Ĩsa 37

Mũsumbĩ Esekia Aikũlya Mwathani Ĩsaia Ũtao

(2Asu 19.1-7; 2Mav 32.20-23)

1Yĩla Mũsumbĩ Esekia wataviw'e ndeto ila mũsumbĩ wa Asuli waneenie, nĩwatembũangie ngũa syake nĩ woo, eekĩa ngũa ngaamu sya makunia na athi Ĩkalũnĩ ya Mwĩai Ngai. 2Nĩwatũmie Eliakimu ũla waũngamĩe nyũmba ya kĩ-ũsumbĩ, Sevina ũla waĩ mũandĩki, na atongoi ma athembi kũla kwĩ mwathani Ĩsaia mwana wa Amosu, onthe mekĩĩte ngũa ngaamu sya makunia. 3Nĩmaneenie na Ĩsaia mamwĩa, “Esekia easya atĩĩ, ‘Ũmũnthĩ nĩ mũthenya wa thĩna; tũendee kũkanw'a na kũvũthw'a. Tũilyĩ ta kĩveti kĩkilĩlye kũsyaa, ĩndĩ kĩi na vinya wa kũsyaa. 4Mũsumbĩ wa Asuli nũtũmie mũtongoi wake wa asikalĩ oke kũuma Ngai ũla wĩ thayũ. Mwĩai Ngai, Ngai waku, nĩew'e ndeto ii sya kũumana na aĩkany'a ũla wineenete. Kwoou voya Mwĩai Ngai kwondũ wa andũ maitũ ala matialĩte.’ ”

5Yĩla Athũkũmi asu ma Mũsumbĩ Esekia mavikie kũla kwĩ Ĩsaia, 6Ĩsaia nĩwameie atĩĩ, “Endai mũkatavye mũnene wenyu mũmwĩe Mwĩai Ngai easya atĩĩ, ‘Mũikakĩe nũndũ wa ndeto ila mwĩw'ĩte; isu nĩ ndeto sya kũnuma ila anini ma mũsumbĩ wa Asuli maneenete. 7Nĩngũtuma ethukĩĩsya ndeto ite syaw'o, ila syĩtuma asyoka nthĩ yake. E kũu ngatuma oawa na ũvyũ.’ ”

Asuli Maĩtelemya Yelũsalemu Ĩvinda ya Kelĩ

(2Asu 19.8-19)

8Yĩla mũtongoi wa asikalĩ wamanyie kana mũsumbĩ wa Asuli nũminĩte kuma Lakisi, nĩwasyokie kũla ũĩ na eethĩa ayũkita ndũa ya Livina. 9Asuli nĩmamanyie kana asikalĩ ma Misili matongoew'e nĩ Mũsumbĩ Tiliaka wa Ethiovia#37.9 Ethiovia: Maandĩko Matheu kĩthyomonĩ kya Kĩevelania maĩtye Kusi. nĩmokĩte kũmavithũkĩa. Yĩla Senakelivu wamanyie ũu, nĩwatũmie andũ mathi kũla kwĩ Esekia ĩngĩ ayasya, 10“Endai mũkee Esekia mũsumbĩ wa Yuta atĩĩ, ‘Ndũketĩkĩle ngai ĩla wĩkwatasya ĩkũkenge ĩikwĩa kana Yelũsalemu ndĩnenganwe ũtonyinĩ wa mũsumbĩ wa Asuli. 11Kwa w'o nĩwĩw'ĩte ũndũ asumbĩ ma Asuli mekanĩte na nthĩ syonthe; nĩmasyanangĩte makaimina vyũ. Mwĩsũanĩa nĩmũũvonoka? 12Aaũmae makwa nĩmaanangie ndũa sya Ngosani, Aalani, Lesevu, na nĩmooaie andũ ma Eteni ala matwĩe vandũ vetawa Telasali, na vai ngai o na ĩmwe yoo yaĩ ĩtonya kũmatangĩĩa. 13Maĩva asumbĩ ma ndũa sya Amathi, Alivati, Sevalivaimu, Ena na Iva?’ ”

