Yund 16
16
Wathi wa Yundithi wa Kũtaĩa Ngai
1Nĩvo ĩndĩ Yundithi wambĩĩie kwina wathi ũũ wa kũtũnga mũvea e mbee wa andũ onthe ma Ĩsilaeli, namo andũ onthe mambĩĩa kwina na kũtaĩa vamwe nake. 2Yundithi ainie atĩĩ:
“Ambĩĩai kwinĩa Ngai wakwa mũkũnĩte ndambulĩnĩ,
inĩai Mwĩai wakwa mũkũnĩte masaya.
Mwinĩei wathi mweũ,
mũtaĩei na mũyĩkaĩla ĩsyĩtwa yake.
3“Nũndũ Ngai nĩwe Mwĩai ũla ũminaa kaũ,
nũndangĩĩie kuma vinyanĩ wa ala meĩngatĩĩe,
na andete ĩeemanĩ yake katĩ wa andũ.
4Mũasuli nĩwatheeie kuma iĩmanĩ ila syĩ ngalĩko ya ĩũlũ,
ookie na asikalĩ ngili mbingĩ.
Wingĩ woo nĩwavingie mbũsĩ ila syĩ mwandanĩ,
asikalĩ moo ma kũlĩsa mbalasinĩ nĩmausũie iĩmanĩ.
5Nĩweekathĩĩaa ayenda kũvĩvya kĩsio kya nthĩ yakwa,
na ayũaa aũme makwa ma mũika na ũvyũ;
ang'atangany'e syana syakwa nini nthĩ,
ose syana syakwa ikatw'ĩke ngombo, na aitava eĩtu makwa onthe.
6Ĩndĩ Mwĩai Ngai Mwene Ũtonyi W'onthe,
nĩwatumie asikalĩ ma Asuli matumana, aitũmĩa mũndũ mũka.
7“Ngũmbaũ yoo ndyaaũawa nĩ asikalĩ ma mũika,
kana ĩkavithũkĩwa na kũawa nĩ andũ anene aasa mũno.
Ĩndĩ yooaiwe nĩ Yundithi mwĩĩtu wa Melali;
amĩsindie nũndũ wa wanake wake.
8Nũndũ Yundithi aumisye ngũa syake sya mũndũ mũka ndiwa,
nĩ kana atume andũ ma Ĩsilaeli ala mathĩnaw'a masinda.
Eevakie ũthyũ wake mauta mekũnyunga nesa,
na oova nzw'ĩĩ yake na mũkumbũ,
eekĩa ngũa yake nzeo amũkenge.
9Iatũ sya Yundithi nĩsyendeeisye metho make,
wanake wake nĩwatanĩthisye kĩlĩko kyake,
na ĩndĩ ũvyũ watila ngingo yake.
10Avelisia nĩmatetemiw'e nĩ ũkũmbaũ wa Yundithi,
Ametia nĩmaseng'iw'e nĩ ũndũ weekie.
11“Nĩvo ĩndĩ andũ makwa ala mathĩnaw'a malonzanilye na ũtanu;
andũ makwa onzu nĩmalonzanilye, nake mũmaitha atetema;
nĩmookĩlilye mawasya moo na amaitha matũngĩthw'a.
12Ana ma aka athũkũmi nĩmamatonyie mũkuthũ,
nĩmamaũmĩisye ta ana ma andũ me ũkombonĩ;
nĩmaminiwe nĩ asikalĩ ma Mwĩai wakwa.
13 #
Sav 144.9
“Ngamwinĩa Ngai wakwa wathi mweũ.
We Mwĩai, wĩ mũnene na wĩ wa kũkumw'a,
wĩ vinya mwingĩ na ndwĩsa kũsindwa.
14Syũmbe syaku syonthe nikũthũkũme,
nũndũ nĩwaneenie, na syonthe syeethĩwa.
Nĩwatũmie veva waku, naw'o wasyũmba,
vai kĩmwe kĩleana na mwĩao waku.
15Nũndũ iĩma na mokanga ikathingithw'a kuma wambĩlĩĩlyonĩ wasyo,
na mavia maitweka ta ĩa me mbee waku.
Ĩndĩ ala me kĩkĩo kyaku,
ũkaendeea kũmew'ĩa tei.
16 #
1Sam 15.22; Sav 51.16-17; Osea 6.6 We Mwĩai wendeeaw'a nĩ ala makwĩw'aa,
mbee wa nthembo syĩ mũuke mũseo,
kana nthembo sya kũvĩvw'a sya mathunya.
17Kyeva nĩ kwa nthĩ ila ivithũkĩaa andũ makwa!
Mwĩai Mwene Ũtonyi W'onthe akamaĩvanĩsya Mũthenyanĩ wa Ũsilĩlo;
akatuma mĩĩ ya andũ asu ĩvya na kũĩwa nĩ iinyũ,
makaĩa me na kyalya tene na tene.”
Nguma ya Yundithi
18Yĩla andũ mavikie Yelũsalemu nĩmathaithie Ngai. Mamina kũthew'a oou, nĩmaumisye nthembo syoo sya kũvĩvw'a, nthembo sya kumya na ngoo ya kwenda, na o ta ũu maumya mĩthĩnzĩo yoo. 19Yundithi nĩwaumĩisye Ngai mĩio yonthe ya Olovenesi ĩla andũ mamũnengete. O ta ũu nĩwaumisye ĩla neti woosete ũkomonĩ wa Olovenesi, na amĩthembea Mwĩai ta nthembo ya mwanya ya kwĩanĩsya wĩvĩto. 20Andũ ma Ĩsilaeli maendeeie na mboka ĩsu vandũ va myei ĩtatũ me mbee wa Ĩkalũ vau Yelũsalemu, na Yundithi aĩ vamwe namo.
21Ĩtina wa ũu kĩla mũndũ nĩwasyokie kwake, nake Yundithi athi Mbethulia na ekala kwake. Yundithi nĩwanengiwe ndaĩa nthĩ ĩsu yonthe ĩvindanĩ yonthe ya thayũ wake. 22Aũme aingĩ nĩmendaa kũmũtwaa, ĩndĩ Yundithi ekalile e ndiwa kuma yĩla Manase mũũme wake wakwie nginya o nake esa kũkw'a. 23Nĩwaendeeie kwĩthĩwa e nguma mbeange, na akũa e nyũmbanĩ ya mũũme wake avikya ũkũũ wa myaka ĩana na ĩtano. Nĩwaekie ũla mũthũkũmi wake mũndũ mũka athi. Yundithi akw'ĩĩie Mbethulia na athikwa ngunganĩ ya Manase mũũme wake. 24Andũ ma Ĩsilaeli nĩmaĩie nũndũ wake vandũ va ĩvinda ya mĩthenya mũonza. Atanamba kũkw'a, nĩwaanisye ũthwii wake w'onthe kwa andũ ala maileny'e ũndũ na mũũme na andũ ma mũsyĩ wake o namo. 25Vai mũndũ waatata ĩngĩ kũtelemya andũ ma Ĩsilaeli Yundithi e thayũ, o na myaka mingĩ ĩtina wa kũkw'a kwake.
Currently Selected:
Yund 16: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011