Ĩsa 28
28
Ũkany'o kwa Atongoi ma Ĩsilaeli
1Kyeva nĩ kwa atongoi ma Ĩsilaeli,
ũkumyo woo ũendee kũthela ta ngovia sya kĩ-ũsumbĩ iseũvĩtw'e na malaa,
syĩkĩĩtwe nĩ atongoi manyw'ĩte makamilwa.
Andũ asu me ngathĩĩo mavalũkĩte nthĩ me amile vyũ!
2Mwĩai e na mũndũ wĩ ũtonyi na vinya,
ũla wĩũka ta mbua ya mavia kana ta kĩuutani kĩnene kĩla kyanangaa;
akooka ta mbua nene na ta kĩw'ũ kyusũĩte kĩkakĩla,
akamekya mavalũke nthĩ na vinya.
3Ngathĩĩo sya atongoi asu athengi ma Evalaimu,
ikakinyangĩwa nthĩ,
4na nguma sya atongoi asu me ngathĩĩo,
ikathela ũndũ ĩlaa yĩvovaa,
kana ta makũyũ ala mew'aa ĩvinda ya ngetha yĩtanamba kũvika;
mũndũ oona makũyũ asu oou nũmatusaa na aimaya na ũu wamo ũithela.
5Mũthenya ũsu Mwĩai Ngai Mwene Ũtonyi W'onthe akeethĩwa ta ngovia ya kĩ-ũsumbĩ ya ndaĩa,
akeethĩwa ta ngovia mbanake ya kĩ-ũsumbĩ kwa ũtialo wa andũ make.
6Akanenga asili veva wa kumya sila wa katĩ,
na ainenga ũkũmbaũ ala masiĩĩa mĩvĩa ya ndũa ndĩkavithũkĩwe.
7Athembi na athani o namo melũw'a nĩ kũnyw'a ũkĩ;
nĩmaluluutĩkaw'a nĩ kĩla kĩmilaa,
nĩmavũavũanĩtw'e nĩ ũkĩ;
nĩmaluluutĩkaw'a nĩ kĩla kĩmilaa.
Nĩmavĩtasya yĩla mekũalyũla mawoni,
na nĩmavĩtasya yĩla mekumya ũtw'ĩo.
8Mesa syonthe syusũĩte matavĩka,
na vai vandũ vatheu.
9Manyungunyĩasya ĩũlũ wakwa makakũlya atĩĩ,
“Mũndũ ũũ eenda kũmanyĩsya aaũ?
Etavya aaũ ũtũmani ũla wĩ naw'o?
Twĩkũlya, eona ta ũkũmanyĩsya twana tũnini,
tũla tũnaekie kwonga mĩtũkĩ?
10Nũndũ emanyĩsya mwĩao kwa mwĩao, mwĩao kwa mwĩao,
mũsoa kwa mũsoa, mũsoa kwa mũsoa,
kaũndũ kanini vaa, kaũndũ kanini vaya.”
11 #
1Ako 14.21
Ĩndĩ Mwĩai Ngai akaneena namo,
aitũmĩa andũ me na kĩthyomo kĩ kĩvathũkany'o,
mekũneena na kĩthyomo kĩeni.
12Nĩwaneenete namo akamea atĩĩ,
“Ngamũnenga ũthũmũo,
ngamũnenga ũthũmũo inyw'ĩ ala mũnoete,
vaa nĩ vandũ va kũthũmũa,”
Ĩndĩ nĩmaleile kũmwĩthukĩĩsya.
13Kwoou ndeto ya Mwĩai Ngai kwoo ĩkeethĩwa ĩilyĩ ta ũũ:
Mwĩao kwa mwĩao, mwĩao kwa mwĩao,
mũsoa kwa mũsoa, mũsoa kwa mũsoa,
kaũndũ kanini vaa, kaũndũ kanini vaya;
nĩ kana mathi na maĩvalũka na mangala matũlĩkange,
makwatw'e nĩ mũteo na maikwatwa movwe.
Ĩvia yĩ Vata Mũno ya Kwaka Saioni
14Kwoou inyw'ĩ ala mũvũthasya, ĩw'ai ũndũ Mwĩai Ngai ũkwasya,
inyw'ĩ ala mũsumbĩkaa andũ ma Yelũsalemu!
