2Mav 9
9
Mũsumbĩ Mũndũ Mũka wa Sieva Aithokea Solomoni
(1Asu 10.1-13)
1 #
Mat 12.42; Lk 11.31 Yĩla mũsumbĩ mũndũ mũka wa Sieva weewie nguma ya Solomoni, nĩwookie Yelũsalemu kũmũtata na makũlyo me vinya. Ookie e na andũ make aingĩ, vamwe na ngamĩle mbingĩ ikuĩte syĩndũ syĩ mũuke mũseo, thaavu mwingĩ, na mavia ma thooa mũnene. Yĩla wavikie vala ve Solomoni, mũsumbĩ ũsu nĩwakũlilye Solomoni makũlyo onthe ala waĩ namo. 2Solomoni nĩwasũngĩie makũlyo ma mũsumbĩ ũsu onthe; ndaaemwa nĩ kũelesya mũndũ mũka ũsu ũndũ o na wĩva. 3Yĩla mũsumbĩ ũsu mũndũ mũka wa Sieva weewie ũndũ Solomoni ũĩvĩte, na oona nyũmba ya kĩ-ũsumbĩ ĩla waakĩte, 4na yĩla woonie lĩu ũla waĩsawa mesanĩ yake, ũndũ anini make mekalaa, ũndũ athũkũmi ma vau kwa mũsumbĩ matethasya wĩa, ũndũ meekĩĩte ngũa iilyĩ, oona andũ ala manenganae ndivai kwa mũsumbĩ na ũndũ meekĩĩte ngũa iilyĩ, na oona nthembo sya kũvĩvw'a ila Solomoni wathembeie#9.4 nthembo sya kũvĩvw'a ila Solomoni wathembeie: Maandĩko ma Ndeto ya Ngai kĩthyomonĩ kya Kĩevelania maĩtye tũsũmba twake (Solomoni) twa ĩũlũ. (1Asu 10.5) Ĩkalũnĩ, nĩwasaanĩiw'e mũno vyũ.
5Mũsumbĩ ũsu mũndũ mũka nĩwaneenie na Solomoni amwĩa atĩĩ, “Ũvoo ũla neewie nĩ nthĩ yakwa ĩũlũ wa maũndũ ala wĩkĩte,#9.5 Ĩũlũ wa maũndũ ala wĩkĩte: Kana Ĩũlũ waku. na ũndũ wĩna ũĩ wingĩvĩte nĩ wa w'o! 6Ĩndĩ ndyaaĩkĩĩa maũndũ ũsu nataviw'e, nginya yĩla nĩnookie na neeyonea nyie mwene. Kwa w'o maũndũ ala nataviw'e ĩũlũ wa ũĩ waku o na maivika nyusu; we nũvĩtũkĩte mũno maũndũ asu neewie. 7Andũ maku#9.7 Andũ maku: sisya 1Asu 10.8 me vaati mũno! Athũkũmi maku ala mekalaa naku kĩla ĩvinda na me na mwanya wa kwĩw'a ndeto syaku sya ũĩ, me vaati mũno! 8Ataĩwe Mwĩai Ngai, Ngai waku, ũla wendeew'e nue, na akũtw'ĩkĩthya mũsumbĩ ũsumbĩke ĩsyĩtwanĩ yake. Nũndũ Ngai waku nĩwendete andũ ma Ĩsilaeli na nĩwendaa kũmeka nesa ĩvinda yonthe yĩla yũkĩte, nũkũtw'ĩkĩthĩtye mũsumbĩ woo nĩ kana wĩanĩasye sila wa katĩ na ũlũngalu.”
9Nĩvo ĩndĩ mũsumbĩ ũsu mũndũ mũka wanengie Solomoni mũthĩnzĩo wa thaavu wa kĩlo mbee wa ngili inya, syĩndũ mbingĩ mũno syĩ mũuke mũseo, na mavia me thooa mũnene. Vai ĩvinda yĩngĩ o na yĩva Solomoni waaetewe syĩndũ syĩ mũuke mũseo singĩvĩte ta isu wanengiwe nĩ mũsumbĩ ũsu mũndũ mũka wa Sieva.
