Yund 12
12
Yundithi Ayambĩĩa Kwĩanĩsya Mũvango wake
1Nĩvo ĩndĩ Olovenesi weeaĩie athũkũmi make maete Yundithi vala mĩio yake ya kũĩĩa ya silĩva yaiawa, na o ta ũu ameaĩa mamwiĩe Yundithi lĩu ũmwe wake mesanĩ na maimwĩkĩa ndivai ĩla wanyusaa. 2#Nda 1.8; Est-Kĩk C.28 Ĩndĩ Yundithi nĩwaisye atĩĩ, “Nditonya kũya lĩu ũũ nũndũ naya nĩĩthĩwa ndivĩtya. Nĩngũnengwa lĩu kuma syĩndũnĩ ila nĩnookie nguĩte.”
3Olovenesi nĩwamũkũlilye atĩĩ, “Naw'o lĩu ũsu waku wathela twĩkumĩsya ũngĩ ũilyĩ taw'o va? Vaa vai mũndũ kuma nthĩ yaku.”
4Yundithi nĩwamũsũngĩie amwĩa atĩĩ, “Mũnene wakwa o tondũ we wĩ thayũ, nĩngwĩvĩta kana ndiya lĩu ũla nĩ naw'o ũthele Mwĩai ataminĩte kwĩanĩsya kwĩsĩla vala nĩĩ maũndũ ala ũvangĩte kwĩka.”
5Nĩvo ĩndĩ athũkũmi ma Olovenesi matwaie Yundithi ĩeemanĩ na akoma nginya ũtukũ katĩ. Nĩwaamũkie kwakya tene mũno, 6na atũmana kũla kwĩ Olovenesi aĩtye atĩĩ, “Mũnene, ĩyĩae nyie mũthũkũmi waku nĩnengwe mwanya numaale ngavoye.” 7Olovenesi nĩweeaĩie asikalĩ ala mamũsungaa manenge Yundithi mwanya. Kwoou Yundithi ekalile ĩeemanĩ mĩthenya ĩtatũ, na kĩla ũtukũ nĩwaendaa mwandanĩ wa Mbethulia na aithambĩa kĩthimanĩ kĩla kyaĩ vala maeema mambĩtwe. 8Yundithi amina kũthamba, nĩwavoyaa Mwĩai Ngai wa Ĩsilaeli amũtongoesye mũvangonĩ wake wa kũtuma andũ ma Ĩsilaeli masinda. 9Nĩvo ĩndĩ Yundithi wasyokaa e mũtheu kwĩanana na mĩao ya ũthaithi, na ayĩkala ĩeemanĩ nginya ese kũya lĩu wake ĩa mawĩoo.
Mboka ĩla Olovenesi Waseũvisye.
10Mũthenyanĩ wa kana Yundithi e maeemanĩ ma Asuli, Olovenesi nĩwaseũvisye mboka ĩndĩ ndaathokya o na ũmwe wa anini make. Athũkũmi make nomo maĩ vo. 11Olovenesi nĩwaneenie na Mbangoasi, mũndũ waĩ mũvakũe na waũngamĩe maũndũ ma kĩ-nthĩnĩ make amwĩa atĩĩ, “Yu enda ũkesũve ũla mũndũ mũka Mũevelania ũũsũvĩa, oke vaa tũye na kũnyw'a nake. 12Wĩĩthĩwa wĩ ũndũ wĩ nthoni twaeka mũndũ mũka ta ũsu athi tũtamanyanĩte kĩ-mwĩĩ nake. Twalea kwĩka ũu nũkũtũthekeea.”
13Kwoou Mbangoasi nĩwaumie vala ve Olovenesi athi vala ve Yundithi na amwĩa atĩĩ, “We mwĩĩtu mwanake, mũnene wakwa ekũthokya ũthi ĩeemanĩ yake mũnyw'e ndivai na ũitana vamwe naitũ. Ũmũnthĩ wĩĩthĩwa ũilyĩ ta ũmwe wa aka ma Asuli ala mathũkũmaa nyũmbanĩ ya kĩ-ũsumbĩ ya Nevukatinesa. Ũũ nĩ ũndũ wa ndaĩa.”
14Yundithi nĩwasũngĩie asya atĩĩ, “Ndonya kũleela mũnene wakwa ata? Kwa w'o nĩngwĩka mĩtũkĩ ũndũ o na wĩva ũla ũmwendeeasya. Ũndũ ũsu wĩĩthĩwa ũtanu wakwa nginya yĩla ngakw'a.”
15Nĩvo ĩndĩ Yundithi wookĩlile na eeyanakavya na mawanake make ala maseo ma aka. Mũthũkũmi wake wa mũndũ mũka nĩwaendie na amwalanĩlya nthĩ ithuma sya tũtena twa malondu mbee wa Olovenesi, ila Mbangoasi wanengete Yundithi ekalĩlae aiya. 16Yundithi nĩwookie ĩeemanĩ na ekala nthĩ vo. Olovenesi nĩwamwĩw'ĩie mũmeo mũno, na eethĩwa na wendi mwingĩ wa kũmanyana kĩ-mwĩĩ nake. Ũu weethĩiwe nũndũ Olovenesi atwĩe eteelete kwĩsa kũkwata kamwanya ka kũkenga Yundithi kuma mũthenya ũla wamwonie ya mbee. 17Olovenesi nĩweeie Yundithi atĩĩ, “Ũka tũnyw'e na tũitana vamwe!”
18Yundithi nĩwamũsũngĩie amwĩa, “Mũnene wakwa, nĩngũnyw'a, nũndũ mũthenya ũũ kwakwa nĩ wa vata mũno mbee wa mĩthenya ĩla ĩngĩ kuma nasyawa.”
19Nĩvo ĩndĩ Yundithi woosie lĩu na kya ũnyw'a kĩla waseũvĩw'e nĩ mũthũkũmi wake, aya na anyw'a.
20Olovenesi nĩwendeeiw'e mũno nĩ Yundithi, nginya anyw'a ndivai mbingĩ mũno mbee wa ũndũ waanyw'a mũthenya o na ũmwe kuma asyawa.
Currently Selected:
Yund 12: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011