2Asu 22

Yosia Mũsumbĩ wa Yuta

(2Mav 34.1-2)

1 # Yel 3.6 Yosia atw'ĩkie mũsumbĩ wa Yuta e na ũkũũ wa myaka nyanya. Asumbĩkie vandũ va myaka mĩongo ĩtatũ na ũmwe e Yelũsalemu. Inyia wake eetawa Yetita mwĩĩtu wa Ataia, kuma ndũanĩ ya Mbosikathi. 2Yosia nĩweekaa maũndũ ala mamwendeeasya Mwĩai Ngai. Nĩweekaa maũndũ ala ũmae wake Ndeviti weekaa, na nĩweanĩasya na kĩthito mĩao yonthe ya Mwĩai Ngai.

Kwoneka kwa Ĩvuku ya Mĩao

(2Mav 34.8-28)

3Mwakanĩ wa ĩkũmi na nyanya wa kũsumbĩka kwake, Mũsumbĩ Yosia nĩwatũmie mũandĩki Savani mwana wa Asalia, mwĩsũkũũe wa Mesulamu, Ĩkalũnĩ aimwĩa atĩĩ, 4“Enda kũla kwĩ Mũthembi Mũnene Ilikia, ũkamwĩe nĩatale mbesa ila ietetwe nyũmbanĩ ya Mwĩai Ngai, na syũmbanĩtw'e kuma andũnĩ nĩ athembi ala mathũkũmaa mũvĩanĩ wa Ĩkalũ. 5Mwĩe nĩanenge mbesa isu andũ ala maũngamĩe wĩa Ĩkalũnĩ, nĩ kana maĩve athũkũmi ala meũseũvya Ĩkalũ kũla kwanangĩku. 6Andũ asu nĩ ala maseũvasya syĩndũ sya mbwaũ, aki, na ala makaa na mavia. Nĩmatũmĩe mbesa isu kũthooa mbwaũ na mavia mase nesa, ma kũseũvya kũla kwanangĩku. 7#2Asu 12.15 Andũ asu maũngamĩe wĩa wa Ĩkalũ nĩ aĩkĩĩku vyũ, na kwoou vai vata wa kũmanya ũtalo wa ũndũ mbesa isu ĩtũmĩkĩte.”

8Ilikia Mũthembi Mũnene nĩweeie mũandĩki Savani atĩĩ, “Nĩnonie ĩvuku ya mĩao Ĩkalũnĩ ya Mwĩai Ngai.” Ilikia nĩwanengie Savani ĩvuku yĩu nake ayĩsoma. 9Nĩvo ĩndĩ Savani wasyokie kũla kwĩ mũsumbĩ na amwĩa atĩĩ, “Athũkũmi maku nĩmosie mbesa ila syĩĩ Ĩkalũnĩ, na mainenga andũ ala maũngamĩe wĩa wa kũseũvya kũndũ kũla kwanangĩku Ĩkalũnĩ.” 10Savani nĩwaendeeie kũneena na mũsumbĩ amwĩa atĩĩ, “Mũthembi Ilikia nĩwanenga ĩvuku.” Nĩwasomeie mũsumbĩ ĩvuku yĩu.

11Yĩla mũsumbĩ weewie ndeto sya ĩvuku yĩu ya mĩao, nĩwatembũangie ngũa syake nĩ kyeva. 12Mũsumbĩ nĩweeaĩie mũthembi Ilikia, Aikamu mwana wa Savani, Akivoli mwana wa Mikaia, mũandĩki Savani, na Asaia mũthũkũmi wa mũsumbĩ amea atĩĩ, 13“Endai mũkakũlye Mwĩai Ngai ũtao, kwondũ wakwa na kwondũ wa andũ onthe ma Yuta, ĩũlũ wa momanyĩsyo ma ĩvuku yĩĩ. Mwĩai Ngai nũthatĩtw'e nĩ ithyĩ, nũndũ aaũmae maitũ mayaaĩka maũndũ ala ĩvuku yĩĩ yaĩtye kana nĩmaĩlĩte kwĩkwa.”

14Kwoou mũthembi Ilikia, Aikamu, Akivoli, Savani na Asaia nĩmaendie kũla kwĩ mwathani wa mũndũ mũka weetawa Ulita. Ulita aĩ kĩveti kya Salumu mwana wa Tikiva, mwĩsũkũũe wa Aliasi. (Salumu nĩwe wasũvĩaa vala vaiawa ngũa ila syatũmĩawa Ĩkalũnĩ.) Ulita atwĩe Yelũsalemu Ũtũinĩ wa Kelĩ. Nĩmatavisye mũndũ mũka ũsu maũndũ onthe ala meekĩkĩte, 15na amea masyoke kwa mũsumbĩ makamwĩe 16Mwĩai Ngai easya atĩĩ, “Nĩngũkany'a Yelũsalemu na andũ onthe ala matwĩe vo, o tondũ kũandĩkĩtwe ĩvukunĩ yĩla mũsumbĩ wasoma. 17Nĩmandekete na makavĩvĩsya ngai sya mĩvw'anano ũvani, na makanthatya nũndũ wa maũndũ onthe ala mekĩte, na kwoou ngamakany'a na ndikamaekea. 18Ĩndĩ kwondũ wa mũsumbĩ wa Yuta ũla ũmũtũmie mũkakũlye ũtao kwa Ngai, endai mũkamũtavye kana ũũ nĩw'o nyie Mwĩai Ngai, Ngai wa Ĩsilaeli, ngwasya ĩũlũ wa ndeto ila ũneewie: 19‘Nũndũ nũnaumbũlile na weenyivya mbee wakwa, wamina kwĩw'a kana nĩmbangĩte kũkany'a Yelũsalemu na ala matwĩe vo, na kana makatw'ĩka andũ aumanĩe na mate vata, na nũndũ nũnatembũangie ngũa syaku na waĩa wĩ mbee wakwa, nĩneew'a mboya syaku. Nĩasya ũu nyie Mwĩai Ngai. 20Kwoou ũkakw'a na ũithikwa na mũuo. Ndũkona thĩna ũla ngaete vandũnĩ vaa.’ ”

Andũ asu nĩmasyokie kũla kwĩ mũsumbĩ na mamũtavya ũtũmani ũsu.

Currently Selected:

2Asu 22: KAMBA

Highlight

Copy

Compare