Yund 11
11
1Olovenesi nĩweeie Yundithi atĩĩ, “Mũndũ mũka, ĩthĩwa na ũkũmbaũ, na ndũkethĩwe na w'ĩa ngoonĩ yaku! Ndyaaĩka mũndũ o na wĩva naĩ ũla waanyuva kũthũkũma Nevukatinesa, mũsumbĩ wa nthĩ yonthe. 2O na yu, kethĩwa andũ maku ala mekalaa nthĩ yĩ iĩma mayaanuma, ndyĩthĩwa naaĩyĩaa mathi makavũwe. No mo ene meemanthĩie thĩna ũsu w'onthe. 3Yu ĩndĩ kwa ndavye wakĩa wauma kũla maĩ na wooka kũla tũĩ nĩkĩ? Ĩndĩ o na ũu wĩ o vo, wooka ũsũvĩonĩ. Ĩthĩwa na ũkũmbaũ. Ndwĩĩthĩwa mũisyonĩ ũtukũ ũũ, o na mĩthenyanĩ ĩla yũkĩte yonthe. 4Vai mũndũ wĩkwĩka ũndũ mũthũku. Vandũ va ũu, onthe mekwĩka nesa o ũndũ mekanaa na athũkũmi ma mũnene wakwa Mũsumbĩ Nevukatinesa.”
Yundithi Aielesya Olovenesi Mũvango wake.
5Nĩvo ĩndĩ Yundithi wasũngĩie Olovenesi amwĩa atĩĩ, “Mũnene wakwa, nenge mwanya nĩneene naku. Nĩngũkwĩsũva wĩthukĩĩsye ũndũ nyie mũthũkũmi waku mwĩĩtu ngũkwĩa. Ũtukũ ũũ nĩũtavya ũw'o mũthei. 6Waatĩĩa ũtao wakwa, Ngai nũkwĩanĩsya ũndũ kwĩsĩla vala ũĩ, na we mũnene wakwa, mũvango waku ndwĩlea kwĩanĩa. 7#Yel 27.6; Nda 2.38 Nĩngwĩvĩta ĩsyĩtwanĩ na ũtonyinĩ wa Nevukatinesa, mũsumbĩ wa nthĩ yonthe, ũla ũkũtũmĩte ũũngamĩe syũmbe syonthe kana o na ti andũ oka mamũthũkũmaa nũndũ waku, ĩndĩ o na indo na nyũnyi sya yayaya ikekala thayũ nũndũ wa ũtonyi waku, syĩ ungu wa Nevukatinesa na andũ ma mũsyĩ wake onthe. 8Nĩtũminĩte kwĩw'a ĩũlũ wa ũĩ na ũmanyi waku. Andũ onthe ĩũlũ wa nthĩ nĩmesĩ kana we nue mũndũ ũla mũseo vyũ ũsumbĩnĩ ũũ w'onthe; wĩsĩ maũndũ maingĩ na wĩ mũseo maũndũnĩ ma kũvanga kaũ. 9Yu ĩndĩ, nĩtũneewie maũndũ onthe ala Akĩoli ũnakũtavisye nzamanĩ yaku, nũndũ andũ ma Mbethulia nĩmanamũtangĩĩie, nake nũnatũtavisye maũndũ asu. 10Kwoou mũnene wakwa, ndũkavũthye ũndũ Akĩoli ũnakwĩie, nĩ ũndũ wa w'o na kwoou ndũkawose na ngũĩ. Vai mũndũ ũtonya kũsinda andũ maitũ ate o mavĩtĩsye Ngai woo.
