Ĩsa 8

Ĩsyĩtwa ya Mwana wa Ĩsaia

1Mwĩai Ngai nĩwaneenie nakwa ambĩa atĩĩ, “Osa kĩndũ kĩnene kya kũandĩkĩa, na ũiandĩka ĩũlũ wakyo na ndeto ikũsomeka nesa atĩĩ, ‘Maeli-salali-asi-vasi.’ ”#8.1 Maeli-salali-asi-vasi: Ũalyũlo wa ndeto ii nĩ Tava mĩtũkĩ, osa kwa kĩthũlũmũko. 2Nĩnoosie andũ elĩ ma kũĩkĩĩka methĩwe ngũsĩ syakwa: Mũthembi Ulia na Nzekalia mwana wa Yevelekia.

3Ĩtina wa ũu nĩnamanyanie kĩ-mwĩĩ na mũka wakwa. Nĩwaitavie na asyaa kavĩsĩ. Nĩvo ĩndĩ Mwĩai Ngai wambĩie atĩĩ, “Ĩta kavĩsĩ kau, ‘Maeli-salali-asi-vasi,’ 4nĩkwĩthĩwa o na kavĩsĩ kau katanamba kũmanya kwĩtana, ‘Nau’ kana, ‘Mwaitũ,’ ũthwii wa Ndamasikũ na syĩndũ syonthe ila itavĩtwe Samalia ikakuwa nĩ mũsumbĩ wa Asuli.”

5Mwĩai Ngai nĩwaneenie nakwa ĩngĩ ambĩa atĩĩ, 6“Nĩkwĩthĩwa andũ aa ma Yuta nĩmaleete kĩw'ũ kya kalũsĩ ka Siloa kĩla kĩendaa mbola, na metetema nĩ w'ĩa nũndũ wa Mũsumbĩ Lesini na Mũsumbĩ Veka, 7vandũ va kĩw'ũ kĩu nyie Mwĩai nĩngũmaetee kĩw'ũ kingĩ kya Ũsĩ wa Euvalati kyusũĩte kĩkakĩla ngalĩko syonthe, kĩla nĩ mũsumbĩ wa Asuli na asikalĩ make onthe mamavithũkĩe. 8Kĩkalika nthĩ ya Yuta na vinya mũnene na kĩyusũa ũsĩ ũsu kĩkĩle kyambate kĩvike ngingonĩ sya andũ. Ngai akatambũũkya nthwau syake kĩla vandũ ĩũlũ wa nthĩ ĩsu nĩkwĩthĩwa Ngai e vamwe naitũ.”

9Inyw'ĩ andũ ma nthĩ ingĩ, ũmbanai vamwe mwĩ na w'ĩa;

inyw'ĩ nthĩ syĩ kũasa ĩthukĩĩsyei!

Ĩyũmbanĩsyei kaũ na mũyĩthĩwa na w'ĩa!

Ĩĩ, ĩyũmbanĩsyei kaũ na mũyĩthĩwa na w'ĩa!

10Sũanĩai vamwe, ĩndĩ ndeto syenyu ĩkatw'ĩka sya mana;

wetai mĩvango yenyu, ĩndĩ ndĩkeanĩa,

nĩkwĩthĩwa Ngai e vamwe naitũ.

Mwĩai Ngai Aikany'a Mwathani

11Mwĩai Ngai nĩwaneenie nakwa na ũtonyi wake mũnene, angany'a ndikaatĩĩe nzĩa sya andũ aa ayasya atĩĩ, 12#1Vet 3.14-15 “Ndũkekwatany'e namo mĩvangonĩ yoo mĩthũku, o na ndũkakĩe kĩla makĩaa kana wĩthĩwe na w'ĩa. 13No inyie Mwĩai Ngai Mwene Ũtonyi W'onthe waĩlĩte kũndala mũtheu, na ũingĩaa na kũtelemaw'a ninyie. 14#1Vet 2.8 Nũndũ wa ũtheu wakwa nĩilyĩ ta ĩvia ya kũtulya andũ. Nĩilyĩ ta kĩtei kya kũkwatya andũ ma Ĩsilaeli na ma Yuta, na kĩtei kwa ala matwĩe Yelũsalemu. 15Aingĩ moo makaluluutĩka; makavalũka na kũtũlĩka; makakwatw'a nĩ mũteo ũsu na maitavwa.”

Ũkany'o ĩũlũ wa Kũkũlya Maveva ma ala Akw'ũ Ũtao

16Ia ũkũsĩ ũsu na kwĩkalya ũmanyĩsyo ũsu katĩ wa amanyĩw'a makwa. 17#Aevl 2.13 Ngamweteela Mwĩai Ngai, ũla wĩvithĩte ndakoneke nĩ nzyawa sya Yakovo; ngamwĩkwatasya. 18#Aevl 2.13 Nyie vamwe na syana ila Mwĩai Ngai ũnengete, twĩ mawonany'o na moseng'yo kwa andũ ma Ĩsilaeli kuma kwa Mwĩai Ngai Mwene Ũtonyi W'onthe, ũla ũtũaa Kĩĩmanĩ kya Saioni.

19Yĩla andũ makamwĩa atĩĩ, “Kũlyai ũtao kuma kwa ala mamanyaa maũndũ kwĩsĩla mavevanĩ ma andũ ala makwie, na ala maaũasya, na maneenaa na mawasya mailyĩ ta ma nyũnyi, matekũmanyĩka nĩ mũndũ ũndũ mekwasya.” Nĩkũlya, vandũ va kwĩka ũu andũ mo matyaĩlĩte kwosa ũtao kuma kwa Ngai woo? O ĩngĩ nĩkũlya, andũ nĩmaĩlĩte kũkũlĩlya ala me thayũ ũtao kuma kwa ala akw'ũ? 20Kwa w'o ũla ũneenaa ũu ndanamba kwona kyeni. Ĩndĩ inyw'ĩ kwatai ũla ũkũsĩ na mĩao kuma kwa Ngai.

Ĩvinda ya Thĩna

21Andũ makanganga ĩũlũ wa nthĩ me na thĩna mwingĩ mũno na me na nzaa. Yĩla meĩthĩwa na nzaa makathata mũno na kũuma mũsumbĩ woo na Ngai woo. Makasisya ĩũlũ ĩtunĩ, 22na kũsisya nthĩ ĩndĩ makoona thĩna, kĩvindu na woo mwingĩ mũno. Makekw'a kĩvindunĩ kĩkamu.

Currently Selected:

Ĩsa 8: KAMBA

Highlight

Copy

Compare