2Asu 21

Manase Mũsumbĩ wa Yuta

(2Mav 33.1-20)

1Manase atw'ĩkie mũsumbĩ e na ũkũũ wa myaka ĩkũmi na ĩlĩ. Asumbĩkie vandũ va myaka mĩongo ĩtano na ĩtano e Yelũsalemu. Inyia wake eetawa Evisiva. 2#Yel 15.4 Nĩweekie maũndũ ala matamwendeeasya Mwĩai Ngai; eekie maũndũ mathũku ala meekawa nĩ andũ ma mbaĩ ila Mwĩai Ngai walũngilye syauma nthĩ ya Kanaani, andũ ma Ĩsilaeli maendee kũlika nthĩ ĩsu. 3Nĩwaakie ĩngĩ kũndũ kwa kũthaithĩa iĩmanĩ ĩũlũ, kũla Esekia ĩthe wake waanangie. Nĩwaakie ithembeo sya ngai ĩla yĩtawa Mbaali, na aseũvya mũvw'anano wa ngai nga ĩla yĩtawa Asela, o tondũ Aavu mũsumbĩ wa Ĩsilaeli weekie. O ta ũu Manase nĩwathaithaa ndata. 4#2Sam 7.13 Nĩwaakie ithembeo sya ngai sya mĩvw'anano Ĩkalũnĩ, vala Mwĩai Ngai waĩtye aĩlĩte kũthaithĩawa. 5Nĩwaakie ithembeo sya kũthaithĩa ndata iwanzanĩ syelĩ sya Ĩkalũ. 6Nĩwathembie mwana wake mwene ethĩwe nthembo ya kũvĩvw'a. O ta ũu nĩwaũasya, na kũingya nyũnyi, na nĩwakũlasya ala mamanyaa maũndũ kwĩsĩla mavevanĩ ma andũ ala makwie, na ala monaa maũndũ mawoninĩ. Nĩweekie maũndũ mathũku matamwendeeasya Mwĩai Ngai, na kwoou amũthatya mũno. 7#1Asu 9.3-5; 2Mav 7.12-18 Nĩwoosie mũvw'anano wa ngai nga ĩla yĩtawa Asela, ũla waseũvĩtye awĩnzĩla Ĩkalũnĩ, vala Mwĩai Ngai waneenete na Ndeviti na mwana wake Solomoni akamea atĩĩ, “Vaa Yelũsalemu, Ĩkalũnĩ yĩĩ, nĩvo nĩnyuvĩte katĩ wa isio syonthe sya mbaĩ ĩkũmi na ilĩ sya Ĩsilaeli, vethĩwe vandũ vala naĩlĩte kũthaithĩawa. 8Ethĩwa andũ ma Ĩsilaeli makaatĩĩaa mĩao yakwa yonthe, na kwĩanĩasya mĩao yonthe ĩla Mwose mũthũkũmi wakwa wamanengie, ndikaaeka malũngw'e maume nthĩ ĩla nanengie aaũmae moo.” 9Ĩndĩ andũ ma Yuta mayaamwĩw'a Mwĩai Ngai. Manase nĩwamatongoeisye kwĩka naĩ nthũku, o na mbee wa ila syeekiwe nĩ andũ ma nthĩ ila Mwĩai Ngai walũngilye nthĩ ya Kanaani, nĩ kana andũ ma Ĩsilaeli malike vo.

10Mwĩai Ngai nĩwaneenie aitũmĩa athũkũmi make athani asya atĩĩ, 11“Manase mũsumbĩ wa Yuta nĩwĩkĩte naĩ nthũku mũno. Nĩwĩkĩte naĩ nthũku mbee wa ũndũ Aamoli ala maĩ mbee wake meekie, na akatongoesya andũ ma Yuta kwĩka naĩ ya kũthaitha ngai sya mĩvw'anano. 12Kwoou nyie Mwĩai Ngai, Ngai wa Ĩsilaeli, ngaete ũthũku Yelũsalemu na Yuta, nĩ kana andũ onthe ala meĩw'a ĩũlũ waw'o maseng'e. 13Ngakany'a Yelũsalemu o tondũ neekie Samalia, na o tondũ neekanie na Aavu mũsumbĩ wa Ĩsilaeli na nzyawa syake. Ngavangũla Yelũsalemu ũndũ mũndũ ũvangũlaa ĩsaani na kũyĩkulumany'a. 14Ngatia andũ makwa ala makatiala, na ngĩmanengane kũla kwĩ amaitha moo. Makasindwa na kũvenwa syĩndũ syoo syonthe, 15nũndũ nĩmekĩte maũndũ ala matambendeeasya, na makatuma nĩthata kuma mũthenya ũla aaũmae moo maumie nthĩ ya Misili kũvika ũmũnthĩ.”

16Vamwe na maũndũ asu, Manase nĩwooaie andũ aingĩ mataĩ na ĩvĩtyo, weethĩa nthakame yoo yĩtĩkĩte kĩla vandũ ndũanĩ ya Yelũsalemu. Eekie ũu ĩtina wa kũtongoesya andũ ma Yuta mamũvĩtĩsye Mwĩai Ngai, kwa kũthaitha ngai sya mĩvw'anano.

17Maũndũ ala angĩ onthe Manase weekie yĩla wasumbĩkĩte, vamwe na naĩ ila weekie, maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta. 18Manase nĩwakwie na athikwa mbũanĩ yaĩ mũũndanĩ wake wa kĩ-ũsumbĩ, ũla weetawa Mũũnda wa Usa. Mwana wake Amoni nĩwatw'ĩkie mũsumbĩ ĩtina wake.

Amoni Mũsumbĩ wa Yuta

(2Mav 33.21-25)

19Amoni atw'ĩkie mũsumbĩ wa Yuta e na ũkũũ wa myaka mĩongo ĩlĩ na ĩlĩ. Asumbĩkie vandũ va myaka ĩlĩ e Yelũsalemu. Inyia wake eetawa Mesulemethi, mwĩĩtu wa Aalusi kuma ndũanĩ ya Yotiva. 20Amoni nĩwavĩtĩisye Mwĩai Ngai o tondũ Manase ĩthe wake weekie. 21Eekie maũndũ onthe ala ĩthe wake weekaa; nĩwathaithaa na kũthũkũma ngai sya mĩvw'anano ila ĩthe wake wathaithaa. 22Nĩwaleile Mwĩai Ngai, Ngai wa aaũmae make, na alea kwĩka maũndũ ala mamwendeeasya.

23Anini ma Amoni nĩmamũseũvĩisye mũvango mũthũku, na mamũaĩa nyũmbanĩ yake ya kĩ-ũsumbĩ. 24Nĩvo ĩndĩ andũ ma Yuta mooaie andũ ala mamũaie, na matw'ĩkĩthya Yosia mwana wake mũsumbĩ ĩtina wake.

25Maũndũ ala angĩ onthe Amoni weekie yĩla wasumbĩkĩte, maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta. 26Amoni athikiwe mbũanĩ yake yaĩ Mũũndanĩ wa Usa, na mwana wake Yosia atw'ĩka mũsumbĩ ĩtina wake.

Currently Selected:

2Asu 21: KAMBA

Highlight

Copy

Compare