Ĩsa 41
41
Ngai Ayathana Kũtetheesya Ĩsilaeli
1Ngai easya atĩĩ,
“Inyw'ĩ ala mũtũaa nthĩ syĩ ũtee wa ũkanga vindyai na mũimbĩthukĩĩsya,
andũ ma mbaĩ nĩmausũwe nĩ vinya mweũ!
Nĩmoke mbee na kũneena,
nĩtũmbane vamwe kĩsilĩlonĩ.
2“Nũũ waetie mũsindi kuma ngalĩko ya wumĩlonĩ wa syũa,
ũla ũsindaa kĩla vandũ wathi?
Nĩ ũla ũnenganae mbaĩ sya andũ ũtonyinĩ wa mũsindi ũsu,
nũsindaa asumbĩ na ũtonyi wake.
Mũsindi ũsu nũmatw'ĩkĩthasya ta kĩtoo kwa kũmatemanga na ũvyũ wake,
na nũtumaa methĩwa mailyĩ ta mavuti maũlũkĩtw'e nĩ kĩseve.
3Nũmaatĩĩaa na aithi vate mũisyo,
aendaa na nzĩa ũtaaĩsĩla ĩngĩ.
4“Ũla watumie maũndũ aa onthe mekĩka nũũ?
Nũũ ũla waseũvisye ĩvinda yĩla kĩla ũndũ waĩlĩte kwĩkĩka?
Nyie Mwĩai Ngai nĩthĩĩtwe vo kuma mwambĩlĩĩlyonĩ,
na ngeethĩwa vo kũvika mũminũkĩlyonĩ.
5“Andũ ma nthĩ ila syĩ ũtee wa ũkanga nĩmonete maũndũ ala nĩkĩte na makakĩa,
andũ ma kũla nthĩ ĩthelele nĩmekũtetema nĩ w'ĩa,
andũ onthe nĩmombanĩte makoka.
6Kĩla mũndũ nũtetheeasya mũtũi wake,
na kwĩa mwana-a-ĩthe atĩĩ, ‘Ĩthĩwa na vinya!’
7Mũndũ ũla ũseũvasya syĩndũ sya mbwaũ,
nũthangaasya mũtwii wa thaavu,
na ũla ũtendeasya mũvw'anano na kĩiva,
nũthangaasya ũla ũmĩathĩaa akamĩkwatany'a.
Maneenaa ĩũlũ wa ũndũ ũkwatanĩtw'e makasya atĩĩ,
‘Ũkwatanĩtw'e nesa mũno.’
Makwatanasya ngai ĩsu ya mũvw'anano na mĩsumaa ũkethĩa ndĩvalũka.
8 #
2Mav 20.7; Yak 2.23 “Ĩndĩ we Ĩsilaeli mũthũkũmi wakwa,
Yakovo ũla nanyuvie,
we nzyawa ya Avalaamu mũnyanyawa,
9nakumisye kũla nthĩ ĩthelele,
nakwĩtie kuma isionĩ syayo ila syĩ kũasa vyũ.
Nĩnakwĩie atĩĩ, ‘Wĩ mũthũkũmi wakwa.’
Nĩnakũnyuvie, na ndyaakũlea.
10Kwoou ndũkakĩe, nũndũ nĩ vamwe naku;
ndũkethĩwe na kyeva, nũndũ ninyie Ngai waku.
Ngakwĩkĩa vinya na ngakũtetheesya;
ngakũsũvĩa na kw'oko kwakwa kwĩ vinya kwa ũlũngalu.
11“Andũ onthe ala makũmenaa,
makakwatwa nĩ nthoni na kũsonoka;
onthe ala mokitaa naku,
makatw'ĩka vathei na maikw'a.
12Ũkamantha amaitha maku,
ĩndĩ ndũkamona.
Ala mokitaa naku,
makatw'ĩka vathei vyũ.
13Ninyie Mwĩai Ngai, Ngai waku,
ũla ũkũnengae vinya na kũkwĩa, ‘Ndũkakĩe, ngakũtetheesya.’ ”
14Mwĩai Ngai easya atĩĩ,
“Ndũkakĩe we Yakovo,
we ũla mũnini na ũte na vinya.
Nũndũ nyie mwene ngakũtetheesya.
Nĩasya ũu nyie Mwĩai Ngai Mwovosya waku, nyie Ũla Mũtheu wa Ĩsilaeli.
15Nĩngũũtw'ĩkĩthya kĩvũi kyeũ kya ngetha,
kyũĩ na kĩ na maeo.
