Ĩsa 58
58
Kũtĩĩa Kũya kũla Kwaĩlĩte
1Mwĩai Ngai easya atĩĩ,
“Neena na wasya mũnene, ndũkalee kwĩka ũu;
neena na wasya mũnene ta wa soo!
Tavya andũ makwa mothũku moo,
tavya nzyawa sya Yakovo naĩ syoo.
2Manthaithaa kĩla mũthenya,
na nĩmendeeaw'a nĩ kũmanya nzĩa syakwa,
ta andũ ma nthĩ yĩkaa ũla ũlũngalu,
na meanĩasya mĩao ya Ngai woo.
Nĩmangũlasya numye ũtw'ĩo wa w'o,
na nĩmendaa mũno kũnthaitha nyie Ngai.”
3“Andũ mekũlya atĩĩ, ‘Yĩla twatĩĩa kũya Mwĩai Ngai aleaa kwona nĩkĩ?
Yĩla tweenyivya aleaa kũmanya nĩtweenyivya nĩkĩ?’
Ũw'o nĩ kana ĩvindanĩ yĩla mũtĩĩte kũya,
mwĩtanĩthasya inyw'ĩ ene na kũthĩny'a athũkũmi menyu onthe.
4Nĩmũtĩĩaa kũya, na o na mwĩkĩte ũu mũitetany'a na kũkita,
na mũikũnana ngundi sya ũthũku.
Mwatĩĩa kũya kwa nzĩa ĩsu,
ndiĩthukĩĩsya mboya syenyu nĩ ĩũlũ.
5Nĩkũlya, kũu nĩkw'o kũtĩĩa kũya kũla nyie nendete,
mũthenya wa mũndũ kwĩnyivya?
Mũkumanasya mĩtwe yenyu mũkekala ta ĩkangaa yinamĩte,
na mũikomea ngũa ngaamu sya makunia na kũkoma mũunĩ.
Nĩkũlya, kũu nĩkw'o mwĩtaa kũtĩĩa kũya,
mũthenya ũla nyie Mwĩai Ngai nĩtĩkĩlĩte?
6“Kũtĩĩa kũya kũla nendete nĩkw'o kũu:
Kũthasya ala movetwe mataĩlĩte kwovwa,
na kũthasya nyololo sya ala ove;
kũthasya ala mathĩnaw'a mathi,
na kũmina mathĩna ala andũ mathĩnasya angĩ namo.
7 #
Mat 25.34
Kũnenga ala me na nzaa lĩu,
na kũthokya nyũmba kwaku mũndũ ngya ũla ũte na vandũ va kwĩkala.
Kũnenga ngũa ala mate nasyo,
na o ta ũu ndũkalee kũtethya andũ ma mũsyĩ waku.
8Nĩvo ĩndĩ ũseo wakwa wĩmũtisĩa ta syũa yĩkyuma,
na mũivow'a mĩtũkĩ.
Meko menyu ma ũlũngalu makooneka,
nakwa nyie Mwĩai Ngai ngamũsũvĩa ngalĩko syonthe na ũkumyo wakwa.
9Nĩvo ĩndĩ mwĩmbĩkaĩla,
nakwa nyie Mwĩai Ngai ngĩmũsũngĩa;
mũkakaya mũnengwe ũtethyo, nakwa ndyasya: Nĩ vaa.
Ethĩwa mũkaeka kũthĩny'a andũ ala angĩ,
na kũeka kũtalĩla andũ ala angĩ mavĩtyo,
na kũmaneenea ndeto nthũku.
10Ethĩwa mũkanenga ala me na nzaa lĩu,
na kwĩanĩsya mavata ma ala mekũthĩna;
nĩvo ĩndĩ kyeni kyenyu kĩmulĩka kĩvindunĩ,
na ũtukũ wenyu ũyĩthĩwa na kyeni kingĩ ta mũthenya katĩ.
11Nyie Mwĩai Ngai ngamũtongoeasya kĩla ĩvinda,
na ngeanĩasya mavata menyu mwĩ nthĩ nyũmũ,
na kũtuma mĩĩ yenyu yĩthĩwa na vinya.
Mũkeethĩwa mũilyĩ mũũnda mũnyithye nesa,
na ta kĩthima kĩla kĩw'ũ kyakyo kĩtang'alaa.
12Andũ menyu makaaka ĩngĩ kũndũ kũla kwaomboangiwe tene,
mũkaaka ĩngĩ ĩũlũ wa myambĩlĩĩlyo ya tene mũno.
Mũkeetawa andũ ala makaa ĩngĩ kũndũ kũla kwaomboangiwe,
ala matũngĩĩaa nzĩa ila syĩ kũla andũ matũaa.
13“Ethĩwa mũkasũvĩa mũthenya wa Savato mũwĩkalye wĩ mũtheu,
na mũilea kwĩka maũndũ menyu ene mũthenyanĩ wakwa mũtheu,
na ethĩwa mũkeeta mũthenya wa Savato mũthenya wa kwendeesya,
na mũthenya mũtheu wa Mwĩai Ngai mũiwĩta mũthenya wa ndaĩa,
na ethĩwa mũkaũnenga ndaĩa kwa kũlea kũatĩĩa nzĩa syenyu ene,
na mũilea kwĩka ũndũ mũkwenda, kana kũneena ndeto sya mana,
14nĩvo ĩndĩ mwĩtana nthĩnĩ wa Mwĩai Ngai,
na ngatuma mũnengwa ndaĩa ĩũlũ wa nthĩ yonthe,
na mũkatanĩa nthĩ ĩla nanengie ũmae wenyu Yakovo yĩthĩwe ũtiĩwa wake.
Nĩasya ũu nyie Mwĩai Ngai.”
Currently Selected:
Ĩsa 58: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
