Ĩsa 2
2
Mũuo wa Tene na Tene
(Mika 4.1-3)
1Ũũ nĩw'o ũtũmani ũla Ngai wanengie Ĩsaia mwana wa Amosu ĩũlũ wa Yuta na Yelũsalemu.
2Mĩthenyanĩ yũkĩte,
kĩĩma kĩla Ĩkalũ ya Mwĩai Ngai yakĩtwe,
kĩkeethĩwa kĩ kĩnene mbee wa iĩma ila ingĩ syonthe.
Kĩkeethĩwa kĩ kĩtũlu kwĩ tũlĩma tw'onthe;
na mbaĩ syonthe ikambata vo.
3Andũ ma mbaĩ mbingĩ makooka na kwasya atĩĩ,
“Ũkai twambate kĩĩmanĩ kya Mwĩai Ngai,
tũendei nyũmbanĩ ya Ngai wa Yakovo,
nĩ kana atũmanyĩsye nzĩa syake,
naitũ tũyĩkala kwĩanana na ũndũ ũkũtũtongoesya.”
Nĩkwĩthĩwa mwĩao ũkooka kuma Saioni,
ndeto ya Mwĩai Ngai ĩkooka kuma Yelũsalemu.
4 #
Yoe 3.10; Mika 4.3 Mwĩai Ngai akasilany'a andũ ma mbaĩ mbingĩ,
akaumĩsya andũ aingĩ ũtw'ĩo.
Andũ makavũa mbyũ syoo itw'ĩke mĩthya ya mĩlaũ,
na matumo moo matw'ĩke tũvyũ twĩ ngoto twa kũsea.
Mbaĩ ndĩkokĩla yũkite na ĩngĩ,
na mbaĩ iikemanyĩsya ĩngĩ kũkita.
5Yu inyw'ĩ nzyawa sya Yakovo ũkai,
nĩtũendelei kyeninĩ kya Mwĩai Ngai.
Ũsilĩlo wa Mwĩai Ngai kwa ala Mekathĩĩaa
6We Ngai nũtiĩte andũ maku, nzyawa sya Yakovo,
nĩkwĩthĩwa kwa w'o me na syĩthĩo mbingĩ sya andũ ma ngalĩko ya wumĩlonĩ wa syũa;
mena ala mathanaa maũndũ ta Avilisiti,
na methĩawa ngwatanĩo na andũ ma nthĩ ngeni.
7Nthĩ yoo yusũĩte silĩva na thaavu,
na ũthwii woo ndwĩ kĩthimo;
nthĩ yoo yusũĩte mbalasi,
na makasya moo ma kaũ maitalĩka.
8Nthĩ yoo yusũĩte mĩvw'anano;
mathaithaa syĩndũ ila maseũvĩtye na moko moo,
ĩĩ, syĩndũ maseũvĩtye mo ene.
9Kwoou kĩla mũndũ akeekĩĩthw'a nthoni,
na andũ mainyivw'a.
We Ngai ndũkamaekee!
10 #
Ũvu 6.15; 2Ath 1.9 Likai mavianĩ mwĩvithe,
na mũyĩnza maima mwĩvithe,
kuma ũthatunĩ mũnene wa Mwĩai Ngai,
na kuma ũtheunĩ mũtisu wa ũnene wake!
11Ũla wĩkathĩĩaa akanyivw'a,
na ala meng'athĩlĩĩlasya makatheew'a;
mũthenya ũsu Mwĩai Ngai e weka nĩwe ũkanenevw'a.
12Nũndũ ve mũthenya ũtw'ĩtwe nĩ Mwĩai Ngai Mwene Ũtonyi W'onthe,
mũthenya ũla wĩnyivya onthe ala mekathĩĩaa na meng'athĩlĩĩlasya,
na o ta ũu ainyivya ala menenevasya.
13Akaananga mĩtĩ yonthe ya mĩkũũ ya Levanoni,
ĩla mĩasa na mĩseo,
na kwananga mĩtĩ yonthe ya myalonĩ ya Mbasani.
14Akatindimalya iĩma syonthe ila ndũlu,
na tũlĩma tw'onthe tũla tũasa.
15Akaomboanga nyũmba ndũlu syonthe,
na ngũta syonthe ndũmu sya ndũa.
16Akaananga meli syonthe sya Talisisi,
na meli syonthe ila mbanake.
17Ũla wĩkathĩĩaa akatheew'a,
na ala meng'athĩlĩĩlasya makanyivw'a;
mũthenya ũsu Mwĩai Ngai e weka nĩwe ũkanenevw'a.
18Mĩvw'anano yonthe ĩkathela vyũ.
19Andũ makalika ngunganĩ sya mavia,
na maimanĩ ala me nthĩ,
makĩĩte ũthatu wa Mwĩai Ngai,
na ũtheu mũtisu wa ũnene wake,
yĩla wĩũka kũtelemya nthĩ.
20Mũthenyanĩ ũsu, andũ makekĩsya mbuko na mbuvu,
mĩvw'anano yoo ĩseũvĩtw'e na silĩva na thaavu,
ĩla meeseũvĩisye mamĩthaithae.
21Andũ makalika ngunganĩ sya mavia,
na mĩvatĩnĩ ya mavia,
makĩĩte ũthatu wa Mwĩai Ngai,
na ũtheu mũtisu wa ũnene wake,
yĩla wĩũka kũtelemya nthĩ.
22Ekai kwĩkwatya mũndũ,
thayũ wake ũilyĩ ta mĩthũmũ, ndwĩkalaa.
Nũndũ we atalawa ta kĩndũ kya vata ũndũnĩ wĩva?
Currently Selected:
Ĩsa 2: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