Ũkavũa iĩma na kũsyananga,
ũkaomboanga tũlĩma tũtw'ĩke kĩtoo.
16Ũkaiũlũkya na kĩseve kĩkaikua,
na kĩuutani kĩkainyaĩĩkĩsya kĩla vandũ.
Ĩndĩ ũkatana nũndũ wakwa nyie Mwĩai Ngai,
na kũndaĩa nyie Ũla Mũtheu wa Ĩsilaeli.
17“Yĩla ngya na athĩni memantha kĩw'ũ na mailea ũkĩkwata,
na nĩmĩ syoo iinyaw'a nĩ waũni,
nyie Mwĩai Ngai ngasũngĩa mboya syoo,
nyie Ngai wa Ĩsilaeli ndikamatia.
18Ngatuma mbũsĩ syĩsĩla iĩmanĩ ite kĩndũ,
na nthongo sya kĩw'ũ iyuma myandanĩ katĩ.
Ngatw'ĩkĩthya weũ ndia sya kĩw'ũ,
na nthĩ nyũmũ mbuluti sya kĩw'ũ.
19Ngatuma weũnĩ kũmea mĩtĩ ya mĩkũũ,
mĩea, mĩtĩ yĩ matũ mathungu na mĩtĩ ya mĩthata.
Ngatuma nthĩ nyũmũ ĩmea mĩtĩ ya mĩtalakwe,
mĩlavuti na ĩngĩ yĩtawa mĩtindali.
20Andũ makoona maũndũ asu na kũmanya,
makasũanĩa na kwĩmanyĩsya,
kana nyie Mwĩai Ngai ninyie nĩkĩte ũu kwa ũtonyi wakwa,
na kana nyie Ũla Mũtheu wa Ĩsilaeli ninyie nĩtumĩte maũndũ asu mekĩka.”
Mwĩai Ngai Aivũthya Ngai sya Ũvũngũ
21Mwĩai Ngai Mũsumbĩ wa Ĩsilaeli easya atĩĩ,
“Inyw'ĩ ngai sya andũ ma nthĩ ingĩ etei ndeto syenyu,
wetai maũndũ menyu ala mwĩ namo!
22Ũkai vaa mũtũtavye maũndũ ala meĩkĩka,
nĩ kana tũmamanye mamina kwĩkĩka.
Tũtavyei maũndũ ala meekĩkie tene,
nĩ kana tũmasũanĩe na tũimanya mũminũkĩlyo wamo,
kana mũtũtavye maũndũ ala meũka.
23Tũtavyei ũndũ ĩvinda yĩla yũkĩte yĩkethĩwa yĩilyĩ,
nĩ kana tũmanye kana inyw'ĩ mwĩ ngai.
Ĩkai o ũndũ mũseo kana mũthũku,
nĩ kana tũsaanĩw'e na tũikwatwa nĩ w'ĩa.
24Ĩndĩ inyw'ĩ mwĩ vathei vyũ,
na mawĩa menyu nĩ ma mana;
ala mamũnyuvaa mamũthaithe nĩmanthatasya!
25“Nĩnĩnyuvĩte ũmwe kuma ngalĩko ya ĩũlũ na nũminĩte kũka,
ũmwe ũla wĩkalaa ngalĩko ya wumĩlonĩ wa syũa na wĩkaĩlaa ĩsyĩtwa yakwa;
akakinyanga asumbĩ ta ũkũkinyanga ndaka,
akamakinyanga o tondũ mũmbi wa mbisũ ũkinyangaa yũmba.
26Ũla wathanie maũndũ asu kuma mwambĩlĩĩlyonĩ nũũ, nĩ kana tũmanye,
kana athana mbee wa matanekĩka, nĩ kana tũneene twasye, ‘Nĩweesĩ’?
Vai ũmwe waaneena ũu,
vai ũmwe waathana ũu,
vai ũmwe waaĩw'a ndeto syenyu.
27Ninyie naĩ wa mbee kwĩa Saioni atĩĩ, ‘Sisya, nĩ aa nĩmokĩte!’
Nĩnatũmĩie Yelũsalemu mũtũmwa wa ũvoo mũseo.
28Ĩndĩ nasisya ngai isu syonthe,
vai ĩmwe yasyo ĩtonya kũnengane ũtao,
vai ĩmwe ĩtonya kũsũngĩa nakũlya ĩkũlyo.
29Mĩvw'anano ĩsu nĩ ya ũvũngũ!
Mawĩa mayo nĩ ma mana;
mĩvw'anano ĩsu nĩ ũndũ ũmwe na kĩseve kya mana.”
Currently Selected:
Ĩsa 41: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
