ya andũ ma Ĩsilaeli ala matwĩe Yelũsalemu nĩmookie kũkũsĩĩa maũndũ maseo ala Mwĩai weekĩte andũ ma Ĩsilaeli, na o ta ũu maikomana na Yundithi na kũmũkathĩĩa. 9Yĩla makomanie na Yundithi, nĩmamũkathĩĩie na wasya ũmwe me onthe mayasya atĩĩ, “Nĩwatuma Yelũsalemu ĩnengwa ndaĩa mũno, wĩ wa kũkathĩĩwa nĩ andũ onthe ma Ĩsilaeli. Andũ onthe ma nthĩ yaitũ nĩmekwĩkathĩĩa nũndũ waku! 10Wĩkĩte ũndũ ũũ wĩ weka; wĩkĩte Ĩsilaeli nesa mũno na Ngai nĩwendeew'e nue. Mwĩai Mwene ũtonyi W'onthe nĩakũathimae ĩvindanĩ yonthe ya thayũ waku!”
Andũ onthe nĩmasũngĩie masya, “Nĩkwĩthĩwe ũu.”
11Kwoou andũ ma Ĩsilaeli nĩmatavie syĩndũ kuma maeemanĩ ma Asuli vandũ va ĩvinda ya mĩthenya mĩongo ĩtatũ. Nĩmanengie Yundithi ĩeema ya Olovenesi na mĩio yake ya kũĩĩa ya silĩva, mokomo make, mbakũli syake, na mĩio yake yonthe ya mbwaũ. Yundithi nĩwoosie syĩndũ isu na asilĩĩla nyũmbũnĩ yake, na o ta ũu aete makasya make na ailĩĩla ingĩ vo. 12Ĩtina wa ũu aka onthe ma Ĩsilaeli nĩmoombanie mooka kũmwona. Nĩmamũkathĩĩie na amwe moo masũnga mamũnenge ndaĩa. Yundithi nĩwoosie mbonge sya mĩtĩ na ainenga aka ala waĩ namo. 13Yundithi vamwe na aka asu nĩmeekĩie ngovia sya mĩtĩ ya mĩthata. Nĩvo ĩndĩ Yundithi watongoeisye andũ onthe e mbee wa aka onthe, namo aũme onthe ma Ĩsilaeli nĩmamaatĩĩie makwete mĩio yoo ya kaũ, na onthe makekĩa wanake mĩtwenĩ yoo mainĩte mbathi sya kũtaĩa.
Currently Selected:
Yund 15: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011