Mũta 3

Kĩla Ũndũ wĩ Ĩvinda Yaw'o

1Ngai nĩwatwie kĩla ũndũ ĩũlũ wa nthĩ wĩkĩkae ĩvindanĩ yaw'o, na kĩla ĩvinda yĩthĩawe na ũndũ wayo.

2Ĩvinda ya kũsyawa na ĩvinda ya kũkw'a,

ĩvinda ya kũvanda na ĩvinda ya kũketha.

3Ĩvinda ya kũaa na ĩvinda ya kũvosya,

ĩvinda ya kũomboa na ĩvinda ya kwaka.

4Ĩvinda ya kũĩa na ĩvinda ya kũtheka,

ĩvinda ya kyeva na ĩvinda ya kũsũnga.

5Ĩvinda ya kwĩkya mavia na ĩvinda ya kũmbany'a mavia.

Ĩvinda ya kũkethany'a ngethi ya wendo, na ĩvinda ya kũlea kũkethany'a ngethi ya wendo.

6Ĩvinda ya kũmantha na ĩvinda ya kwasya,

ĩvinda ya kũsũvĩa na ĩvinda ya kwĩkya,

7Ĩvinda ya kũtembũa na ĩvinda ya kũtuma,

ĩvinda ya kũvindya na ĩvinda ya kũneena.

8Ĩvinda ya kwenda na ĩvinda ya kũmena,

ĩvinda ya kaũ na ĩvinda ya mũuo.

9Mũndũ akwataa ũtethyo mwaũ kumana na wĩa wake mũito? 10Nĩnonete kana Ngai nũnengete andũ mũio mũnene. 11Nũtumaa kĩla ũndũ wĩthĩwa wĩ mũseo weekwa ĩvindanĩ yaw'o. Nũtumaa twĩthĩwa na wendi wa kũmanya maũndũ ma ĩvinda yĩla yũkĩte. Ĩndĩ vai ũmwe ũtonya kũelewa vyũ nĩ maũndũ ala wĩkaa. 12Kwoou nĩnamanyie kana ũndũ ũla mũseo kwa mũndũ nĩ kwĩthĩwa na ũtanu, na kwĩka ũndũ ũla waĩlĩte ĩvindanĩ yĩla wĩ thayũ. 13O ĩngĩ nĩnamanyie kana Ngai nũnengae andũ mũthĩnzĩo wa kũya na kũnyw'a na kũtana ĩtina wa kũtethya wĩa.

14O ta ũu nĩnĩsĩ kana maũndũ ala Ngai wĩkaa mekalaa tene na tene. Mayongeleelwa kana makaolwa kĩndũ. Ngai avangie ũu nĩ kana andũ onthe mamũkĩe. 15Maũndũ ala mekw'o, maĩ o kw'o, o na ala makoka o namo maĩ o kw'o. Ngai nũtumaa maũndũ asu mekĩka kwa kwĩtũngĩlĩĩla ĩngĩ na ĩngĩ.

Ũsili ũte wa Katĩ Ĩũlũ wa Nthĩ

16O ta ũu nĩnĩmanyĩte kana ĩũlũ wa nthĩ kũla ũsili wa katĩ na ũlũngalu syaĩlĩte kwĩthĩwa, kwĩthĩawa ũthũku. 17Nĩvo ĩndĩ nasũanĩie kana Ngai akasilĩla ala alũngalu na ala athũku, nũndũ nũnyuvĩte ĩvinda ya kĩla ũndũ na ya kũtethya kĩla wĩa. 18Nĩnasyokie nasũanĩa kana Ngai nũthimaa andũ amony'e kana mo no ta nyamũ sya kĩthekanĩ. 19Nĩkwĩthĩwa maũndũ ala makwataa andũ nĩmakwataa nyamũ sya kĩthekanĩ o ta ũu; andũ nĩmakusaa, nasyo no ikusaa. Andũ me thayũ, na nyamũ o nasyo syĩ thayũ; kwoou mũndũ nde na kĩtumi kya kwĩkathĩĩa ĩũlũ wa nyamũ, nũndũ maũndũ asu onthe no mana. 20Mũndũ na nyamũ maendaa o vandũ vamwe; onthe maumie kĩtoonĩ na masyokaa kĩtoonĩ o ta ũu. 21Nũũ wĩsĩ kana thayũ wa mũndũ wambataa na ĩũlũ naw'o thayũ wa nyamũ ũitheea kũndũ naku nthĩ? 22Kwoou nĩnamanyie kana vai ũndũ ũseo kũvĩtũka mũndũ kũtanĩa syĩndũ ila ũkwatĩte kumana na wĩa wake, nũndũ yĩu nĩyo ĩtuvi yake. Vai mũndũ ũtonya kũmanya kĩla kĩkekĩka ĩtina wa kĩkw'ũ kyake.

Currently Selected:

Mũta 3: KAMBA

Highlight

Copy

Compare