Mboya ya Esekia

14Mũsumbĩ Esekia nĩwoosie valũa kuma kwa andũ ala matũmĩtwe nĩ mũsumbĩ wa Asuli na aũsoma. Nĩvo ĩndĩ waendie Ĩkalũnĩ, na atambũũkya valũa ũsu mbee wa Mwĩai Ngai, 15na avoya ayasya atĩĩ, 16#Kuma 25.22 “Ame Mwĩai Ngai Mwene Ũtonyi W'onthe, Ngai wa Ĩsilaeli, ũla ũsumbĩkaa ũilyĩ kĩvĩlanĩ kyaku kya kĩ-ũsumbĩ, ĩũlũ wa syũmbe syĩ nthwau syĩtawa akelũvi, we wĩ weka nue Ngai ũla ũsumbĩkaa mosumbĩ onthe ĩũlũ wa nthĩ. We nĩwoombie ĩtu na nthĩ. 17Ame Mwĩai Ngai, sisya maũndũ ala maendee ĩũlũ waitũ, na ũyĩthukĩĩsya maũndũ onthe ala Senakelivu ũneenete aikũuma we Ngai ũla wĩ thayũ. 18Ame Mwĩai Ngai, nĩw'o kana asumbĩ ma Asuli nĩmaminĩte andũ aingĩ na makananga nthĩ syoo. 19Nĩmavĩvisye ngai syoo na masyananga, nĩkwĩthĩwa ityaĩ ngai, ĩndĩ syaĩ mĩtĩ na mavia, iseũvĩtw'e nĩ andũ. 20Kwoou yu Mwĩai Ngai, Ngai waitũ, nĩngũkwĩsũva ũtũtangĩĩe kuma ũtonyinĩ wa Senakelivu, nĩ kana mosumbĩ onthe ĩũlũ wa nthĩ mamanye kana we Mwĩai Ngai, wĩ weka nue Ngai.”

Ũtũmani wa Ĩsaia kũla kwĩ Esekia

(2Asu 19.20-37)

21Nĩvo ĩndĩ Ĩsaia mwana wa Amosu watũmanie kũla kwĩ Esekia amwĩa atĩĩ, “Mwĩai Ngai, Ngai wa Ĩsilaeli ekwĩa, ‘Nĩkwĩthĩwa nĩwamboya ũndũ wa Senakelivu mũsumbĩ wa Asuli, 22ũũ nĩw'o ũtũmani wakwa ĩũlũ wake:

Ndũa ya Yelũsalemu nĩkũthekeeaa na kũũvũthya;

ndũa ya Yelũsalemu nĩkũmondaa na ũkũthingithĩsya mũtwe yĩ ĩtina waku.

23Ũla ũnaumangaa na kũvũthya nũũ?

Ũla ũnookĩlĩlye wasya na wamũsisya wĩ na ngathĩĩo nũũ?

Nĩ Ũla Mũtheu wa Ĩsilaeli!

24Nũumangĩte Mwĩai Ngai, kwĩsĩla andũnĩ ala ũtũmĩte. Ũneenete ũkasya:

Kwa kũtũmĩa makasya makwa maingĩ ma kaũ nĩnĩlĩsĩte iĩma ila ndũlu,

nĩnĩendete kũvika mĩthya ya iĩma sya Levanoni.

Nĩnatemie mĩkũũ ĩla ndaasa vyũ,

na mĩtalakwe ĩla mĩseo vyũ;

Nĩnalikile mũtitũnĩ ũsu nthĩnĩ,

nalika vala vathungu vyũ.

25Nĩnenzie ithima na nanyw'a kĩw'ũ kya nthĩ ngeni,

nĩnakinyangie tũlũsĩ tw'onthe twa Misili twang'ala.’

26“Ndwaaĩw'a kana nĩnavangie tene kana ũu ũkeekĩka?

