Ĩsa 57
57
Ũkany'o ĩũlũ wa Ũthaithi wa Ngai sya Mĩvw'anano
1Andũ alũngalu nĩmakusaa,
ĩndĩ vai mũndũ ũsũanĩaa ĩũlũ wa ũndũ ũsu.
Andũ aseo makw'a,
vai mũndũ ũmanyaa makw'a nĩkĩ.
Andũ alũngalu makusaa nĩ kana maikakwatwe nĩ ũthũku ũla wũkĩte;
2malikaa mũuonĩ.
Andũ ala mekaa ũla ũlũngalu,
makw'a makwataa ũthũmũo.
3Ĩndĩ inyw'ĩ thengeeai vaa,
inyw'ĩ syana sya aoi,
nzyawa sya ilaalai na malwaya!
4Mwĩthaũka naũ,
na nũũ ũla mũũvũthya na kũkomba?
Inyw'ĩ mwĩ ũsyao wa andũ ang'endu,
syana sya akengani.
5Inyw'ĩ mũthaithaa mĩvw'anano kwa kũmanyanĩa kĩ-mwĩĩ mĩtĩnĩ mĩtheu,
na ungu wa kĩla mũtĩ wĩ matũ maingĩ;
mũthembeaa syana syenyu myandanĩ,
na ungu wa mĩvatĩ ya mavia.
6Mũnyuvaa mavia ala matendeu kuma myandanĩ ĩsu,
na kũmathaitha ta mo ngai syenyu;
Mũithembeaa nthembo ya kũnyuwa ya ndivai,
na kũsyumĩsya nthembo ya ngetha ya mbaa mbeke.
Mwĩsũanĩa kana mũkandanĩthya na maũndũ asu onthe?
7Mũseũvĩtye ũkomo wenyu kĩĩmanĩ kĩnene na kĩtũlu;
vau nĩvo mwambataa mũkathembe nthembo syenyu.
8Mũũngamĩtye mĩvw'anano ya ngai syenyu,
ĩtina wa mĩomo na ituĩnĩ sya mĩomo yenyu.
Inyw'ĩ nĩmũndiaa,
na mũyumya ngũa syenyu na kũlĩsa itandanĩ syenyu nene mwĩ na ala mwendete.
Nĩmwĩw'anaa thooa nĩ kana mũmanyane kĩ-mwĩĩ namo,
na mũyĩanĩsya mawendi ma mĩĩ yenyu.
9Mwĩvakaa mauta na syĩndũ syenyu inyungaa nesa,
na mũithi kũthaitha ngai ĩla yĩtawa Moleki.
Nĩmũtũmaa andũ kũndũ kũasa mũno,
o na nĩmũmatũmaa kũla maveva ma ala akw'ũ mekalaa.
10Nĩmwanoiw'e nĩ syalo mbingĩ ila mwaendaa,
ĩndĩ mũyaĩ mũneena mũkasya atĩĩ, “Ũũ no wĩa wa mana.”
Nĩmwakwatie vinya mweũ,
na kwoou mũyaathela vinya.
11Nũũ ũla wamũtelemilye na mwakĩa,
na atuma mũkengana na kũlwa ninyie,
na mwalea kũsũanĩa ĩũlũ wakwa o na vanini?
Nĩkũlya, mwĩlea kũnenga ndaĩa,
nĩkwĩthĩwa nĩnavindisye vandũ va ĩvinda ĩasa?
12Nĩngumĩlya maũndũ asu mwĩkaa,
mũisũanĩa kana nĩ malũngalu;
maũndũ asu maimũtethya.
13Yĩla mwĩkaya mũtetheew'e,
ngai syenyu mbingĩ sya mũvw'anano syĩmũtangĩĩa!
Syonthe ikakuwa nĩ kĩseve,
ikavutũkw'a nĩ mĩthũmũ ivetwe.
Ĩndĩ mũndũ ũla ũmbĩkwatasya akatiĩwa nthĩ,
na kũmesya kĩĩma kyakwa kĩtheu.
Ngai Ayathana Kũtethya na Kũvosya Andũ make
14Mwĩai Ngai easya atĩĩ,
“Akai, akai, seũvyai nzĩa!
Vetangai isiĩĩi ila syĩ nzĩanĩ ya andũ makwa.”
15Ngai ũla wĩ ĩũlũ na mũnene, ũla wĩkalaa tene na tene, ũla ĩsyĩtwa yake nĩ Mũtheu easya atĩĩ,
“Nyie nĩkalaa vandũ vatũlu na vatheu,
na o ta ũu nĩkalaa na ala me na thayũ wa kwĩlila na wĩnyivyo,
nĩ kana nĩkĩe vinya ala menyivasya na melilaa.
16Ndikatalĩla andũ mavĩtyo tene na tene,
kana kũmathatĩa kĩla ĩvinda,
nĩkwĩthĩwa neeka ũu mũndũ akathela vinya,
mũndũ ũla noombie na namũnenga thayũ.
17Nĩnathatiw'e nĩ ũthũku wa ĩtomo yake;
nĩnamũkanisye na namũtia nĩ mũthatu,
ĩndĩ nĩwaendeeie kwĩka wendi wa ngoo yake.
18Nĩnonete maũndũ ala wĩkĩte ĩndĩ nĩngũmũvosya;
nĩngũmũtongoesya na kũmũnenga ũkiakisyo.
19 #
Aev 2.17
Nĩngũtuma andũ ma Ĩsilaeli ala me na kyeva maina mbathi sya kũtaĩa,
mũuo wĩthĩwe kwa ala me vaasa na ala me vakuvĩ, na ngamavosya.
Nĩasya ũu nyie Mwĩai Ngai.
20Ĩndĩ ala athũku mailyĩ ta ũkanga wĩ na itulumo;
ũkanga ũla ũtesaa kũusya,
itulumo syaw'o ietae ndaka na kĩko.”
21 #
Ĩsa 48.22
Ngai wakwa easya atĩĩ,
“Andũ athũku mayĩthĩawa na mũuo.”
Currently Selected:
Ĩsa 57: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
