Ĩsa 32
32
Mũsumbĩ Mũlũngalu
1Ĩvinda yũkĩte vakeethĩwa mũsumbĩ wĩsumbĩka na ũlũngalu,
na atongoi metongosya na sila wa katĩ.
2Kĩla ũmwe woo akeethĩwa ta vandũ va kwĩvitha yĩla kwĩ kĩseve,
vandũ va kũlika yĩla kwĩ na kĩuutani.
Makeethĩwa mailyĩ ta tũlũsĩ twa kĩw'ũ twĩ nthĩ nyũmũ,
ta muunyĩ wa ĩvia ĩnene yĩ nthĩ ya weũ.
3Nĩvo ĩndĩ metho ma ala monaa meĩkala masalukĩtye,
na matũ ma ala mew'aa meĩthukĩĩsya.
4Mũndũ ũla ũsũanĩaa na kũneena mĩtũkĩ akaneenaa na ũĩ,
na mũndũ ũla ũneena aivũvũũta akaneenaa mĩtũkĩ ndeto ikwĩw'ĩka nesa.
5Mũndũ mũtumanu ndakasyoka kwĩtwa mũndũ wa ndaĩa,
kana mũkengani kwĩtwa mũndũ wa ndaĩa.
6Ndia ĩneenaa ũtumanu,
na kĩlĩko kyayo kĩvangaa maũndũ mathũku.
Yĩkaa maũndũ mate na kĩkĩo kya Ngai,
ĩneeneaa Mwĩai Ngai maũndũ mate ma w'o,
ĩleaa kũnenga ũla wĩ na nzaa lĩu aye,
na ĩilea kũnenga ũla wĩ na waũni kĩw'ũ anyw'e.
7Mokengani ma mũndũ ũla ũkenganaa nĩ mathũku;
aseũvasya mĩvango mĩthũku ya kwananga ũla ngya na ndeto sya ũvũngũ,
o na ethĩwa mũndũ ũsu mũthĩni eĩtya kĩla kĩmwaĩlĩte.
8Ĩndĩ mũndũ wa ndaĩa avangaa maũndũ maseo,
na aũngamaa na ũlũmu maũndũnĩ ala maw'o.
Aka ma Yelũsalemu Maikanw'a
9Ũkĩlai inyw'ĩ aka ala mwĩw'aa mwĩ eanĩe mũmbĩthukĩĩsye,
inyw'ĩ eĩtu ala mũilyĩ mwĩanĩwe, ĩthukĩĩsyei ũndũ ngũmwĩa!
10Vaithela mwaka ũmwe na mĩthenya mĩnini,
inyw'ĩ aka ala mũkwĩw'a mwĩanĩwe mũkatetema;
nũndũ vaikethĩwa ngetha ya mĩsavivũ,
mũikakwata ngetha ya matunda.
11Tetemai nĩ w'ĩa inyw'ĩ aka ala mũkwĩw'a mwĩanĩwe,
thĩlĩai inyw'ĩ ala mũthũmũĩte;
umyai ngũa mũtiwe mwĩ athei,
ovai inyunyunĩ syenyu ngũa ngaamu sya makunia.
12Kũnangai ithũi nĩ kyeva nũndũ mĩũnda ĩla yaĩ mĩseo,
na mĩsavivũ ĩla yasyaa mũno yonthe nĩ mbanange,
13na mĩũnda ya andũ makwa yu ĩmeete mĩw'a na mĩtae ĩkausũa.
Ĩĩ, ĩai nũndũ wa nyũmba ila andũ maendaa kũtanĩa ndũanĩ ĩĩ ya motanu.
14Nũndũ nyũmba nene ya kĩ-ũsumbĩ ĩkaekwa,
ndũa ĩla yĩkalaa andũ aingĩ ĩkatiwa yĩ nthei;
mwako mũlũmu na kĩtaa kya kũsyaĩĩsya
ikatw'ĩka wĩkalo wa nyamũ tene na tene,
na mang'oi ma kĩthekanĩ makatanĩa kwĩkala kw'o,
kũkatw'ĩka kũndũ kwa kũĩthĩsya mbũi na malondu.
15Kũkekala ũu nginya yĩla Ngai wĩtũtulũĩla Veva wake,
na weũ ũitw'ĩka mũũnda ũsyaa mũno,
na mũũnda ũsyaa mũno ũitw'ĩka mũtitũ.
16Nĩvo ĩndĩ ala mekalaa weũnĩ makaatĩĩa sila wa katĩ,
na ala mekalaa kũla kwĩ mĩũnda ĩla ĩsyaa mũno mayĩatĩĩa ũlũngalu.
17Andũ meethĩwa me alũngalu kũkeethĩwa na mũuo,
ũsyao wa ũlũngalu ũkeethĩwa ũuu na wĩkwatyo tene na tene.
18Andũ makwa makekalaa vandũ ve mũuo,
makekalaa kũndũ kwĩ na ũsũvĩo,
kũndũ kwa kũthũmũa kũuĩtye.
19O na mbua ya mavia yaananga mũtitũ,
na ndũa ĩyĩomboangwa vyũ,
20inyw'ĩ mũkaathimwa,
mũkavandaa mbeũ syenyu kw'onthe kũla kwĩ kĩw'ũ,
na mũkalekasya ng'ombe syenyu na mang'oi menyu ikathi vala ikwenda.
Currently Selected:
Ĩsa 32: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
