Ĩsa 10
10
1Kyeva nĩ kwa andũ ala maseũvasya mĩao ĩte ya ũlũngalu,
na ala maumasya mĩao ya kũvinyĩĩa angĩ,
2nĩ kana mavene athĩni sila wa katĩ,
na kũvena andũ ala ngya katĩ wa andũ makwa kĩla kĩmaĩlĩte.
Aka ndiwa matw'ĩkĩte mũtavo kwoo,
na nĩmavenaa ala makw'ĩĩwe nĩ aaĩthe!
3Inyw'ĩ mũkeeka ata mũthenyanĩ wa kũsilĩlwa,
ĩvinda yĩla kĩuutani kĩkoka kuma kũasa?
Mũkasemba kwaũ akamũtetheesye?
Mũkatia ũthwii wenyu va?
4Vai ũndũ ũngĩ ũkatiala ate o kwĩng'utha mwĩ vamwe na ala ove,
kana kũawa vamwe na ala makoaĩwa kaũnĩ.
Ĩndĩ o na ũu wĩ o vo, ũthatu wa Mwĩai Ngai ti mũthelu,
na no ũtambũũkĩtye kw'oko kwake amakany'e.
Kwathanwa kwa Ũsilĩlo ĩũlũ wa Asuli
5 #
Ĩsa 14.24-27; Naũ 1.1—3.19; Nzev 2.13-15 Mwĩai Ngai easya atĩĩ,
“Kyeva nĩ kwaku we Asuli, ndata ya ũthatu wakwa,
we ũla ũkwete nzũma ya ũthatu wakwa mũnene!
6Nĩtũma Asuli kwa nthĩ ĩte na kĩkĩo kya Ngai,
nĩmĩaĩa ĩthi ĩkavithũkĩe andũ ala manthatasya,
ĩkose mũtavo na kũvenana syĩndũ,
na kũmakinyangĩa nthĩ ta ndaka nzĩanĩ nene sya ndũa.”
7Ĩndĩ mũsumbĩ wa Asuli ndavangĩte ũu,
ndekũsũanĩa ũu,
kĩlĩkonĩ kyake avangĩte kwananga,
na kũmina nthĩ mbingĩ.
8Nĩkwĩthĩwa ekũlya atĩĩ,
“Mo anene makwa onthe ma asikalĩ ti asumbĩ?
9Ndiĩka ndũa ya Kalino ũndũ neekie ya Kalikemisi?
Ndiĩka ndũa ya Amathi ũndũ neekie ya Alivati?
Ndiĩka ndũa ya Samalia ũndũ neekie ya Ndamasikũ?
10Ethĩwa nĩnatambũũkisye kw'oko kwakwa,
nasinda mosumbĩ me na ngai sya mĩvw'anano,
ala mĩvw'anano yoo myasũvye,
yaĩ nene mbee wa ĩla ya Yelũsalemu na ya Samalia.
11Nĩkũlya, ngalea kwĩkana na Yelũsalemu na mĩvw'anano ya yo,
o ũndũ neekanie na Samalia na mĩvw'anano ya yo?”
12Yĩla Mwĩai wĩmina wĩa wake w'onthe Kĩĩmanĩ kya Saioni na Yelũsalemu, akakany'a mũsumbĩ wa Asuli nũndũ wa kwĩkathĩĩa, ũng'endu na nũndũ wa kwĩng'athĩlĩĩlya kwake. 13Nĩkwĩthĩwa mũsumbĩ wa Asuli easya atĩĩ,
“Nĩkĩte maũndũ asu kwa ũtonyi wakwa mwene,
ngĩtũmĩa ũĩ wakwa nũndũ nĩ na ũmanyi!
Nĩnĩvetangĩte mĩvaka ĩla ĩvakanĩtye nthĩ na ĩngĩ,
na ngatava mothwii moo,
ta mũndũ ngũmbaũ nĩnĩvalũkĩtye ala mekalĩle ivĩla sya kĩ-ũsumbĩ.
14O tondũ mũndũ ũtambũũkĩasya ndala kw'oko,
now'o natambũũkisye kw'oko kwakwa noosa ũthwii woo,
na o tondũ mũndũ wũmbanasya matumbĩ matiĩtwe ndalanĩ,
now'o nakwa namombanisye kĩla vandũ ĩũlũ wa nthĩ.
Nyũnyi nĩyũkĩlasya nthwau kana ĩkathamya ĩlonze yĩtetee,
ĩndĩ vai ũmwe waanziĩĩa kwosa ũthwii woo.”
15Nĩkũlya, ĩthoka nĩyĩkathĩĩa yĩ mbee wa ũla ũtemaa nayo?
Mũsumeno nũtonya kwĩkathĩĩa wĩ mbee wa ũla ũtemaa naw'o?
Ndata nĩtonya kũkĩlya ũla ũmĩkwete,
kana ndata ya kwĩlumĩla nĩtonya kũkĩlya ũla ũkwĩlumĩla nayo?
