Yund 14
14
1Nĩvo ĩndĩ Yundithi waneenie na andũ amea atĩĩ, “Mbaitũ, mbĩthukĩĩsyei! Osai mũtwe ũũ na mũiũkolelya ũkũtanĩ wa ndũa yenyu. 2Kwamina kũkya oou, syũa yauma, kĩla mũndũ-ũme ũtonya kũthi kaũnĩ nĩose mũio wake wa kaũ na ayuma nza wa ndũa na vainyuvwa mũtongoi. Nĩmathi ta maendete kũlika mwandanĩ kũvithũkĩa asikalĩ ma Asuli ala mekũsunga, ĩndĩ maikatate kũtheea vyũ. 3Asikalĩ ma Asuli ma kũsunga nĩmekwosa mĩio yoo ya kaũ, na maisemba maeemanĩ makaamũkye anene ma asikalĩ. Anene asu nĩmeũsemba ĩeemanĩ kwa Olovenesi ĩndĩ maimwĩthĩa. Nĩmeũkwatwa nĩ w'ĩa na maisemba mamũkĩĩte inyw'ĩ. 4Nĩvo ĩndĩ inyw'ĩ vamwe na andũ ala angĩ ma Ĩsilaeli mũũmaatĩĩa, na mũimatemanga maendee kũkĩa. 5Ĩndĩ mũtanamba kwĩka maũndũ asu onthe, Akĩoli ũla Mũamimoni aetwe vaa nĩĩ, nĩ kana one na aimanya mũndũ ũla wathĩnisye andũ ma Ĩsilaeli, na aete Akĩoli kũla tũĩ nĩ kana oaanĩw'e vamwe naitũ.”
Akĩoli Aiĩkĩĩa Ngai wa Ĩsilaeli
6Akĩoli nĩweetiwe kuma nyũmba kwa Usia. Yĩla Akĩoli wookie na oona mũtwe wa Olovenesi ũkwetwe nĩ ũmwe katĩ wa andũ ala moombanĩte, nĩwakwatiwe nĩ nthyũũa na avalũka. 7Yĩla watetheeiw'e ookĩla, nĩwakumanie atulya ndu maũũnĩ ma Yundithi amũnenge ndaĩa. Akĩoli nĩwaneenie asya atĩĩ, “Ũkataĩawa mĩsyĩnĩ yonthe ya nthĩ ya Yuta, na andũ ma nthĩ syonthe makatelemaa meew'a ĩsyĩtwa yaku yawetwa! 8Yu ĩndĩ ndavye maũndũ ala ũneekie kuma wathi.”
Nĩvo ĩndĩ Yundithi wamũtavisye, andũ onthe methukĩĩsye, maũndũ onthe ala weekie kuma mũthenya ũla waendie nginya ĩvindanĩ yĩu waneenaa. 9Yundithi amina kũneena, andũ nĩmalonzanilye na wasya mũnene na ndũa yonthe yausũa mawasya ma ũtanu. 10Yĩla Akĩoli woonie maũndũ onthe ala Ngai wa Ĩsilaeli weekĩte, nĩwaĩkĩĩie Ngai vyũ. Kwoou nĩwaĩkiwe na atw'ĩka ũmwe wa andũ ma Ĩsilaeli, o na kũvika ũmũnthĩ nzyawa syake iilyĩ ũu.
Asikalĩ ma Asuli Maitelemw'a nĩ Kĩkw'ũ kya Olovenesi
11Ũnĩ ũsu kwakya, andũ ma Ĩsilaeli nĩmoosie mũtwe wa Olovenesi maũkolelya ũkũtanĩ. Kĩla mũndũ nĩwoosie mĩio yake ya kaũ, na maendany'a me ikundi mesĩlĩte tũsĩlanĩ tũtheke tũla twĩ iĩmanĩ. 12Yĩla Asuli mamonie, nĩmatũmanie kũla kwĩ anene moo ma asikalĩ, namo matavya anene moo na atongoi ala angĩ onthe ma asikalĩ. 13Kwoou nĩmaendie ĩeemanĩ ya Olovenesi, na meea mũndũ ũla waũngamĩe maũndũ ma Olovenesi ma kĩ-nthĩnĩ atĩĩ, “Amũkya mũnene waitũ, nũndũ ila ngombo nĩsyatata kũka kũtũvithũkĩa kuma iĩmanĩ syũkite naitũ; syĩĩmanthĩa kũminwa vyũ.”
14Nĩvo ĩndĩ Mbangoasi walikile ĩeemanĩ na avingũsya e mumĩlo nũndũ asũanĩaa kana Olovenesi akomete na Yundithi. 15Yĩla waleile kwĩw'a ũsũngĩo, nĩwavingũie ĩeema na alika vala vaĩ ũkomo wa Olovenesi. Nĩweethĩie Olovenesi e mũkw'ũ. Avalũkĩte ĩũlũ wa kavĩla ka kũkinyĩthya maũũ, mũtwe wake wĩ mũtile na ũte vo. 16Mbangoasi nĩwauie mbu nene, aĩa, aluma, alonzany'a na atembũanga ngũa syake. 17Nĩvo ĩndĩ waendie ĩeemanĩ vala Yundithi wekalaa. Yĩla weethĩie Yundithi ate vo nĩwasembie vala ve atongoi ma asikalĩ na amea atĩĩ, 18“Ngombo isu nitũkengie! Mũndũ mũka ũmwe Mũevelania nĩwaete nthoni ũsumbĩnĩ wa Nevukatinesa. Kwa sisyai vaya Olovenesi ũvalũkĩte nthĩ ate na mũtwe!” 19Yĩla atongoi ma asikalĩ ma Asuli meewie ũu, nĩmatembũangie ngũa syoo nĩ kyeva. Nĩmatelemile mũno na wasya woo wa kĩĩo na kũlonzany'a weew'ĩka kĩla vandũ maeemanĩ.
Andũ ma Ĩsilaeli Maisinda Asuli
Currently Selected:
Yund 14: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011