10(Athũkũmi ma Ilamu na athũkũmi ma Solomoni ala maetae thaavu kuma Ovili o ta ũu nĩmaetae mĩtĩ ya mĩsandali na mavia ma thooa mũnene. 11Solomoni atũmĩie mĩtĩ ĩsu kũseũvya ngasi kwondũ wa Ĩkalũ ya Mwĩai Ngai, na kwondũ wa nyũmba yake ya kĩ-ũsumbĩ. O ta ũu nĩwatũmĩie mĩtĩ ĩsu kũseũvya ngitaa nini na ngitaa nene itũmĩawe nĩ aini. Vai syĩndũ ingĩ iilyĩ ta isu syaĩ syaaoneka nthĩ ya Yuta.)
12Mũsumbĩ Solomoni nĩwanengie mũsumbĩ ũsu mũndũ mũka wa Sieva syĩndũ syonthe ila wendeeiw'e nĩsyo na amwĩtya. Solomoni anengie mũsumbĩ ũsu mũndũ mũka syĩndũ mbingĩ mbee wa ila mũsumbĩ ũsu mũndũ mũka wamũeteete. Ĩtina wa ũu mũsumbĩ ũsu mũndũ mũka vamwe na anini make nĩmasyokie nthĩ yoo.
Ũthwii wa Mũsumbĩ Solomoni
(1Asu 10.14-29)
13Kĩla mwaka Solomoni nĩwaeteawe kĩlo ta ngili mĩongo ĩlĩ na itatũ sya thaavu. 14Thaavu ũsu ndweethĩawa ũtalanĩlw'e na koti wa thaavu na silĩva, ũla waumaw'a nĩ atandĩthya na athoosya ma syĩndũ, na kuma kwa asumbĩ onthe ma nthĩ sya Ũalavu na kuma kwa makavana ma nthĩ ya Ĩsilaeli. 15Solomoni nĩwaseũvisye ngao nene maana elĩ sya thaavu mũtumbatumbe; kĩla ĩmwe yaseũvĩtw'e na thaavu wa kĩlo ta mũonza. 16O ta ũu nĩwaseũvisye ngao ingĩ nini maana atatũ sya thaavu mũtumbatumbe; kĩla ĩmwe yaseũvĩtw'e na thaavu wa kĩlo ta itatũ. Nĩwaiie ngao isu syonthe Nyũmbanĩ ya Mũtitũ wa Levanoni.
17O ta ũu Mũsumbĩ Solomoni nĩwaseũvisye kĩvĩla kĩnene kya kĩ-ũsumbĩ aitũmĩa maeo ma nzou, na akyũmbĩĩa thaavu mũthei. 18Kĩvĩla kĩu kyaĩ na ngasi ya kwambata vala kĩĩ yaĩ na matambya thanthatũ, na kavĩla ka kũkinyĩthya maũũ ka thaavu. Ngalĩkonĩ syelĩ sya kĩvĩla kĩu kwaĩ na kũndũ kwa kwilĩĩla moko, na ũtee wakyo kwaĩ mavisa elĩ ma mĩnyambũ ĩũngamĩte; ũmwe ngalĩko ĩmwe na ũngĩ ngalĩko ĩla ĩngĩ. 19Ngasinĩ ĩsu vaĩ mavisa ĩkũmi na elĩ ma mĩnyambũ ĩũngamĩte. Mũnyambũ ũmwe ũũngamĩte mũthyanĩ wa ĩtambya yĩmwe ya ngasi ĩsu, na ũngĩ mũthyanĩ ũla ũngĩ. Vai kĩvĩla kĩngĩ kĩilyĩ ta kĩu kyaĩ kyaaseũvw'a ũsumbĩnĩ ũngĩ o na wĩva.
