2Asu 23

Yosia Ayananga Kũndũ kwa Kũthaithĩa Mĩvw'anano

(2Mav 34.3-7,29-33)

1Mũsumbĩ Yosia nĩweetie atongoi onthe ma Yuta na ma Yelũsalemu mombane vamwe. 2Nĩwambatie Ĩkalũnĩ e vamwe na andũ ma Yuta na ma Yelũsalemu, athembi na athani, na andũ ala angĩ onthe anene na anini. Nĩwamasomeie methukĩĩsye ndeto syonthe sya Ĩvuku ya Ũtianĩo yĩla yeethĩiwe Ĩkalũnĩ. 3Mũsumbĩ nĩwaũngamie vakuvĩ na kĩtuĩ na aseũvya ũtianĩo na Mwĩai Ngai kana akamwĩw'aa na kwĩanĩasya mĩao, mokũsĩ na motw'ĩo make na ngoo yake yonthe na thayũ wake w'onthe, na o ta ũu akeekaa ũndũ ndeto sya ũtianĩo ũsu, ila iandĩkĩtwe ĩvukunĩ yĩu ikwasya. Andũ onthe nĩmeetĩkĩlanile na ũtianĩo ũsu.

4 # 2Asu 21.3; 2Mav 33.3 Ĩtina wa ũu mũsumbĩ nĩweeaĩie Ilikia Mũthembi Mũnene, na athembi ala angĩ matetheanĩasya nake, na asikalĩ ala masungaa mũvĩanĩ wa Ĩkalũ, maumaalye kuma Ĩkalũnĩ syĩndũ syonthe, ila syaseũvĩtw'e kwondũ wa kũthaitha ngai sya mĩvw'anano: Mbaali, Asela na ndata. Nĩwaivĩvĩisye nza wa ndũa ya Yelũsalemu, isesinĩ sya mwanda wa Kĩtilonĩ na akua mũu wasyo aũtwaa Mbethi-eli. 5O ta ũu nĩwavetangie athembi onthe ma ngai sya mĩvw'anano, ala manyuvĩtwe nĩ asumbĩ ma Yuta mavĩvĩasye ũvani kũndũnĩ kwa kũthaithĩa ndũanĩ sya Yuta, na kũndũ kũla kũthyũlũlũkĩte ndũa ya Yelũsalemu. Athembi asu nĩ ala mavĩvĩasya ũvani ngai sya Mbaali, syũa na mwei, na syĩndũ ila syĩ yayayanĩ na ndata. 6Nĩwaumisye mũvw'anano wa ngai nga ĩla yĩtawa Asela Ĩkalũnĩ, na athi kũũvĩvĩsya nza wa ndũa kalũsĩnĩ ka Kĩtilonĩ. Nĩwaũtumbatumbie watw'ĩka kĩtoo, na akĩnyaĩĩkya ĩũlũ wa mbũa ila syathikawa andũ. 7O ta ũu nĩwaanangie kũndũ kũla kwekalaa malwaya ma kĩ-ũthaithi#23.7 malwaya ma kĩ-ũthaithi: Sisya Ali 19.19 Ĩkalũnĩ. (Vaa nĩvo aka matumĩaa ngũa ndaasa, ila syatũmĩawa ũthaithinĩ wa ngai nga yĩtawa Asela.) 8Yosia nĩwoombanisye athembi onthe kuma ndũanĩ sya Yuta amaete Yelũsalemu, na avukya kũndũ kwa kũthaithĩa, kuma Ngeva kũthi kũvika Mbeeli-sieva, kũla athembi asu mavĩvĩasya ũvani. Nĩwaanangie kũndũ kwa kũthaithĩa mĩvw'anano kũla kwaĩ mĩvĩanĩ; kũndũ kũla kwaĩ ũlikĩlonĩ wa mũvĩa ũla waakiwe nĩ Yosua ngavana wa ndũa, na waĩ ngalĩko ya kw'oko kwa aka kwa ndũa. 9Athembi ala mathũkũmaa kũndũnĩ kũu kwa kũthaithĩa, mayaathũkũma kĩthembeonĩ kya Mwĩai Ngai kĩla kĩ Yelũsalemu, ĩndĩ nĩmaĩsaa mũkate ũuĩtwe ũte mbota me vamwe na athembi ala angĩ.

