2Mav 10
10
Kũtilĩkana kwa Mbaĩ sya Ĩsilaeli
(1Asu 12.1-20)
1Leovoamu nĩwaendie Sekemu vala andũ ma Ĩsilaeli onthe moombanĩte mamũtw'ĩkĩthye mũsumbĩ. 2Yĩla Yelovoamu mwana wa Nevati weewie ũu, nĩwasyokie kuma Misili kũla waĩ anathi akĩĩte Mũsumbĩ Solomoni. 3Kwoou andũ ma Ĩsilaeli nĩmatũmanie Yelovoamu aketwe. Yelovoamu e vamwe na andũ ma Ĩsilaeli onthe nĩmaendie vala ve Leovoamu na mamwĩa atĩĩ, 4“Ĩthe waku Solomoni nũnatũthũkũmĩthasya wĩa wĩ vinya. Ĩndĩ ethĩwa nũũtũolangĩla wĩa ũsu na kũtũthũmũsya, nĩtũũkũthũkũma.”
5Leovoamu nĩwamasũngĩie amea atĩĩ, “Mwĩsyoka vala nĩĩ ĩtina wa mĩthenya ĩtatũ na ngamũsũngĩa.” Kwoou andũ asu nĩmaumie vau mathi.
6Nĩvo ĩndĩ Mũsumbĩ Leovoamu wakũlilye ũtao kuma kwa atumĩa ala mathũkũmaa Solomoni ĩthe wake ĩvindanĩ yonthe yĩla wasumbĩkĩte. Nĩwamakũlilye atĩĩ, “Mwĩnenga ũtao mwaũ nĩ kana nĩsũngĩe andũ aa?”
7Atumĩa asu nĩmamũsũngĩĩie mamwĩa atĩĩ, “Ethĩwa nũkwĩw'ĩa andũ aa tei na ũimendeesya kwa kũmasũngĩa nesa, nĩmeũtw'ĩka athũkũmi maku ĩvindanĩ yonthe yĩla yũkĩte.”
8Ĩndĩ Leovoamu nĩwaleile kũatĩĩa ũtao ũla wanengiwe nĩ atumĩa asu, na athi kũkũlya ũtao kũla kwĩ anake ala ma ĩika yake, ala mamũthũkũmaa. 9Nĩwakũlilye anake asu atĩĩ, “Inyw'ĩ mwĩnenga ũtao mwaũ nĩ kana tũsũngĩe andũ aa mangũlĩtye nĩmaolangĩle wĩa wĩ vinya ũla ĩthe wakwa ũnamathũkũmĩthasya?”
10Anake asu nĩmasũngĩie Leovoamu mamwĩa atĩĩ, “Enda ũkasũngĩe andũ asu makwĩĩte kana ĩthe waku anamathũkũmĩthasya wĩa wĩ vinya, na kwoou ũmaolangĩle wĩa ũsu ũmee atĩĩ, ‘Kyaa kyakwa kya mwela nĩ kĩthanthau mbee wa kĩnyunyu kya ĩthe wakwa. 11Ĩthe wakwa nũnamũthũkũmĩthasya wĩa wĩ vinya mũno, nakwa nĩngũtuma wĩa ũsu wĩthĩwa wĩ vinya mũno mbeange. Ĩthe wakwa anamũkũnaa na mĩsalisa, ĩndĩ nakwa ngamũkũnaa na mĩsalisa yĩ mĩw'a.’ ”
12Ĩtina wa mĩthenya ĩtatũ, Yelovoamu e vamwe na andũ onthe nĩmasyokie vala ve Mũsumbĩ Leovoamu, o tondũ wameaĩĩte. 13Mũsumbĩ nĩwaleile kũatĩĩa ũtao ũla wanengiwe nĩ atumĩa, na asũngĩa andũ asu e na ũng'endu mwingĩ. 14Nĩwaatĩĩie ũtao ũla wanengiwe nĩ ala anake ma ĩika yake na amea atĩĩ, “Ĩthe wakwa anamũthũkũmĩthasya wĩa wĩ vinya, ĩndĩ nyie nĩngũtuma wĩa ũsu wĩthĩwa wĩ vinya mũno mbeange. Ĩthe wakwa anamũkũnaa na mĩsalisa, ĩndĩ nyie ngamũkũnaa na mĩsalisa yĩ mĩw'a!” 15Kwoou Mũsumbĩ Leovoamu nĩwaleile kwĩthukĩĩsya andũ, nũndũ kwaĩ kwenda kwa Ngai ũndũ ũsu wĩthĩwe, nĩ kana maũndũ ala Mwĩai Ngai waneenete na Yelovoamu mwana wa Nevati, kwĩsĩla kũla kwĩ mwathani Aiya wa kuma Silo meanĩw'e.
16 #
2Sam 20.1
Yĩla andũ onthe ma Ĩsilaeli moonie kana mũsumbĩ nĩwalea kũmethukĩĩsya, nĩmalonzanilye mayasya atĩĩ,
“Tũi na ngwatanĩo o na vanini na Ndeviti na mũsyĩ wake!
Tũi na kĩanda o na kĩmwe vala ve mwana wa Yese.
Inyw'ĩ andũ ma Ĩsilaeli, ĩnũkai!
We nzyawa ya Ndeviti, ĩsũvĩĩe mũsyĩ waku.”
Kwoou andũ ma Ĩsilaeli onthe nĩmenũkie. 17Leovoamu nĩwatiiwe asumbĩkĩte andũ ma Ĩsilaeli ala matwĩe ndũanĩ ila syaĩ kĩsionĩ kya nthĩ ya mbaĩ ya Yuta.
18Nĩvo ĩndĩ Mũsumbĩ Leovoamu watũmie Atonilamu, ũla waũngamĩe andũ ala mathũkũmĩthaw'a na vinya, nĩ kana athi kũla kwĩ andũ ma Ĩsilaeli, ĩndĩ nĩmamũkimangie na mavia akw'a. Leovoamu oona ũu, nĩwalĩsile mĩtũkĩ ĩkasyanĩ yake ya kaũ, na akĩa athi Yelũsalemu. 19Kuma ĩvindanĩ yĩu kũvika ũmũnthĩ, andũ ma Ĩsilaeli ala matwĩe ngalĩko ya ĩũlũ ya nthĩ ya Ĩsilaeli, methĩĩtwe maing'endea mũsyĩ wa kĩ-ũsumbĩ wa Ndeviti.
Currently Selected:
2Mav 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
