Ĩsa 38

Kũwaa kwa Esekia na Kũvow'a Kwake

(2Mav 32.24-26; 2Asu 20.1-11)

1Ĩvindanĩ yĩu Mũsumbĩ Esekia nĩwawaie mũno weethĩa akilĩlye kũkw'a. Mwathani Ĩsaia mwana wa Amosu nĩwaendie kũmwona na amwĩa, “Mwĩai Ngai ekwĩa atĩĩ, ‘Ĩyĩae ĩũlũ wa mũsyĩ waku, nũndũ nũũkw'a; ndwĩvoa.’ ” 2Nĩvo ĩndĩ Esekia weethyũũie asisya ũkũtanĩ na amũvoya Mwĩai Ngai 3ayasya, “Ame Mwĩai Ngai, nĩngũkwĩsũva ũlilikane ũndũ nĩthĩĩtwe nĩ mũĩkĩĩku kwaku, na ũndũ nĩnenganĩte kwaku na thayũ wakwa w'onthe na kwĩka maũndũ ala makwendeeasya.” Esekia nĩwaĩie kĩĩo kĩ woo.

4Nĩvo ĩndĩ Mwĩai Ngai waneenie na Ĩsaia amwĩa atĩĩ, 5“Syoka ũkaneene na Esekia mũtongoi wa andũ makwa ũmwĩe atĩĩ, ‘Nyie Mwĩai Ngai, Ngai wa Ndeviti ũmae waku, nĩneew'a mboya yaku na noona methoi maku, kwoou nĩngũkwongela myaka ĩkũmi na ĩtano. 6Nĩngũũtangĩĩa vamwe na ndũa ĩno ya Yelũsalemu kuma ũtonyinĩ wa mũsumbĩ wa Asuli, na nĩngũsũvĩa ndũa ĩno.’

7“Ũũ nĩw'o wonany'o ũla nyie Mwĩai Ngai ngũũnenga, nonany'e kana nĩngwĩanĩsya watho wakwa: 8Nĩngũtuma muunyĩ ũsyoka ĩtina matambya ĩkũmi ngasinĩ ĩla yaseũviw'e nĩ Mũsumbĩ Aasu.” Kwoou syũa nĩyasyokie ĩtina matambya ĩkũmi ma ngasi ala yaĩ yĩnatheea.

9Esekia amina kũvow'a ũwau wake nĩwaandĩkie ndeto ii:

10Nĩnaneenie nasya, “Ĩvindanĩ yĩla nĩendee nesa thayũnĩ wakwa no nginya nĩkw'e,

nĩvangĩwe ngalike vala maveva ma ala akw'ũ mekalaa,

ngekale vo myakanĩ yakwa ĩla ĩtialĩte.”

11Nĩnaneenie nasya atĩĩ,

“Ndikamwona Mwĩai Ngai ĩngĩ nĩ nthĩ ya ala me thayũ;

o na ndikasyoka kwona mũndũ ĩngĩ,

katĩ wa ala mekalaa kũũ ĩũlũ wa nthĩ.

12O tondũ mũĩthi ũkũaa ĩeema yake na kũyĩthamya,

thayũ wakwa nũvetangĩtwe vala nĩĩ.

O tondũ mũtumi ũkũnzaa ngũa, thayũ wakwa nũkũnzĩtwe;

Ngai nũtilĩte thayũ wakwa o tondũ ngũa ĩtilawa kuma kĩtuminĩ;

mũthenya na ũtukũ, we Ngai nũmbikasya mũthya wa thayũ wakwa.

13Nĩĩaa ũtukũ w'onthe ngĩtya ũtethyo;

Ngai andũlangĩte mavĩndĩ makwa o tondũ mũnyambũ ũtũlangaa,

mũthenya na ũtukũ, we Ngai nũmbikasya mũthya wa thayũ wakwa.

14“Nĩnyiilaa ta mũthoonzwe kana ta kanyange,

nĩng'ulasya ta ĩvũĩ.

Metho makwa nĩmanoete nĩ kũsisya ĩtunĩ.

Ame Mwĩai, ũka ũndethye nũndũ nĩngũnyamaw'a!

15Ĩndĩ yu ndonya kwasya ata?

Ngai nũneenete nakwa, na we mwene nĩwe wĩkĩte ũu.

Ngaendaa nĩnyivĩtye thayũnĩ wakwa w'onthe,

nũndũ wa woo wa thayũ wakwa.

16“Ame Mwĩai, andũ methĩawa thayũ kwondũ wa maũndũ aa,

na nthĩnĩ wamo o na veva wakwa nĩwĩthĩawa thayũ.

Nĩngũkwĩsũva ũmbosye na ũinenge kwĩkala thayũ!

17Nĩw'o, thĩna mũnene ũla naĩ naw'o waĩ wa kũndetee ũseo,

ĩndĩ nũndũ nũmbendete nũndangĩĩte kuma ĩimanĩ ya wanangĩko,

nũvetete naĩ syakwa ũkaeka kũsyona.

18Vala maveva ma ala akw'ũ mekalaa vaitonya ũkũtũngĩa mũvea,

kĩkw'ũ kĩitonya ũkũtaĩa;

ala matheeaa mbũanĩ maitonya kwĩkwatya kwona ũĩkĩĩku waku.

19Ala me thayũ nĩmo makũtũngĩaa mũvea o tondũ ngwĩka ũmũnthĩ;

asyai nĩmatavasya syana syoo ũĩkĩĩku waku.

20Mwĩai Ngai akandangĩĩa,

na tũkaina na syĩndũ sya kũinga syĩ mĩkunzu;

mĩthenya yonthe ya thayũ witũ,

tũkainaa twĩ Ĩkalũnĩ ya Mwĩai Ngai.”

21Ĩsaia aĩ aneea athũkũmi ma mũsumbĩ mekĩe matunda ma makũyũ mathie mũimũnĩ wa Mũsumbĩ Esekia nĩ kana avoe. 22Nake Esekia aĩ anakũlya Ĩsaia atĩĩ, “Wonany'o wa kana ngathi Ĩkalũnĩ ya Mwĩai Ngai nĩ mwaũ?”

Currently Selected:

Ĩsa 38: KAMBA

Highlight

Copy

Compare