Ĩsa 42
42
Mũthũkũmi wa Mwĩai Ngai
1 #
Mat 3.17; 17.5; Mk 1.11; Lk 3.22; 9.35 #Mat 12.18-21 Mwĩai Ngai easya atĩĩ,
“Ũũ nĩwe mũthũkũmi wakwa, ũla nĩũngamĩtye;
ũla nĩnyuvĩte na nendeeaw'a nĩwe.
Nĩnĩkĩĩte Veva wakwa nthĩnĩ wake,
na akaete ũsili wa katĩ kwa andũ ma mbaĩ ingĩ.
2Ndakaĩa, o na ndakokĩlya wasya wake;
kana atume wasya wake wĩw'ĩka nzĩanĩ.
3Ndakatũla mũangi mwatũkangu,
kana avosye ũtambi ũkilĩlye kũvoa.
Kwa ũĩkĩĩku akaete sila wa katĩ.
4Ndakasya wĩkwatyo kana akw'e ngoo,
nginya aete sila wa katĩ ĩũlũ wa nthĩ.
Nthĩ ila syĩ ũtee wa ũkanga syeteelete mwĩao wake.”
5 #
Meko 17.24-25
Ũũ nĩw'o Mwĩai Ngai ũkwasya,
ũla woombie matu na amatambũũkya,
ũla woombie nthĩ na syĩndũ syonthe ila syumaa vo,
ũla ũnengae andũ ala matũaa vo mĩthũmũ,
na kũtuma onthe methĩwa na thayũ.
6 #
Ĩsa 49.6; Lk 2.32; Meko 13.47; 26.23 “Nyie Mwĩai Ngai nĩngwĩtĩte wĩkae ũla ũlũngalu,
nĩngũkwatĩte na kw'oko kwakwa na ngakũsũvĩa.
Kwĩsĩla vala ũĩ ngaseũvya ũtianĩo na andũ onthe,
na ũkatw'ĩka kyeni kwa andũ ma mbaĩ ingĩ,
7nĩ kana ũvingũe metho ma ilalinda,
ũthasye ala ove maume yela,
na ũyumya ala mekalaa kĩvindunĩ movetwe yela.
8“Ninyie Mwĩai Ngai; yĩu nĩyo ĩsyĩtwa yakwa;
vai ũngĩ waĩlĩte kũnengwa ũkumyo wakwa;
ngai sya mĩvw'anano iitonya kũtaĩwa takwa.
9Maũndũ ala nathanie vau mbeenĩ nĩmekĩkĩte,
nayu nĩweta maũndũ meũ;
nĩmũtavya maũndũ asu matanamba kwĩkĩka.”
Wathi wa Kũtaĩa Mwĩai Ngai
10Inĩai Mwĩai Ngai wathi mweũ,
nthĩ yonthe nĩmũtaĩe.
Inyw'onthe ala mwĩsĩlaa ũkanganĩ mũtaĩei,
Inyw'ĩ syũmbe syonthe sya ũkanganĩ mũtaĩei!
Mũtaĩei inyw'ĩ nthĩ ila syĩ ũtee wa ũkanga,
na onthe ala matũaa vo!
11Weũ na ndũa syaw'o nitaĩe Ngai,
andũ ma ndũa ya Ketali nĩmamũtaĩe.
Andũ ma ndũa ya Sela nĩmaine na ũtanu,
nĩmokĩlye wasya me iĩmanĩ ĩũlũ.
12Andũ ala mekalaa nthĩ ila syĩ ũtee wa ũkanga,
nĩmataĩe Mwĩai Ngai, na kũtavany'a ũkumyo wake.
13Mwĩai Ngai nĩwumaalĩte ta ngũmbaũ,
ta mũsikalĩ wĩ vinya nĩwĩyũmbanĩtye kũkita.
Nũkũkĩlya wasya mũnene wa kaũ,
na nũkũsinda amaitha make.
Ngai Ayathana Kũtetheesya Andũ make
14Mwĩai Ngai easya atĩĩ,
“Nĩnĩvindĩtye ĩvinda ĩasa,
nĩnĩkilĩtye na ngekala ndeũneena ũndũ,
ĩndĩ yu nĩngũkaya ta kĩveti kĩ kwaũnya,
Nĩngũvevaveva na kũvevũũka.
15Nĩngwananga iĩma na tũlĩma,
na kũtuma mĩmea yonthe ĩla yĩkw'o yũma;
nĩngũtuma mbũsĩ itw'ĩka ithama,
na kũtuma ndia ing'ala.
16Ngatongoesya ilalinda ithi na nzĩa itesĩ,
ngaitongoesya syĩsĩle nzĩanĩ itaaĩsĩla.
Ngatuma kĩvindu kĩla kĩ mbee woo kĩtw'ĩka kyeni,
na kũlũngalya kũla kũthyoeku.
Asu nĩmo maũndũ ala ngeka,
na ndikalea kũmeka.
17Ĩndĩ ala mekwatasya ngai sya mĩvw'anano,
ala maitavasya atĩĩ, ‘Ninyw'ĩ ngai sitũ,’
makalewa na kũsonokw'a mũno.”
Kũlea Kũmanya kwa Andũ ma Ĩsilaeli
18Mwĩai Ngai easya atĩĩ,
“Ĩthukĩĩsyei, inyw'ĩ mũtew'aa,
sisyai, inyw'ĩ ilalinda na mũyona!
19Nũũ ũla kĩlalinda ate o mũthũkũmi wakwa,
na ũtew'aa ta mũndũ ũla natũmie?
Nũũ ũla kĩlalinda ta ũla wĩnenganĩte kũla nĩĩ,
kana kĩlalinda ta mũthũkũmi wa Mwĩai Ngai?
20Nĩmwonete maũndũ maingĩ, ĩndĩ vai kĩndũ mũmanyaa;
nĩmũvingũĩte matũ menyu, ĩndĩ vai kĩndũ mwĩw'aa.”
21Nũndũ Mwĩai Ngai nĩ mũlũngalu,
nĩwendeeiw'e nĩ kũtuma mwĩao wake ũtaĩawa na kũkumw'a.
22Ĩndĩ aa nĩ andũ atavĩe na makoyĩwa,
onthe malikĩtw'e maimanĩ,
na makavithwa yela.
Matw'ĩkĩte mũtavo vate mũndũ wa kũmatangĩĩa;
nĩmakwatĩtwe makakuwa vate mũndũ ũneena akasya, “Matũngei.”
23Nũũ katĩ wenyu ũkwĩthukĩĩsya maũndũ aa?
Nũũ ũla ũkũmew'a na kũmethukĩĩsya kwondũ wa ĩvinda yũkĩte?
24Nũũ ũla wanenganie andũ ma Ĩsilaeli matavwe?
Nũũ ũla wamanenganie ũtonyinĩ wa ing'ei?
Nĩ Mwĩai Ngai mwene ũla mavĩtĩisye!
Nĩkwĩthĩwa mayaatĩĩa nzĩa syake,
na mayaaĩanĩsya mĩao yake.
25Kwoou nĩwamonoeisye ũthatu wake mwingĩ,
na mokita kaũ mwingĩ.
Ũthatu ũsu nĩwatumie andũ ma Ĩsilaeli onthe mathĩna mũno,
ĩndĩ mayaamanya kĩla kyaendee;
mayaaĩmanyĩsya kĩndũ o na kĩmwe kuma thĩnanĩ ũsu.
Currently Selected:
Ĩsa 42: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
