Ĩsa 7

Ũtũmani wa Ĩsaia kwa Mũsumbĩ Aasu

1 # 2Asu 16.5; 2Mav 28.5-6 Ĩvindanĩ yĩla Aasu mwana wa Yothamu, mwĩsũkũũe wa Usia wasumbĩkĩte Yuta, Lesini mũsumbĩ wa Silia na Veka mwana wa Lemalia mũsumbĩ wa Ĩsilaeli nĩmaendie kũvithũkĩa Yelũsalemu, ĩndĩ maemwa nĩ kũmĩsinda. 2Yĩla mũsumbĩ wa Yuta wataviw'e kana Silia yĩna ngwatanĩo na Evalaimu, we vamwe na andũ ala angĩ ma Yuta nĩmakwatiwe nĩ w'ĩa, na matetema ta mĩtĩ ĩkũthingithangw'a nĩ kĩseve.

3Mwĩai Ngai nĩwaneenie na Ĩsaia amwĩa atĩĩ, “Enda wĩna mwana waku Sieali-yasuvu#7.3 Sieali-yasuvu: Ũalyũlo wa ĩsyĩtwa yĩĩ nĩ Ala makatiala makasyoka mũkakomane na Mũsumbĩ Aasu. Mwĩĩthĩa Aasu nzĩanĩ ya kũthi kwa Mũseũvya wa Ngũa, e vala mũtaũ ũla ũetete kĩw'ũ kuma ndianĩ ya ĩũlũ ũthelele. 4Neena nake ũmwĩe atĩĩ, ‘Ĩsũvĩe, usya na ndũkakĩe kana kũkw'a ngoo, nũndũ wa ũthatu mũnene wa Lesini mũsumbĩ wa Silia, na wa mwana wa Lemalia. Asu elĩ no ta syũki ya ngũ ikũvoa. 5Nĩkwĩthĩwa Silia na Evalaimu vamwe na mwana wa Lemalia nĩmakũseũvĩsye mũvango mũthũku makyasya atĩĩ: 6Nĩtũendei tũkavithũkĩe Yuta na tũimĩtelemya na kũmĩkwata ĩtw'ĩke yaitũ ene, na kũtw'ĩkĩthya mwana wa Taveeli mũsumbĩ wayo.’

7Kwoo nyie Mwĩai Ngai Mũsumbĩ nĩasya atĩĩ,

‘Ũndũ ũsu ndũkekĩka,

ndũkeanĩa nongi.

8Nĩkwĩthĩwa ndũa nene ya nthĩ ya Silia nĩ Ndamasikũ,

na Lesini nĩwe mũtongoi wa Ndamasikũ.

Myaka mĩongo thanthatũ na ĩtano ĩtanathela,

Evalaimu ĩkaanangwa vyũ wĩthĩe ndĩtwa mbaĩ ĩngĩ.

9Ndũa nene ya nthĩ ya Evalaimu nĩ Samalia,

na mũtongoi wa Samalia nĩ mwana wa Lemalia.

Mwalea kũĩkĩĩa,

kwa w'o mũikalũlũmĩĩlw'a.’ ”

Wathani wa Ĩsaia ĩũlũ wa Ĩmanueli.

10Mwĩai Ngai nĩwaneenie ĩngĩ na Aasu amwĩa atĩĩ, 11“Kũlya Mwĩai Ngai, Ngai waku akũnenge wonany'o; o na ethĩwa wĩuma ĩtheo kũla maveva ma ala akw'ũ mekalaa kana wĩuma ĩũlũ ĩtunĩ.”

12Ĩndĩ Aasu nĩwasũngĩie asya atĩĩ, “Ndikũlya wonany'o, na ndikwenda kũtata Mwĩai Ngai.”

13Ĩsaia nĩwasũngĩie amwĩa atĩĩ, “Ĩthukĩĩsyei ĩndĩ inyw'ĩ andũ ma ũsyao wa Ndeviti! Nĩkũlya, mũyaaĩanĩwa nĩ kũnosya andũ nĩ kana yu mũnosye Ngai wakwa o nake? 14#Mat 1.23 Kwoou Mwĩai akamũnenga wonany'o: Mwĩĩtu#7.14 Mwĩĩtu: Maandĩko amwe ma Ndeto ya Ngai maĩtye Mwĩĩtu ũtaamanyana kĩ-mwĩĩ na mũndũ-ũme. Sisya Mat 1.23 akaitava na aisyaa kavĩsĩ, nako ĩsyĩtwa yako akaketa Ĩmanueli.#7.14 Ĩmanueli: Ũalyũlo wa ĩsyĩtwa yĩĩ nĩ Ngai e vamwe naitũ 15Yĩla kana kau kakamanya kũlea ũla ũthũku na kũnyuva ũla ũseo, kakaĩsaa mauta ma ĩia na ũkĩ wa nzũkĩ. 16Nũndũ kana kau katanamba kũmanya kũlea kwĩka ũla ũthũku na kũnyuva ũla ũseo, nthĩ sya asumbĩ asu ũũkĩa ikatiwa ite mũndũ. 17Mwĩai Ngai akakũetee we vamwe na andũ maku na andũ onthe ma mũsyĩ wa kĩ-ũsumbĩ, mĩthenya yĩ thĩna mwingĩ mbee wa thĩna ũngĩ o na wĩva ũla waaĩthĩwa, kuma yĩla andũ ma Evalaimu mataanĩisye na ma Yuta; akamũetee mũsumbĩ wa Asuli.”

18Mũthenya ũsu, Mwĩai Ngai akauĩsya kĩlũli andũ ma nthĩ ya Misili moke ta ngi syumĩte tũlũsĩnĩ, na andũ ma Asuli mayũka kuma nthĩ yoo mailyĩ ta nzũkĩ. 19Makooka onthe na kusũa myandanĩ mĩliku, mĩvatĩnĩ ya mavia, na ikuthunĩ syĩ mĩw'a syonthe, na isesinĩ syonthe sya kũĩthĩsya indo.

20Mũthenya ũsu, Mwĩai Ngai akamwenza na kawembe ũvoyete mũingo wa Ũsĩ wa Euvalati, nako nĩ mũsumbĩ wa Asuli. Akamwenza nzw'ĩĩ, na nzw'ĩĩ ila ingĩ syĩ mĩĩnĩ yenyu, na o ta ũu ayenza ing'ew'a syenyu.

21Mũthenya ũsu, mũndũ akaĩthya moi ĩmwe na malondu elĩ, 22na nũndũ wa wingĩ wa ĩia yasyo akaĩsaa mauta ma ĩia. Andũ onthe ala makatiala nthĩ ĩno makaĩsaa mauta ma ĩia na ũkĩ wa nzũkĩ.

23Mũthenya ũsu, kĩla vandũ veethĩawa mĩsavivũ ngili ĩmwe, yĩna thooa wa mbesa sya silĩva ngili ĩmwe, vakamea mĩtae na mĩw'a. 24Andũ makaendaa kũsyĩma vo makuĩte maangi na ũta, nĩkwĩthĩwa nthĩ yonthe ĩkeethĩwa yusũĩte mĩtae na mĩw'a. 25Tũlĩma tw'onthe tũla twaĩmawa na maembe tũikethĩwa tũendeka nũndũ wa kũkĩa mĩtae na mĩw'a. Tũkatw'ĩka kũndũ kwa kũĩthĩsya ng'ombe na malondu.

Currently Selected:

Ĩsa 7: KAMBA

Highlight

Copy

Compare