Ĩsa 27

Kũvonokw'a na Kũmbanw'a kwa Andũ ma Ĩsilaeli

1 # Yovu 41.1; Sav 74.14; 104.26 Mũthenya ũsu Mwĩai Ngai akakany'a Leviathani#27.1 Leviathani: Andũ amwe maĩtye nyamũ ĩno nĩ kĩng'ang'i, na angĩ maĩtye nĩ nyamũ ya mbano sya tene nzoka ĩla ĩnyolokaa mĩtũkĩ,

Leviathani nzoka ĩla ĩendaa yĩmilangĩte.

Akamĩkany'a na ũvyũ wake,

ũvyũ wake mwetu, mũnene na wĩ vinya.

Akooaa mũkũnga ũla wĩkalaa ũkanganĩ.

2Mũthenya ũsu Mwĩai Ngai akasya atĩĩ,

“Inai wathi ĩũlũ wa mũũnda mũseo wa mĩsavivũ!

3Nyie Mwĩai Ngai ninyie nĩũsũvĩaa;

kĩla ĩvinda nĩnĩũnyithasya.

Nĩnĩũsũvĩaa ũtukũ na mũthenya,

nĩ kana mũndũ o na wĩva ndakawanange.

4Nĩnĩekete kũũthatĩa.

Nenda kethĩwa ve mĩw'a na mĩtae ya kũkita nayo!

Nĩthi ngokita nayo,

nĩmĩvĩvya yonthe na mwaki.

5Ethĩwa amaitha ma andũ makwa nĩmekwenda ũsũvĩo wakwa,

nĩmaseũvye mũuo nakwa,

ĩĩ, nĩmaseũvye mũuo nakwa.”

6Ĩvinda yũkĩte ũsyao wa Yakovo ũkatambũũkya mĩi ta mũtĩ,

andũ ma Ĩsilaeli makalaũka na kũthongooa,

na makausũsya nthĩ yonthe ũsyao.

7Nĩkũlya, Ngai akũnĩte andũ ma Ĩsilaeli ĩkũna ĩnene ta yĩla wakũnie amaitha moo?

Kana moaĩtwe o tondũ amaitha moo mooaiwe?

8Ngai nĩwakanisye andũ make kwa kũeka matavwe na kũtwawa nthĩ ya ũeninĩ;

nĩwamavetie na kĩseve kyake kĩ vinya kyumĩte wumĩlonĩ wa syũa.

9Ũndũ ũũ nĩw'o wĩtuma mavĩtyo ma Yakovo maekewa,

na nĩw'o wĩĩthĩwa ũsyao wa kũthew'a kwa naĩ yake:

Yĩla wĩomboanga ithembeo syonthe na kwatũanga mavia masyo matw'ĩke tũlungu,

o tondũ mavia ma sokaa mavevenzawa,

na kũomboa ituĩ sya ngai nga yĩtawa Asela na ithembeo sya kũtoeesya ũvani wĩthĩe vai kĩmwe kĩtialĩte kĩũngyĩ.

10Ndũa mbiĩĩe ĩtiĩtwe yĩ nthei,

nĩ wĩkalo ũtiĩtwe wĩ mũthei na kũekwa ta weũ;

ndũanĩ ĩsu nĩvo tũsaũ tũĩsaa,

tũĩsaa mbonge ikatiwa ite matũ na kũtindia.

11Yĩla mbonge sya w'o syooma nitilawa,

iveti nĩsyũkaa ikasyuna ngũ;

nũndũ aa nĩ andũ matena ũmanyi,

kwoou ũla wamombie ndakamew'ĩa tei,

ũla wamombie ndakameka ũseo.

12Mũthenya ũsu Mwĩai Ngai akoombany'a andũ make ũmwe kwa ũmwe, kuma Ũsĩnĩ wa Euvalati nginya Ũsĩnĩ wa Misili, o tondũ mũndũ ũvũaa nganũ na kũmĩvathũkany'a na mavuti. 13Mũthenya ũsu kũkavuvwa soo mũnene, na ala maaĩie nthĩ ya Asuli na ala malũngilw'e matwawa nthĩ ya Misili, makooka mathaithĩe Mwĩai Ngai kĩĩmanĩ kĩtheu Yelũsalemu.

Currently Selected:

Ĩsa 27: KAMBA

Highlight

Copy

Compare