Yund 13
13
1Yĩla kwatukie, athũkũmi ma Olovenesi nĩmaumaalile, na Mbangoasi avinga mũomo wa ĩeema e ngalĩko ya nza. Avingĩie athũkũmi ma Olovenesi nza na onthe mathi kũkoma nũndũ nĩmanoete mũno, nĩkwĩthĩwa mboka ĩsu yakuie ĩvinda ĩasa. 2Yundithi atiiwe e weka ĩeemanĩ, na Olovenesi eleketye ũkomonĩ wake nũndũ aĩ mũmile vyũ nĩ ndivai. 3Yundithi nĩwatavĩtye mũthũkũmi wake mũndũ mũka amweteele mumĩlo wa ĩeema, nĩ kana aumaale o ũndũ weekaa kĩla mũthenya nĩ kana akavoye. O ta ũu Yundithi nĩwatavĩtye Mbangoasi kana nũkuma vala maeema mambĩtwe akavoye o ũndũ weekĩte matukũ atatũ mavĩtũku.
4Kwoou andũ onthe nĩmaumaalile na vai ũmwe waatiala, mũnene kana mũnini. Nĩvo ĩndĩ Yundithi aũngyĩ ũtee wa ũkomo wa Olovenesi wasũanĩie ngoonĩ yake asya atĩĩ, “Ame Mwĩai, Ngai Mwene Ũtonyi W'onthe, ndetheesya ũndũnĩ ũla ngwenda kwĩka kwondũ wa ũkumyo wa Yelũsalemu. 5Nũndũ yĩĩ nĩyo ĩvinda ya kũtetheesya andũ maku ala ũnyuvĩte, na ngĩanĩsya mũvango wakwa wa kũmina amaitha ala meũtũthĩny'a.” 6Yundithi nĩwaendie kĩtuĩnĩ kya ũkomo wa Olovenesi mũtwenĩ, na oosa ũvyũ wa Olovenesi ũla wanĩkĩtwe vo. 7Nĩwathengeeie ũkomonĩ wa Olovenesi na akwata nzw'ĩĩ sya Olovenesi na asya atĩĩ, “Ame Mwĩai Ngai wa Ĩsilaeli, nenge vinya yu.” 8Yundithi nĩwookĩlilye ũvyũ na atema Olovenesi ngingo mavinda elĩ atũmĩĩte vinya wake w'onthe nginya amũtila mũtwe. 9Nĩwavingilitilye mwĩĩ wa Olovenesi wauma ũkomonĩ, na aumya ĩla neti yanĩkĩtwe ũkomonĩ ũsu. Ĩtina wa kavinda kanini nĩwaumaalile na anenga mwĩĩtu wake mũthũkũmi mũtwe wa Olovenesi. 10Mwĩĩtu ũsu nĩwawĩkĩie mũvukonĩ wa lĩu.
Yundithi Aisyoka Mbethulia
Nĩvo ĩndĩ Yundithi na mũthũkũmi wake mwĩĩtu maendanisye o ũndũ meekaa yĩla maendete kũvoya. Nĩmavĩtie vala maeema ma Asuli mambĩtwe na makĩlanĩlya mwanda mambata kĩĩmanĩ, nginya mavika mĩvĩanĩ ya ndũa ya Mbethulia. 11Me vaasanga Yundithi nĩweetie asikalĩ ala masũngaa mũvĩa amea atĩĩ, “Vingũai! Vingũai mũvĩa! Ngai, Ngai waitũ e vamwe naitũ. Ũmũnthĩ nĩwoonany'a ĩngĩ vinya wake andũnĩ ma Ĩsilaeli, na atũmĩa ũtonyi wake kũmina amaitha maitũ.” 12Yĩla andũ ma ndũa ĩsu meewie wasya wa Yundithi, nĩmatheeie mekalaatĩte mooka mũvĩanĩ wa ndũa na moombany'a atumĩa ma ndũa. 13Andũ onthe, anene na anini, nĩmasembie moombana vamwe nũndũ vai mũndũ wasũanĩaa kana Yundithi nũtonya kũsyoka. Nĩmamũvingũĩie mũvĩa e na mũthũkũmi wake na mamathokya. Nĩmavuvie mwaki mone nthĩ na moombana mamathyũlũlũkĩte. 14Yundithi nĩwaneenie na wasya mũnene amea atĩĩ, “Nĩataĩwe Ngai, mũtaĩei! Nĩataĩwe Ngai ũla ũtaekaa kwĩw'ĩa andũ ma Ĩsilaeli tei. Ũtukũ ũũ nũndonyethisye kũmina amaitha maitũ!” 15Nĩvo ĩndĩ Yundithi waumisye ũla mũtwe mũvukonĩ na awony'a andũ ayasya atĩĩ, “Kwa sisyai, ũũ nĩ mũtwe wa Olovenesi mũnene wa asikalĩ ma Asuli. Ĩno nĩyo neti ĩla yĩĩanĩkĩtwe ĩũlũ wa ũkomo vala eĩkomete e mũmile. Mwĩai atũmĩie mũndũ mũka amũae. 16Nĩngwĩvĩta ĩsyĩtwanĩ ya Mwĩai Ngai ũla wĩ thayũ, kana Olovenesi ndanangiita; ũthyũ wakwa nĩw'o ũmũtumanisye na watuma akw'a. Ĩndĩ Olovenesi ndanambukya kana kũmbĩkĩĩthya nthoni. Mwĩai nũnzũvĩie maũndũnĩ asu onthe.”
17Andũ onthe nĩmaseng'ie mũno na makumana mathaitha Ngai. Nĩmaneenie vamwe masya atĩĩ, “Ngai waitũ nĩwaĩlĩte kũtaĩwa mũno. Ũmũnthĩ nĩwatuma tũsinda amaitha maitũ.”
18 #
Asi 5.24; Lk 1.28,42 Nĩvo ĩndĩ Usia waneenie asya atĩĩ, “We mwĩĩtu wakwa, Ngai Ũla wĩ Ĩũlũ Mũno nũkũathimĩte mbee wa aka onthe ĩũlũ wa nthĩ. Nĩataĩwe Mwĩai Ngai ũla woombie ĩtu na nthĩ, ũla ũkũtongoeisye ũtile mũtwe wa mũtongoi wa amaitha maitũ. 19Wĩkwatyo waku kũla kwĩ Ngai, ndũkola ngoonĩ sya andũ ala metavanasya ĩũlũ wa ũtonyi wa Ngai. 20Mwĩai Ngai nĩatume ũnengwa ndaĩa ĩvindanĩ yonthe yĩla yũkĩte, nũndũ wa ũndũ ũsu weeka. Nĩakũathime nũndũ ndũneeĩtĩkĩla kwenda thayũ waku ĩvindanĩ yĩla nthĩ yaitũ ĩnaĩ thĩnanĩ, ĩndĩ nũnaĩvanĩisye kwanangwa kwitũ kwa kwĩthĩwa wĩ mũĩkĩĩku kwa Ngai.”
Andũ onthe nĩmasũngĩie masya atĩĩ, “Ameni! Nĩkwĩthĩwe ũu!”
Mũvango wa Yundithi wa Kũsinda Asuli
Currently Selected:
Yund 13: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011