Ĩsa 3
3
Ũsilĩlo ĩũlũ wa Yuta na Yelũsalemu
1Yu Mwĩai, ũla nĩwe Mwĩai Ngai Mwene Ũtonyi W'onthe,
nũkũvetanga kuma Yelũsalemu na kuma Yuta,
ũtethyo wa andũ na syĩndũ syonthe ila mekwatasya.
Nũkũvetanga ũtethyo w'onthe wa lĩu na wa kĩw'ũ.
2Nũkũvetanga aũme ngũmbaũ na asikalĩ,
asili na athani,
ala maaũasya na atumĩa,
3anene ma asikalĩ mĩongo ĩtano na atongoi me ndaĩa,
atai na ala me na ũĩ wa kwĩka syama na awe ala oĩ.
4Mwĩai Ngai akatuma matongoew'a nĩ ivĩsĩ,
na kũsumbĩkwa nĩ tũũkenge.
5Andũ makathĩnany'a;
mũndũ akathĩny'a ũla ũngĩ,
mũtũi akathĩny'a mũtũi.
Mũndũ wa mũika akang'endea mũtumĩa,
na andũ mate ndaĩa makang'endea ala me ndaĩa.
6Mũndũ akakwata ũmwe wa ana-a-inyia,
me mũsyĩ kwa ĩthe woo na kũmwĩa atĩĩ,
“Wĩna ngũa, tw'ĩka mũtongoi waitũ,
tw'ĩka mũtongoi wa kĩvumbu kĩĩ kya maũomboku.”
7Ĩndĩ mũthenya ũsu, nake akasũngĩa asye atĩĩ,
“Aiee! Nditonya kũtetheesya;
nyũmba kwakwa vai lĩu kana ngũa,
mũikandw'ĩkĩthye mũtongoi wa andũ!”
8Nĩkwĩthĩwa Yelũsalemu nĩluluutĩkĩte,
na Yuta nĩ mbalũku,
nũndũ meneenea Mwĩai Ngai naĩ na kũlea kũmwĩw'a,
nĩmavũthisye ũtheu wake mũtisu ũla waĩ katĩ woo.
9Sila wa wendeesyo ũla maumasya nũkũsĩĩaa ĩũlũ woo;
mekaa naĩ ũtheinĩ ta andũ ma Sondomu,
maivithaa naĩ yoo.
Kyeva nĩ kwoo!
Nĩmeyĩeteete ũthũku.
10Tavyai ala alũngalu kana makaendeea nesa,
nĩkwĩthĩwa makatanĩa ũsyao wa meko moo.
11Kyeva nĩ kwa ala athũku!
Maũndũ moo makaendeea naĩ,
nĩkwĩthĩwa o ũndũ meekie, namo makeekwa o ũu.
12Andũ makwa makathĩnw'a nĩ syana,
na aka makamasumbĩka.
Inyw'ĩ andũ makwa, atongoi menyu nĩmamwaasya,
ũkethĩa mũikũmanya nzĩa ĩla mwaĩlĩte kwĩsĩla.
Mwĩai Ngai Aisilĩla Andũ make
13Mwĩai Ngai nĩwĩyũmbanĩtye kũsila nenyu,
aũngamĩte asilĩle andũ make.
14Mwĩai Ngai esilĩla atumĩa na atongoi ma andũ make ayasya atĩĩ,
“Ninyw'ĩ mwanangie mũũnda wakwa wa mĩsavivũ,
ũthwii ũla mwatavie kuma kwa ngya wĩ nyũmbanĩ syenyu.
15Mwĩenda kwonany'a ata mũimina andũ makwa,
yĩla mũkwĩka ala ngya maũndũ mathũku?
Nĩkũlya ũu nyie Mwĩai Ngai Mũsumbĩ Mwene Ũtonyi W'onthe.”
Ũkany'o kwa Aka ma Yelũsalemu
16Mwĩai Ngai easya atĩĩ, “Nĩkwĩthĩwa aka ma Yelũsalemu me na mĩng'athĩlĩĩlyo, na maendaa makootete ngingo syoo, na kũvenaveny'a na metho moo mausũĩte ũlaalai. O ta ũu maendaa matonete kavola, na kũkayĩthya iamba ila syĩ maũũnĩ moo. 17Nyie Mwĩai Ngai ngamakany'a; ngaetee eĩtu ma Saioni ũwau wa ivala mĩtwenĩ yoo, na kũmavua ngũa moneke me athei.”
18Mũthenya ũsu, Mwĩai akavena aka ma Saioni syĩndũ syoo sya wanake ila mekathĩĩaa nasyo: Iamba na mĩsivi ya kwĩyova mũtwe, masoa ma ngingo 19na mĩnaĩ, itang'a sya moko na ngũa sya kwĩkunĩkĩlya, 20itambaa sya mũtwe na mbangili, mĩsivi ya kwĩyova na tũkusu twa syĩndũ syĩ mũuke mũseo, iawa 21na mbete, ngome sya kwĩkĩa manyiũũ na 22ngũa sya kwĩkĩa ĩvindanĩ ya mboka, suka sya kwĩvw'ĩka na suka sya kũvw'ĩka mũtwe, mĩvuko ya mbesa na 23ngũa mbũthũ ikwonany'a mwĩĩ, ngũa itumĩtwe na ndii nzeo ndũmu na itambaa sya kwova mũtwe na masuka mavũthũ.
24Vandũ va kũnyunga nesa, aka asu makanyunga wou,
vandũ va kwĩyova mĩsivi mĩseo, makeeyova makanda;
vandũ va kwĩthĩwa na nzw'ĩĩ nzeo, makeethĩwa na ivala,
vandũ va kwĩkĩa ngũa nzeo ndaasa, makeekĩa ngũa ngaamu sya makunia;
vandũ va wanake woo, makeekĩĩthw'a nthoni.
25Aũme menyu makaminwa na ũvyũ,
aũme menyu ngũmbaũ makooaĩwa kaũnĩ.
26Mĩvĩa ya ndũa ya Yelũsalemu ĩkaĩa na kwĩthĩwa na kyeva,
na ndũa ĩsu ĩkeethĩwa ĩilyĩ ta mũndũ mũka ũilyĩ nthĩ kĩtoonĩ avenetwe syĩndũ syonthe.
Currently Selected:
Ĩsa 3: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