Navangie kuma tene ũndũ yu nĩendee kwĩanĩsya.

Nĩnakũnengie ũtonyi wa kwananga ndũa mbiĩĩe,

ikatw'ĩka mbumbu sya kũndũ kũomboe.

27Andũ ma ndũa isu mai na vinya,

nĩ asaanĩsye na makatelema.

Mailyĩ ta mĩmea ĩmeete isesinĩ,

na ta nyeki ya vuvĩ,

mailyĩ ta nyeki ĩmeete nyũmba ĩũlũ,

ĩla ĩvĩvaw'a nĩ kĩseve ĩtanamba kwĩana.

28“Ĩndĩ nĩnĩsĩ maũndũ onthe ĩũlũ waku,

ũndũ wĩkaa na kũla ũendaa.

Nĩnĩsĩ ũthatu mũnene ũla ũnthatĩe naw'o.

29Nayu nũndũ nũnthatĩe na ũthatu mũnene,

na nĩnĩw'ĩte ĩũlũ wa kwĩkathĩĩa kwaku,

ngeekĩa kavoloi kakwa ĩnyiũũnĩ yaku,

na mũkwa wakwa ilomonĩ syaku,

na ngĩũthyũũa ũsyoke na nzĩa ĩla ũnookie nayo.”

30Nĩvo ĩndĩ Ĩsaia weeie Mũsumbĩ Esekia atĩĩ, “Ũũ nĩw'o wonany'o wa maũndũ ala meĩkĩka. Mwaka ũũ yai metĩkĩa, na mwaka wa kelĩ mũiya mathongoo mamo, ĩndĩ mwakanĩ wa katatũ mũkavanda na kũketha. Mũkavanda mĩsavivũ na mũiya ũsyao wayo. 31Andũ ma Yuta ala metiala makaendeea nesa ta mĩtĩ ĩla ĩlikasya mĩi nthĩ mũno na kũsyaa matunda. 32Nũndũ ve andũ makatiala kuma Yelũsalemu na kuma Kĩĩmanĩ kya Saioni. Kwenda kũnene kwa Mwĩai Ngai Mwene Ũtonyi W'onthe kũkatuma ũndũ ũsu wĩanĩa.

33“Kwoou ĩndĩ ũũ nĩw'o Mwĩai Ngai ũkũneena ĩũlũ wa mũsumbĩ wa Asuli: Ndakalika ndũanĩ ĩno kana kwĩkya ĩangi vo. Vai asikalĩ makwete ngao makamĩthengeea, kana kũmba ivumbu imĩthyũlũlũkĩte. 34Nzĩa ĩla ũnookie nayo, noyo wĩsyoka nayo, na ndakalika ndũanĩ ĩno. Nyie Mwĩai Ngai nĩnaneena! 35Kwondũ wa ndaĩa yakwa mwene, na nũndũ wa ũtianĩo ũla natianĩie na mũthũkũmi wakwa Ndeviti, ngasũvĩa na kũtangĩĩa ndũa ĩno.”

36Mũlaĩka wa Mwĩai Ngai nĩwaendie vala Asuli mambĩte maeema, na ooaa asikalĩ ngili ĩana na mĩongo nyanya na atano. Ũnĩ ũsu kwakya, yĩla andũ maamũkie, meethĩie asu onthe mavalũkangĩte me akw'ũ. 37Nĩvo ĩndĩ Senakelivu mũsumbĩ wa Asuli waumie vau asyoka ndũanĩ yake ya Nineva na ekala vo. 38Mũthenya ũmwe, Senakelivu aendee kũthaithĩa ĩkalũnĩ ya ngai yake ĩla yeetawa Nisiloki, ana make Atalameleki na Saleseli nĩmamũaie na ũvyũ, na makĩa mathi nthĩ ya Alalati. Mwana wa Senakelivu ũla weetawa Esaliatoni nĩwasumbĩkie ĩtina wake.

Currently Selected:

Ĩsa 37: KAMBA

Highlight

Copy

Compare