11“Nĩ kana we mũnene wakwa ndũkasindwe na mũvango waku ndũkanangĩke, andũ ma Ĩsilaeli nĩmeũkw'a nũndũ ve naĩ ĩla ĩkilĩlye kũtuma Ngai woo athata mamĩka. 12Nũndũ vala maumasya lĩu vai kĩndũ na kĩw'ũ kĩkilĩlye kũthela, nĩmavangĩte kũaa indo syoo na maiya malĩu ala mĩao ya Ngai ĩmavatĩte kũya. 13#Kuma 23.19; Ali 27.30 Nĩmavangĩte kũya ũsyao wa mbee wa ngetha ya mbaa mbeke, kĩlungu kya ĩkũmi kya ndivai na mauta, ila nĩ ntheu na ivathĩtwe kwondũ wa athembi ala mathũkũmaa Ngai Yelũsalemu. Andũ ala angĩ onthe mayaĩlĩte kũya malĩu asu o na mayaĩlĩte kũmakiita. 14Nũndũ andũ ala me Yelũsalemu nĩmaminĩte kũtũla mwĩao ũsu, andũ ma ndũa yaitũ nĩmatũmĩte andũ nzamanĩ Yelũsalemu nĩ kana makakũlye mwanya o namo meke ũu. 15Andũ ma ndũa yaitũ mamina kũnengwa mwanya na maiya malĩu asu, mũthenyanĩ ũsu Ngai akatuma wĩthĩwa ũtonya kũmamina. 16Kwoou yĩla nyie nĩmanyie ũu oou, mũnene wakwa, nĩnĩkĩie nauma andũnĩ makwa. Ngai andũmĩte nũke kwĩka maũndũ nĩ naku ala metelemya andũ onthe ĩũlũ wa nthĩ mamew'a. 17Mũnene, nyie nĩ mũndũ mũka wĩ na kĩkĩo kya Ngai mũno. Nĩthaithaa Ngai wa ĩtu mũthenya na ũtukũ. Kwoou, nĩĩkala naku ĩeemanĩ na kĩla wĩoo ngaendaa mwandanĩ kũvoya Ngai, na akandavya andũ ma Ĩsilaeli meeka naĩ. 18Namina kũmanya, ngooka ngũtavye na ĩndĩ ũithi wĩ na nguthu yaku yonthe ya asikalĩ, na vai ũmwe woo eĩthĩwa atonya kũsindana naku. 19Nĩvo ĩndĩ nĩkũtongoesya kwĩsĩla nthĩ ya Yutia katĩ nginya tũvike Yelũsalemu vala nĩkũtw'ĩkĩthĩsya mũsumbĩ ndũanĩ katĩ. Ũkanyaĩĩkya andũ ma Yelũsalemu ta malondu mate na mũĩthi. O na vaikethĩwa ngitĩ ĩkũkoomea. Ngai nũmbuanĩisye maũndũ aa mbeenĩ na nũndũmĩte nũke ũkũtavya mo.”
Olovenesi Aikathĩĩa Yundithi
20Olovenesi na athũkũmi make onthe nĩmendeeiw'e nĩ maũndũ ala Yundithi wawetie, na maseng'wa nĩ ũĩ wake. Nĩmaneenanisye mayasya atĩĩ, 21“Ĩũlũ wa nthĩ vai mũndũ mũka ũngĩ wanakavĩte ta ũũ kana wĩ na ũĩ wa kũneena take!”
22Nĩvo ĩndĩ Olovenesi weeie Yundithi atĩĩ, “Ngai nĩweeka nesa ũkũtũma vala tũĩ, nĩ kana ũtume twĩthĩwa na vinya na tũimina ala maumangĩte mũsumbĩ wakwa Nevukatinesa. 23O vamwe na kwĩthĩwa wĩ mwanake, o ta ũu wĩ na ũĩ wa kũneena. Weeka ũu wasya, Ngai waku eĩthĩwa Ngai wakwa, ũkekalaa nyũmbanĩ ya kĩ-ũsumbĩ ya Mũsumbĩ Nevukatinesa, na ũitw'ĩka mũndũ wĩ nguma nthĩ yonthe.”
Currently Selected:
Yund 11: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011