Ĩsa 33
33
Mboya ya Kwĩtya Ũtethyo
1Kyeva nĩ kwaku we ũla wanangaa,
we ũla ũtaanangwa;
we ũla wĩkaa maũndũ ma ũseleke,
o na kau ndwaaĩkwa ũndũ wa ũseleke nĩ mũndũ!
Wamina kwananga andũ angĩ,
naku ũkaanangwa;
wamina kwĩka andũ angĩ maũndũ ma ũseleke,
naku ũkeekwa ũndũ wa ũseleke.
2Ame Mwĩai Ngai, twĩw'ĩe tei; nue twĩkwatĩtye.
Tũsũvĩae kĩla mũthenya,
tũtangĩĩae yĩla twĩ thĩnanĩ.
3Andũ ma nthĩ ingĩ meew'a wasya waku mũnene nĩmasembaa,
yĩla wookĩla nĩmanyaĩĩkaa.
4Syĩndũ sya andũ asu nitavawa ikathela,
o tondũ iinyũ iĩsaa kĩndũ ikamina;
andũ maithaanyũkĩaa o tondũ ngie ithaanyũkaa.
5Mwĩai Ngai nũtaĩawa, ekalaa ĩũlũ;
akausũsya Saioni na sila wa katĩ na ũlũngalu.
6Inyw'ĩ andũ ma Yelũsalemu,
Mwĩai Ngai akatuma mwĩkala ũsũvĩonĩ.
Akamũtangĩĩa na kũmũnenga ũĩ na ũmanyi;
kĩkĩo kya Mwĩai Ngai nĩkyo kĩkethĩwa ũthwii wenyu mũnene.
7Andũ ngũmbaũ nĩmekũkaya me nzĩanĩ nene;
andũ ala matũmĩtwe makaseũvye mũuo meĩa mena woo mũnene.
8Andũ nĩmaekete kwĩsĩla nzĩanĩ nene,
andũ ala maendaa kyalo nĩmaekete kũthi.
Andũ nĩmanangĩte motianĩo,
ngũsĩ nivũthaw'a, mũndũ ndonekaa ta kĩndũ.
9Nthĩ yĩna mũnyao na nĩ nthei,
mĩtitũ ya Levanoni nĩendee kũma;
mwanda mũseo wa Saloni ũilyĩ ta weũ,
nayo mĩtĩ ĩla yĩ iĩmanĩ sya Mbasani na Kalimeli nĩkwĩtĩkya matũ.
Ngai Aĩkany'a Amaitha Make
10Mwĩai Ngai easya atĩĩ,
“Yu nĩngũkĩla,
yu nĩngũtaĩwa,
yu nĩngũnenevw'a.
11Mĩvango yenyu yonthe nĩ ta mavuti,
na ũsyao wayo no ĩko ĩthei,
mĩthũmũ yenyu ĩilyĩ ta mwaki ũla wĩmũmina.
12Andũ makeethĩwa mailyĩ ta mavĩvĩtw'e makatw'ĩka mũu,
makeethĩwa mailyĩ ta mĩw'a mĩteme ĩvĩvĩtw'e na mwaki.”
13Inyw'ĩ ala mwĩ kũasa mũno ĩw'ai maũndũ ala nĩkĩte,
nenyu ala mwĩ vakuvĩ ĩtĩkĩlai vinya wakwa.
14Andũ ma Saioni ala mekaa naĩ me na w'ĩa;
andũ ala mate na kĩkĩo kya Ngai nĩmekũtetema maikũlya atĩĩ,
“Nũũ katĩ waitũ ũtonya kwĩkalany'a na mwaki ũla ũvĩvasya?
Nũũ katĩ waitũ ũtonya kwĩkalany'a na mũĩ sya mwaki wa tene na tene?”
15Nĩ ũla wĩkaa ũlũngalu na kũneena w'o,
ũla ũtetĩkĩlaa ũthwii wosetwe kwa nzĩa ya ũvenani,
ũla ũleaa kwosa ĩtuvi ya wendeesyo,
ũla ũtethukĩĩasya mĩvango ya kũthi kũaana,
na ũtetĩkĩlaa kũsyaĩĩsya ũthũku.
16Mũndũ ũsu akekalaa ũsũvĩonĩ kũndũ kũtũlu,
wĩvitho wake ũkeethĩawa myakonĩ mĩlũmu ya mavia;
akanengawe lĩu na ndakaĩwa nĩ kĩw'ũ.
Ĩvinda Ĩseo yĩla Yũkĩte
17Mũkamwona mũsumbĩ e ndaĩanĩ yake,
mũkoona nthĩ nene na nthanthau ĩla wĩĩthĩwa asumbĩkĩte.
18Mũkasũanĩa ĩũlũ wa ũtĩsyo ũla wavĩtũkie na kwĩkũlya atĩĩ,
“Aĩva ũla watalaa na kũthima mbesa sya koti?
Aĩva ũla watalaa myako mĩlũmu?”
19Mũikasyoka kwona ĩngĩ andũ asu ang'endu,
ala maneenaa kĩthyomo mũtatonya kũelewa,
andũ maneenaa kĩthyomo kĩeni kĩtamanyĩka.
20Sisyai Saioni, ndũa ĩla tũendaa kũtanĩa mboka sitũ ila itw'ĩtwe!
Mũkoona Yelũsalemu, wĩkalo mũuu,
ĩilyĩ ta ĩeema yĩtakavetangwa,
yĩla syambo syayo itakakũwa,
na makanda mayo matakatw'ĩka.
21Vau Mwĩai Ngai akatwony'a ũnene wake,
vakeethĩwa na mbũsĩ nene na tũlũsĩ,
mbũsĩ isu iikesĩlwa nĩ masiwa kana meli sya amaitha.
22Nũndũ Mwĩai Ngai nĩwe mũsili waitũ,
na nĩwe mũtongoi waitũ.
Mwĩai Ngai nĩwe mũsumbĩ waitũ;
akatũtangĩĩa.
23Makanda maku nĩ maleelu,
maitonya kũlũmya mũtĩ ũla wambaa kĩtambaa kya kũtwaa meli,
o na maitonya kwamba kĩtambaa kĩu.
Andũ makaana mũtavo mwingĩ,
o na ala me maũũ mathũku makakua mũtavo.
24Vai ũmwe katĩ wa ala mekalaa Saioni ũkasya, “Nyie nĩ mũwau;”
andũ ala mekalaa vo makaekewa naĩ syoo.
Currently Selected:
Ĩsa 33: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