10 # Ali 18.21; Yel 7.31; 19.1-6; 32.25 O ta ũu Mũsumbĩ Yosia nĩwavukisye vandũ va kũthaithĩa vala veetawa Tovethi, Mwandanĩ wa Mbeni-inomu, weethĩa vai mũndũ o na wĩva ũtonya kũvĩvya mwana kana mwĩĩtu wake, atw'ĩke nthembo ya kũvĩvw'a ĩthembewe ngai ĩla yĩtawa Moleki. 11Nĩwavetangie mbalasi ila asumbĩ ma Yuta mavathĩte makanengane kwondũ wa kũthaitha syũa, ila syaĩ mũvĩanĩ wa Ĩkalũ, vakuvĩ na nyũmba ya mũthũkũmi weetawa Nathani-meleki, ĩla yaĩ kĩwanzanĩ kĩla kyaĩ nza wa Ĩkalũ. Yosia nĩwavĩvisye makasya ma kaũ, ala mavathĩtwe kwondũ wa kũthaitha syũa. 12#2Asu 21.5; 2Mav 33.5 O ta ũu nĩwaanangie ithembeo ila asumbĩ ma Yuta maakĩte kĩalanĩ kya nyũmba ya ĩũlũ ya mũsumbĩ Aasu, na ila Manase waakĩte iwanzanĩ ilĩ sya Ĩkalũ. Nĩwaivetangie vau na aitumbatumba syatw'ĩka ilungu, na asyĩkya kalũsĩnĩ ka Kĩtilonĩ. 13#1Asu 11.7 Yosia nĩwavukisye kũndũ kwa kũthaithĩa kũla Mũsumbĩ Solomoni waseũvĩtye wumĩlonĩ wa syũa wa ndũa ya Yelũsalemu, ngalĩko ya ĩtheo ya Kĩĩma kya Mĩthata.#23.13 Kĩĩma kya Mĩthata: Kĩthyomo kya Kĩevelania kyaĩtye Kĩĩma kya Wanangĩko kana Kĩĩma kya Naĩ. Kũu nĩ kũla Solomoni Mũsumbĩ wa Ĩsilaeli waseũvĩtye kwondũ wa kũthaitha ngai sya kũthatya ĩla nĩsyo Asetelothi ngai nga ya Asitoni, Kemosi ngai ya Amoavi, na Moleki ngai ya Aamimoni. 14Nĩwatũlangile ituĩ sya ũthaithi syatw'ĩka ilungu, na atemanga mĩvw'anano ya ngai nga yĩtawa Asela, na ausũsya na mavĩndĩ ma andũ kũla syĩndũ isu syaĩ.

15 # 1Asu 12.33 O ta ũu Yosia nĩwaanangie kĩthembeo kĩla kyaĩ Mbethi-eli, kĩla kyaakĩtwe nĩ Yelovoamu mwana wa Nevati, ũla watumie andũ ma Ĩsilaeli malika naĩnĩ. Nĩwaanangie kĩthembeo kĩu vamwe na vandũ va kũthaithĩa, na atumbatumba mavia masyo matw'ĩka kĩtoo, na avĩvya kĩtuĩ kya mũvw'anano wa Asela. 16#1Asu 13.2 Nĩvo ĩndĩ Yosia weethyũũie na oona mbũa kĩĩmanĩ. Nĩwatũmanie mavĩndĩ ma andũ ala mathikĩtwe mbũanĩ isu makaumw'e, na amavĩvĩsya kĩthembeonĩ akĩvukye, kwĩanana na ndeto ya Mwĩai Ngai, ĩla mwathani wawetete kana maũndũ asu makeekĩka. 17#1Asu 13.30-32 Yosia nĩwakũlilye atĩĩ, “Mbũa ĩya ngwona nĩ yaũ?”

