Popular Bible Verses from Ĩsa 11

Share

Veva wa Mwĩai Ngai akeethĩwa nthĩnĩ wake, Veva wa ũĩ na ũmanyi, Veva wa ũtao na vinya, Veva wa kũmanya na kũmũkĩa Mwĩai Ngai. Akatanaw'a nĩ kwĩthĩwa e na kĩkĩo kya Mwĩai Ngai. Ndakasilĩlaa kwĩanana na ũndũ ũkwona, kana aumye ũtw'ĩo kwĩanana na ũndũ ũkwĩw'a

O tondũ nthongoo na mbonge ithongooaa kuma kĩtinanĩ kya mũtĩ, now'o kũkauma ũmwe nzyawanĩ sya Yese.

ĩndĩ akasilĩlaa ngya na ũlũngalu, na aitũmĩa sila wa katĩ akaumya ũtw'ĩo kwondũ wa ala auu ĩũlũ wa nthĩ. Akakũnaa nthĩ aitũmĩa ndeto syake, na ndeto ila wĩneenaa ikooaa ala athũku.

Ũlũngalu ũkeethĩawa ta w'o mũsivi wake wa kwĩyova, na ũĩkĩĩku ũkeethĩawa ta mũsivi kĩnyunyunĩ kyake.

Kĩĩmanĩ kĩtheu kya Mwĩai Ngai, kũikethĩwa kũũmĩany'a kana kwĩkana naĩ, nĩkwĩthĩwa nthĩ ĩkeethĩwa yusũĩte ũmanyi wa Mwĩai Ngai, o tondũ ũkanga wusũĩte kĩw'ũ.

Nzũi ĩkekalanasya na katena ka ĩlondu, na kĩkoyo kĩkatindiaa vamwe na katena ka mbũi, kasaũ na mũnyambũ ikaĩsanĩaa vamwe, na kana kanini kakaitongoesya.

Mũthenya ũsu nthongoo ya Yese, ĩla nĩ nzyawa yake ĩkaũngama ta wonany'o kwa andũ onthe. Mbaĩ syonthe sya andũ ikamũatĩĩa, na wĩkalo wake ũkeethĩwa wĩ wa kũkumw'a.