Ĩsa 11
11
Ũsumbĩ wa Mũuo
1 #
Ũvu 5.5; 22.16 O tondũ nthongoo na mbonge ithongooaa kuma kĩtinanĩ kya mũtĩ,
now'o kũkauma ũmwe nzyawanĩ sya Yese.
2Veva wa Mwĩai Ngai akeethĩwa nthĩnĩ wake,
Veva wa ũĩ na ũmanyi,
Veva wa ũtao na vinya,
Veva wa kũmanya na kũmũkĩa Mwĩai Ngai.
3Akatanaw'a nĩ kwĩthĩwa e na kĩkĩo kya Mwĩai Ngai.
Ndakasilĩlaa kwĩanana na ũndũ ũkwona,
kana aumye ũtw'ĩo kwĩanana na ũndũ ũkwĩw'a,
4 #
2Ath 2.8
ĩndĩ akasilĩlaa ngya na ũlũngalu,
na aitũmĩa sila wa katĩ akaumya ũtw'ĩo kwondũ wa ala auu ĩũlũ wa nthĩ.
Akakũnaa nthĩ aitũmĩa ndeto syake,
na ndeto ila wĩneenaa ikooaa ala athũku.
5 #
Aev 6.14
Ũlũngalu ũkeethĩawa ta w'o mũsivi wake wa kwĩyova,
na ũĩkĩĩku ũkeethĩawa ta mũsivi kĩnyunyunĩ kyake.
6 #
Ĩsa 65.25
Nzũi ĩkekalanasya na katena ka ĩlondu,
na kĩkoyo kĩkatindiaa vamwe na katena ka mbũi,
kasaũ na mũnyambũ ikaĩsanĩaa vamwe,#11.6 ikaĩsanĩaa vamwe: Maandĩko Matheu kĩthyomonĩ kya Kĩevelania maĩtye na ng'ombe nou ikeethĩawa vamwe.
na kana kanini kakaitongoesya.
7Ng'ombe na nyamũ mbai yĩtawa nduva ikaĩsanĩaa vamwe;
tũsaũ twasyo tũkatindiaa vamwe,
mũnyambũ ũkaĩsaa nyeki ta ng'ombe.
8Kana kekwonga kakathaũkĩaa vala ve ĩima ya nzoka ya kĩko,
na kana kaaĩu kakeekĩaa kw'oko kwako ĩimanĩ ya kĩmbuva.
9 #
Ava 2.14
Kĩĩmanĩ kĩtheu kya Mwĩai Ngai,
kũikethĩwa kũũmĩany'a kana kwĩkana naĩ,
nĩkwĩthĩwa nthĩ ĩkeethĩwa yusũĩte ũmanyi wa Mwĩai Ngai, o tondũ ũkanga wusũĩte kĩw'ũ.
Ala Matwaiwe Nthĩ ya Ũeninĩ me Atave Makasyoka
10 #
Alo 15.12
Mũthenya ũsu nthongoo ya Yese, ĩla nĩ nzyawa yake ĩkaũngama ta wonany'o kwa andũ onthe. Mbaĩ syonthe sya andũ ikamũatĩĩa, na wĩkalo wake ũkeethĩwa wĩ wa kũkumw'a.
11Mũthenya ũsu, Mwĩai Ngai akatũmĩa vinya wake ĩngĩ na aitũnga andũ make ala matialĩte. Akamatũnga kuma Asuli, Misili, Vathilosi, Ethiovia, Elamu, Sinali,#11.11 Sinali: Kana Mbavilonĩ Amathi na kuma nthĩ ila syĩ ũtee wa ũkanga.
12Akeekĩa wonany'o kwa andũ ma mbaĩ syonthe,
akoombany'a andũ ma Ĩsilaeli ala manyaĩĩkiw'e;
akoombany'a andũ ma Yuta ala manyaĩĩkĩtw'e,
kuma ngalĩko syonthe sya nthĩ.
13Kĩwĩu kya andũ ma Evalaimu kĩkathela,
na ala mathĩnasya andũ ma Yuta makavetangwa;
andũ ma Evalaimu maikew'ĩa ala ma Yuta kĩwĩu,
namo ma Yuta maikathĩny'a ala ma Evalaimu.
14Yuta na Evalaimu makavithũkĩa Avilisiti ngalĩko ya ũthũĩlonĩ wa syũa,
na me vamwe makatava syĩndũ sya andũ ala matũaa ngalĩko ya wumĩlonĩ wa syũa.
Makasinda Aetomu na Amoavi,
namo Aamimoni makeethĩwa me ewi kwoo.
15 #
Ũvu 16.12
Mwĩai Ngai akang'alya Ũkanga Mũtune vala ũthekevele;
akookĩlya kw'oko kwake ĩũlũ wa Ũsĩ wa Euvalati;
akaete kĩseve kĩla kĩvĩvasya,
na kũũnyaĩĩkya ũtw'ĩke tũlũsĩ mũonza,
wĩthĩe andũ no maingĩle vo na maũũ.
16Kũkeethĩwa na nzĩa nene kuma Asuli,
ya andũ make ala meĩthĩwa matialĩte kw'o,
o tondũ weekie andũ ma Ĩsilaeli,
yĩla maumĩte nthĩ ya Misili.
Currently Selected:
Ĩsa 11: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