Andũ ma Mbethi-eli nĩmamũsũngĩie mamwĩa, “Nĩ ya mwathani waumĩte Yuta, ũla wathanie ĩũlũ wa maũndũ ala we weeka kĩthembeo kya Mbethi-eli.”

18Yosia nĩwameie atĩĩ, “Ekanai nayo; vai mũndũ waĩlĩte kumya mavĩndĩ ma mwathani ũsu.”

Kwoou mavĩndĩ ma mwathani ũsu na ma mwathani ũla waumĩte Samalia mayaaumw'a mbũanĩ.

19Yosia nĩwaanangie na avukya ithembeo syonthe, ila syaĩ kũndũnĩ kwa kũthaithĩa ngai sya mĩvw'anano iĩmanĩ ĩũlũ, ila syaseũvĩtw'e nĩ asumbĩ ma Ĩsilaeli ndũanĩ sya Samalia, na ikatuma Mwĩai Ngai athata. Eekanie na ithembeo isu o ũndũ weekanĩte na kĩla kyaĩ Mbethi-eli. 20Nĩwooaĩie athembi ala maĩ kũndũnĩ kũu kwa kũthaithĩa ngai sya mĩvw'anano ithembeonĩ isu, na avĩvĩsya mavĩndĩ ma andũ ĩũlũ wasyo. Nĩvo ĩndĩ wasyokie Yelũsalemu.

Yosia Aitanĩa Mboka ya Vasaka

(2Mav 35.1-9)

21Mũsumbĩ Yosia nĩweeaĩie andũ onthe amea atĩĩ, “Tanĩai Mboka ya Vasaka kwondũ wa kũnenga Mwĩai Ngai wenyu ndaĩa, kwĩanana na ũndũ kũandĩkĩtwe Ĩvukunĩ ya Ũtianĩo.” 22Vai Mboka ya Vasaka ĩilyĩ ũu yaatanĩwa, kuma ĩvinda yĩla nthĩ ya Ĩsilaeli yatongoew'e nĩ Asili, kana yĩla yasumbĩkĩtwe nĩ asumbĩ ma Ĩsilaeli na ma Yuta. 23Mwakanĩ wa ĩkũmi na nyanya wa kũsumbĩka kwa Yosia, mboka ĩsu ya Vasaka nĩyatanĩiwe Yelũsalemu kwondũ wa kũnenga Mwĩai Ngai ndaĩa.

Moalyũku angĩ ala Yosia Waetie

24Yosia nĩwavetangie kuma Yuta na Yelũsalemu andũ ala mamanyaa maũndũ kwĩsĩla mavevanĩ ma andũ ala makwie, ala maaũasya, ngai sya mĩvw'anano ila syaiawa nyũmba, mĩvw'anano, na syĩndũ syonthe sya kũthatya. Eekie ũu nĩ kana eanĩsye maũndũ ma mĩao, ĩla ĩandĩkĩtwe ĩvukunĩ yĩla mũthembi Ilikia weethĩie Ĩkalũnĩ. 25Vai mũsumbĩ ũngĩ ũilyĩ Yosia waaĩthĩwa mbee wake kana ĩtina wake, ũla wathũkũmie Mwĩai Ngai na thayũ, kĩlĩko na vinya wake w'onthe, na kũatĩĩa mĩao yonthe ya Mwose.