20Mĩio yonthe ya Solomoni ya kũnyw'ĩĩa syĩndũ yaseũvĩtw'e na thaavu, na mĩio yonthe ya Nyũmba ya Mũtitũ wa Levanoni yaseũvĩtw'e na thaavu mũthei. Vai mũio waseũvĩtw'e na silĩva, nũndũ ĩvindanĩ ya Solomoni silĩva woonekaa ta kĩndũ kĩte vata mũno. 21Solomoni aĩ na meli mbingĩ ila syaendaa nginya Talisisi, syĩ na athũkũmi ma Ulamu. Meli isu syasyokaa kuma Talisisi ĩvinda yĩmwe ĩtina wa myaka ĩtatũ ikuĩte thaavu, silĩva, maeo ma nzou, ngũlĩ, na nyũnyi syĩtawa taũsi.#9.21 nyũnyi syĩtawa taũsi: Maandĩko amwe maĩtye manani.
22Mũsumbĩ Solomoni aĩ na ũthwii na ũĩ mwingĩ mbee wa asumbĩ onthe ĩũlũ wa nthĩ. 23Asumbĩ onthe ĩũlũ wa nthĩ nĩmamanthaa ũndũ matonya kũvika vala ve Solomoni, nĩ kana methukĩĩsye ũĩ ũla Ngai wamũnengete. 24Kĩla ũmwe wa asumbĩ asu nĩwaeteae Solomoni mĩthĩnzĩo ya syĩndũ iseũvĩtw'e na silĩva na thaavu, ngũa, mĩio ya kaũ, syĩndũ syĩ mũuke mũseo, mbalasi na nyũmbũ. Solomoni nĩwaeteawe mĩthĩnzĩo ĩsu kĩla mwaka.
25 #
1Asu 4.26
Mũsumbĩ Solomoni aĩ na itũũ ngili inya#9.25 ngili inya: Ĩvuku ya 1Asu 4.26 yaĩtye ngili mĩongo ĩna sya kũvingĩa mbalasi sya kũkusya makasya ma kaũ, na asikalĩ ngili ĩkũmi na ilĩ ma kũlĩsa mbalasinĩ.#9.25 ma kũlĩsa mbalasinĩ: kana ma makasya ma kaũ. Solomoni aiĩte asikalĩ amwe ndũanĩ ila syaiawa makasya ma kaũ, na angĩ akamaia Yelũsalemu vala wekalaa. 26#Mwa 15.18; 1Asu 4.21 Solomoni asumbĩkĩte asumbĩ onthe kuma Ũsĩnĩ wa Euvalati nginya nthĩ ya Avilisiti, na nginya mũvakanĩ wa nthĩ ya Misili. 27Ĩvindanĩ ya kũsumbĩka kwake, Solomoni nĩwatumie silĩva wĩthĩwa wĩ mwingĩ Yelũsalemu ta mavia, na o ta ũu atuma mĩtĩ ya mĩkũũ yĩthĩwa yĩ mingĩ ta mĩkũyũ ĩla yĩ nguumo wa iĩma sya Yuta. 28#Kũt 17.16 Solomoni aumasya mbalasi syake nthĩ ya Misili na kuma nthĩ ila ingĩ syonthe.
Kĩkw'ũ kya Mũsumbĩ Solomoni
(1Asu 11.41-43)
29Maũndũ ala angĩ Solomoni weekie yĩla wasumbĩkĩte, kuma ũla wa mbee kũvika wa mũthya, nĩmaandĩkĩtwe Maandĩkonĩ ma Mwathani Nathani, Wathaninĩ wa Aiya, ũla waumĩte Silo, na Mawoninĩ ma mwathani Ito, ala o ta ũu mawetete ĩũlũ wa mũsumbĩ wa Ĩsilaeli ũla weetawa Yelovoamu mwana wa Nevati. 30Solomoni asumbĩkie nthĩ ya Ĩsilaeli yonthe vandũ va myaka mĩongo ĩna e Yelũsalemu. 31Ĩtina wa ũu nĩwakwie na athikwa Ndũanĩ ya Ndeviti ĩthe wake. Leovoamu mwana wake nĩwatw'ĩkie mũsumbĩ ĩtina wake.
Currently Selected:
2Mav 9: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