16Kwoou Mwĩai, ũla nĩwe Mwĩai Ngai Mwene Ũtonyi W'onthe,
akaetee asikalĩ ma mũsumbĩ wa Asuli ala me vinya ũwau wa kũtuma mamosa,
na ũkumyo wake ũkavĩvw'a na mwaki,
mwaki wakanĩte ũlĩlĩnzĩ.
17Ngai ũla nĩwe kyeni kya Ĩsilaeli akatw'ĩka mwaki,
Ũla Mũtheu wa Ĩsilaeli akatw'ĩka ũlĩlĩnzĩ wa mwaki,
ũla ũkavĩvya na kũmina mĩw'a na mĩtae ya mũsumbĩ wa Asuli mũthenyanĩ o ũmwe.
18Mwĩai Ngai akaananga mĩtitũ ya mũsumbĩ wa Asuli ĩla mĩseo na mĩũnda ĩla mĩnou,
na ĩkeethĩwa ta mũndũ mũwau ũla ũendeeaa kũthela.
19Mĩtĩ ĩla yĩtiala mũtitũnĩ wake ĩkeethĩwa yĩ mĩnini,
wĩthĩe o na kana no kamĩtale.
Ũtialo wa Ĩsilaeli Ũkamũsyokea Ngai
20Mũthenya ũsu, ũtialo wa andũ ma Ĩsilaeli, nzyawa sya Yakovo ila syĩvonoka, maikekwatya ĩngĩ nthĩ ĩla yamakũnie, ĩndĩ kwa w'o makamwĩkwatya Mwĩai Ngai, Ũla Mũtheu wa Ĩsilaeli. 21Ũtialo wa nzyawa sya Yakovo ũkamũsyokea Ngai ũla wĩ vinya. 22#Alo 9.27 O na kau andũ maku we Ĩsilaeli nĩ aingĩ ta kĩthangathĩ kĩla kĩ ũkanganĩ, no andũ anini makatiala na kũsyoka. Nĩkũvangĩtwe kwĩthĩwe wanangĩko na ũkeanĩw'a kwa ũlũngalu mũnene. 23Nĩkwĩthĩwa Mwĩai, ũla nĩwe Mwĩai Ngai Mwene Ũtonyi W'onthe akaananga nthĩ yonthe ũndũ weeaie kana akeeka.
24Kwoou Mwĩai, ũla nĩwe Mwĩai Ngai Mwene Ũtonyi W'onthe easya atĩĩ, “Inyw'ĩ andũ makwa ala mũtũaa Saioni, mũikakĩe Asuli ala mekũmũkũna na ndata, na kũmũkĩlĩlya ndata syoo o tondũ andũ ma Misili meekie. 25Nĩkwĩthĩwa ĩtina wa kavinda kanini ũthatu wakwa ĩũlũ wenyu nũkũthela na ũthatu wakwa mwingĩ ũimelekela nĩmamine.
26“Nyie Mwĩai Ngai Mwene Ũtonyi W'onthe ngookĩlĩlya Asuli mũsalisa na kũmakũna ũndũ nakũnĩie andũ ma Mitiani ĩvianĩ ya Olevu. Ngatambũũkya ndata yakwa ĩũlũ wa ũkanga na ngĩmakũna ũndũ nakũnie andũ ma Misili. 27Mũthenya ũsu, ngavetanga mũio ũla mamũkuĩthĩtye ituonĩ syenyu, na ĩsoki yoo yĩla mamwovete ngingo yĩkatũlwa.”#10.27 Maandĩko Matheu kĩthyomonĩ kya Kĩevelania mena ndeto ingĩ ikwasya ĩsoki yĩkatũlwa nũndũ wa ũnou wenyu.
Amaitha Maivithũkĩa
Amaitha nĩmambatĩte kuma Limoni,
28nĩmokĩte Aiathi;
mesĩlĩte Mikiloni,
matiĩte mĩio yoo Mikimasi.
29Nĩmaminĩte kwĩsĩla ũlikĩlonĩ,
mekomela Ngeva ũtukũ;
andũ ma Lama metetema nĩ w'ĩa,
ala matũaa Ngivea ndũanĩ ya Saũlo nĩmasembete makakĩa.
30Inyw'ĩ andũ ma Ngalimu uai mbu!
Inyw'ĩ andũ ma Laisa ĩthukĩĩsyei!
Inyw'ĩ andũ ma Anathothi sũngĩai!
31Andũ ma Matimena nĩmasembete makĩĩte,
ala matũaa Ngevimu nĩmasembete makevithe.
32Ũmũnthĩ mũmaitha nũkũvika Novu,
nũkũthingithĩsya Kĩĩma kya Saioni ngundi,
ĩĩ, kĩĩma kya Yelũsalemu.
33Mwĩai, ũla nĩwe Mwĩai Ngai Mwene Ũtonyi W'onthe,
akatemanga mbonge na vinya wa kũtĩsya;
ala aasa makavalũkw'a,
ala meng'athĩlĩĩlasya makanyivw'a.
34Akatema ikuthu syĩ mũtitũnĩ na ĩthoka,
na mĩtĩ mĩnene ya Levanoni ĩkavalũkangw'a.
Currently Selected:
Ĩsa 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