26Ĩndĩ ũu wĩ o vo, ũthatu mwingĩ ũla Mwĩai Ngai wathatĩie Yuta, nũndũ wa maũndũ ala Manase weekie ndwaathela. 27Kwoou Mwĩai Ngai nĩwaisye atĩĩ, “O tondũ navetangie andũ ma Ĩsilaeli mbee wakwa, now'o nĩvetanga andũ ma Yuta. O ta ũu nĩngũlea Yelũsalemu ndũa ĩla nanyuvie, na kũlea Ĩkalũ yĩĩ naneenie ũndũ wayo nasya atĩĩ, ‘Vau nĩvo naĩlĩte kũthaithĩawa.’ ”

Mũminũkĩlyo wa Kũsumbĩka kwa Yosia

(2Mav 35.20—36.1)

28Maũndũ ala angĩ Yosia weekie yĩla wasumbĩkĩte, maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta. 29Ĩvindanĩ yĩla Yosia waĩ mũsumbĩ, Neko mũsumbĩ wa Misili nĩwaendie Ũsĩnĩ wa Euvalati akatetheesye mũsumbĩ wa Asuli. Yosia nĩwaendie kũkita nake, ĩndĩ Neko nĩwamũaĩie kaũnĩ vandũ vetawa Mekito. 30Athũkũmi ma Yosia nĩmakuie mwĩĩ wake na ĩkasya ya kaũ maũtũnga Yelũsalemu, na athikwa vala asumbĩ mathikawa.

Andũ ma Yuta nĩmanyuvie Yeoaasi mwana wa Yosia, na mamwĩtĩkĩsya mauta atw'ĩka mũsumbĩ woo ĩtina wa ĩthe wake.

Yeoaasi Mũsumbĩ wa Yuta

(2Mav 36.2-4)

31Yeoaasi atw'ĩkie mũsumbĩ wa Yuta e na ũkũũ wa myaka mĩongo ĩlĩ na ĩtatũ. Asumbĩkie vandũ va ĩvinda ya myei ĩtatũ e Yelũsalemu. Inyia wake eetawa Amutali mwĩĩtu wa Yelemia ũla watwĩe ndũanĩ ya Livina. 32Nĩwavĩtĩisye Mwĩai Ngai o tondũ aaũmae make meekie. 33Neko mũsumbĩ wa Misili nĩwamũkwatie na amũtwaa e mwove ndũanĩ ya Livila nthĩ ya Amathi, nĩ kana ndakaendee kũsumbĩka e Yelũsalemu. O ta ũu Neko nĩwaumĩthisye nthĩ ya Yuta koti wa kĩlo ngili itatũ na maana ana sya silĩva, na kĩlo mĩongo ĩtatũ na inya sya thaavu. 34#Yel 22.11-12 Neko mũsumbĩ wa Misili nĩwatw'ĩkĩthisye Eliakimu mwana wa Yosia mũsumbĩ ĩtina wa Yosia, na aalyũla ĩsyĩtwa ya Eliakimu amwĩta Yeoiakimu. Ĩndĩ nĩwoosie Yeoaasi amũtwaa Misili vala wakw'ĩĩie.

Yeoiakimu Mũsumbĩ wa Yuta

(2Mav 36.5-8)

35Yeoiakimu nĩwoombanisye koti kuma kũla kwĩ andũ kwĩanana na ũthwii woo, nĩ kana eany'e mbesa ila syendekaa kwondũ wa kũĩva koti ũla weetĩtw'e nĩ mũsumbĩ wa Misili.

36 # Yel 22.18-19; 26.1-6; 35.1-19 Yeoiakimu atw'ĩkie mũsumbĩ wa Yuta e na ũkũũ wa myaka mĩongo ĩlĩ na ĩtano. Asumbĩkie vandũ va ĩvinda ya myaka ĩkũmi na ũmwe e Yelũsalemu. Inyia wake eetawa Nzevita mwĩĩtu wa Vetaia kuma ndũanĩ ya Luma. 37Yeoiakimu nĩwavĩtĩisye Mwĩai Ngai, o tondũ aaũmae make meekie.

Currently Selected:

2Asu 23: KAMBA

Highlight

Copy

Compare