Ĩsa 59

Kumbũla Naĩ na Wovosyo

1Kwa w'o kw'oko kwa Mwĩai Ngai,

ti kũkuvĩ ũndũ kũtatonya kũtangĩĩa,

na matũ make ti malindĩku,

ũndũ matatonya kwĩw'a.

2Ĩndĩ mavĩtyo menyu nĩmamũtaanĩtye na Ngai wenyu,

naĩ syenyu nitumĩte ethyũũa kuma vala mũĩ, na akaeka kwĩw'a mboya syenyu.

3Nĩkwĩthĩwa nĩmwĩvukĩtye kwa kũaa andũ angĩ,

na mũkevukya kwa kwĩka maũndũ mathũku.

Nĩmũneenete ũvũngũ,

na mũkaneena ndeto nthũku.

4Vai mũndũ ũatĩĩaa ũsili wa katĩ,

na vai mũndũ ũsikataa ĩkoani yake aitũmĩa ũw'o;

mwĩkwatasya mawĩsũvano ma mana,

na kũneenaa ũvũngũ.

Mũseũvasya mĩvango mĩthũku,

na mũyĩka maũndũ mathũku.

5Maũndũ ala mũvangaa nĩ ta kwalĩkya matumbĩ ma kĩmbuva,

na nĩ ma mana ta kũtuma ngũa ya ũlũalũĩ wa mbũambũĩ.

Mũndũ o na wĩva ũla ũĩsaa matumbĩ asu menyu nũkusaa,

na ĩtumbĩ yĩmwe yooawa, nzoka ya kĩko nĩyalĩkaw'a.

6Ngũa syenyu sya ũlũalũĩ nĩ sya mana,

andũ maitonya kwĩkĩa ngũa ila mũtumaa.

Mwĩkaa maũndũ mathũku,

na mũyĩka meko ma ũng'endu.

7 # Alo 3.15-17 Nĩmũsembaa mũkeke ũthũku,

na kwĩkalaata mũkoae andũ mate na ĩvĩtyo.

Mosũanĩo menyu nĩ mathũku,

na kũla kw'onthe mũendaa mũtiaa mwaomboa na kwananga.

8Mũyĩkalaa mwĩ na mũuo na andũ ala angĩ,

na mũiatĩĩaa sila wa katĩ maũndũnĩ ala mwĩkaa.

Maũndũ ala mwĩkaa nĩ mathũku,

na vai mũndũ o na wĩva ũla ũmekaa ũkekala na mũuo.

Andũ Mayumbũla Naĩ Syoo

9Kwoou tũiatĩĩaa ũsili wa katĩ,

na tũyĩkaa maũndũ ala malũngalu;

tũmanthaa kyeni ĩndĩ tũkwataa kĩvindu,

twendaa kwĩsĩla vandũ ve kyeni,

ĩndĩ twĩsĩlaa kĩvindunĩ.

10Tũvavataa ũkũta ta ilalinda tũimantha nzĩa,

tũvavataa ta ala mate metho tũimantha nzĩa.

Tũluluutĩkaa mũthenya katĩ ta twĩ ũtukũ,

twĩthĩawa tũilyĩ ta andũ akw'ũ yĩla twĩ vala ve andũ me vinya.

11Ithyonthe tũlulumaa ta nyamũ mbai yĩtawa nduva,

na kũamba mũno ta mavũĩ.

Nĩtũmanthaa ũsili wa katĩ, ĩndĩ tũiũkwataa;

nĩtũmanthaa ũtangĩĩo,

ĩndĩ tũiwonaa.

12Nĩtwĩkĩte maũndũ maingĩ mathũku tũkaũvĩtĩsya,

na naĩ sitũ nikwonany'a ũthũku witũ.

Twĩkalaa twĩna mavĩtyo mavinda onthe,

na nĩtwĩsĩ mothũku maitũ.

13We Mwĩai Ngai nĩtũkũvĩtĩsye, na tũkaũlea;

we Ngai waitũ nĩtwĩthyũũĩte tũkaeka ũkũatĩĩa.

Tũvangaa kũthĩny'a andũ, na kũlea kũtongoew'a nue,

ngoonĩ sitũ nĩtũsũanĩaa ũvũngũ na kũũneena.

14Kwoou ũsili wa katĩ ndũatĩĩawa,

na andũ nĩmaekete kwĩthĩwa me alũngalu.

Andũ makomana maiatĩĩaa ũw'o,

na mayĩthĩawa me aĩkĩĩku.

15Ũw'o nĩwaĩte,

na ũla ũekaa kwĩka ũthũku nũthĩnaw'a.

Mwĩai Ngai nĩwoonie ũu,

na ũndũ ũsu wamwĩw'ĩthya woo nũndũ vayaĩ ũsili wa katĩ.

16 # Ĩsa 63.5 Nĩwoonie kana vayaĩ mũndũ weethĩnasya kwĩka ũndũ,

na aseng'a oona vate mũndũ ũkwenda kũtetheesya kwa ũndũ o na wĩva.

Kwoou kwa ũtonyi wake mwene nĩwamaeteie wovosyo,

aitũmĩa ũlũngalu wake.

17 # Aev 6.14,17; 1Ath 5.8 Nĩweekĩie ũlũngalu ta w'o ngao yake ya kĩthũi,

na eekĩa ũtonyi wake wa kũtangĩĩa ta w'o ngovia yake ya mũtwe ya kwĩsiĩĩa.

Nĩweekĩie kwĩyĩĩvanĩsya takw'o ngũa yake,

na eevw'ĩka ũthatu ta w'o suka wake.

18Akamaĩva kwĩanana na meko moo,

ũthatunĩ wake akamaĩvanĩsya amaitha make,

akamaĩvanĩsya ala matwĩe nthĩ ila syĩ ũtee wa ũkanga.

19Andũ kuma ũthũĩlonĩ wa syũa makanenga ĩsyĩtwa ya Mwĩai Ngai ndaĩa,

na kuma wumĩlonĩ wa syũa makataĩa ũkumyo wake,

nĩkwĩthĩwa akooka ta kĩw'ũ kingĩ kĩsembete,

kĩla kĩtwaawa nĩ kĩseve kya Mwĩai Ngai.

20 # Alo 11.26 “Nyie Mwĩai Ngai nĩasya Mwovosya akooka Saioni,

akookĩa nzyawa sya Yakovo ila syĩumbũla naĩ syoo.

21“Nyie Mwĩai Ngai nĩasya kana ũũ nĩw'o ũtianĩo wakwa nĩ namo: Veva wakwa ũkekalaa nthĩnĩ wenyu, na ũmanyĩsyo wakwa ũla namũnengie. Mũikaaeke kũmanyĩsya syana syenyu, nasyo iikaalee kũmanyĩsya esũkũũe menyu, kuma yu na kũvika tene na tene. Nĩasya ũu nyie Mwĩai Ngai.”

Currently Selected:

Ĩsa 59: KAMBA

Highlight

Copy

Compare