15Nĩkwĩthĩwa nĩmũneenete mũkasya atĩĩ,
“Nĩtũseũvĩtye ũtianĩo na kĩkw'ũ,
na nĩtwĩw'anĩte na vala maveva ma ala akw'ũ mekalaa;
yĩla ũthĩny'o mũnene wĩmokĩa andũ,
ndũkatũvikĩa ithyĩ,
nũndũ nĩtũtw'ĩte ũvũngũ kwĩthĩwa wĩvitho witũ,
na kũkengana nĩkw'o kũtũvithaa.”
16 #
Sav 118.22-23; Alo 9.33; 10.11; 1Vet 2.6 Kwoou Mwĩai Ngai Mũsumbĩ easya atĩĩ,
“Nĩngwĩkĩa ĩvia ya mũsingi vaa Saioni,
ĩvia yĩsyaĩtw'e nesa kana nĩ ĩseo,
ĩvia yĩla yĩ vata mũno mwakonĩ, ya kwaka mũsingi mũlũmu.
‘Ũla ũĩkĩĩaa ndakatelema.’
17Ngatw'ĩkĩthya ũsili wa katĩ ũlii wa kũthima,
na ũlũngalu ta w'o kavilũ.
Mbua ya mavia ĩkatwaa wĩvitho woo wa movũngũ,
na kĩw'ũ kĩkaananga wĩvitho woo.”
18Nĩvo ĩndĩ ũtianĩo wenyu na kĩkw'ũ wĩanangwa,
na wĩw'ano wenyu na vala maveva ma ala akw'ũ mekalaa ndũkamũtethya;
yĩla ũthĩny'o mũnene wĩmokĩa andũ,
ũkamũvalũkya nthĩ.
19Kĩla ĩvinda ũthĩny'o ũsu wooka ũkamũkwataa;
ũkookaa kĩla kĩoko, mũthenya na ũtukũ.
Yĩla mwesa kũmanya ũtũmani wa Ngai mũkatelemaa.
20Mũkeethĩwa ta mũndũ ũkomete kĩtandanĩ kĩkuvĩ ũkethĩa ndatonya kwĩkoota,
na ta mũndũ wĩvw'ĩkĩte ĩvula ĩtheke yĩteũmũkomana.
21 #
Yos 10.10-12; 2Sam 5.20; 1Mav 14.11 Mwĩai Ngai akookĩla o tondũ wookĩlile Kĩĩmanĩ kya Velasimu,
na akathata o tondũ wathatie e Mwandanĩ wa Ngiveoni;
akeeka meko make, meko make ma kũseng'ya,
na kũtethya mawĩa make, mawĩa make maeni!
22Kwoou yu ekanai na kĩvũthya,
mũikese kwovwa wĩthĩe mũivonoka,
nũndũ Mwĩai Ngai Mwene Ũtonyi W'onthe,
nũndavĩtye kana nũvangĩte kwananga nthĩ ĩno yonthe.
Ũĩ W'onthe Wumaa kwa Mwĩai Ngai
23Teai matũ mwĩw'e ũndũ ngwasya,
ĩthukĩĩsyei mwĩw'e ũneeni wakwa.
24Yĩla mũĩmi ũkũĩma vandũ avande, nĩkũlya, aendeeaa o kũĩma ate kwĩka ũndũ ũngĩ?
Aendeeaa o kwĩnza na kũtema mũũnda wake mĩkao?
25Amina kwalala mũũnda wake,
nũvuĩaa ndũlũ na ndania;
nũvandaa nganũ mĩkaonĩ,
na nganũ yĩtawa mbaale vandũ vayo,
na aivanda mwee ndeenĩ sya mũũnda.
26Mũĩmi nĩwĩsĩ wĩa wake nesa;
Ngai wake nũmũmanyĩasya.
27Ndũlũ ndĩvũawa na ivũi sya ngetha,
nayo ndĩa ya ĩkasya ndĩvingilitaw'a ĩũlũ wa ndania,
ĩndĩ ndũlũ ĩvũawa na mũtĩ,
nayo ndania ĩvũawa na ndata.
28Mũĩmi nũvũaa nganũ, ĩndĩ ndamĩvũaa ĩkavevenzeka,
nĩwĩsĩ kũvũa nganũ ĩsu kwa kwĩsĩlya ĩkasya ĩũlũ wayo ateũmyananga.
29Ũĩ ũsu o naw'o wĩthĩawa wumĩte kwa Mwĩai Ngai Mwene Ũtonyi W'onthe;
anenganae ũtao wa kũseng'ya,
na e ũĩ mwingĩ mũno.
Currently Selected:
Ĩsa 28: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
