2Mav 8
8
Maũndũ Angĩ ala Solomoni Weekie
(1Asu 9.10-28)
1Ĩtina wa myaka mĩongo ĩlĩ, ĩla Solomoni wakuie kwaka Ĩkalũ ya Mwĩai Ngai, na nyũmba yake mwene ya kĩ-ũsumbĩ, 2nĩwaakie ĩngĩ ndũa ila Ilamu wamũnengete, na atwaa andũ ma Ĩsilaeli matũa nthĩnĩ wasyo. 3Solomoni nĩwavithũkĩie na akwata kĩsio kya nthĩ ya Amathi na ya Sova. 4Nĩwaakie ndũa ya Tandimoli weũnĩ, na aaka ndũa imwe Amathi nĩ kana aiae syĩndũ vo. 5O ta ũu nĩwaakie ndũa ya Mbethi-oloni ĩla yĩ ĩũlũ, na ndũa ya Mbethi-oloni ĩla yĩ ĩtheo syĩthĩwe ndũa mbiĩĩe, syĩ na ngũta, mĩvĩa, na syũma sya kũvinga mĩvĩa ĩsu. 6Nĩwaakie ndũa ya Mbaalathi na ndũa syake syonthe sya kwia syĩndũ, na ndũa kwondũ wa makasya make ma kaũ, na kwondũ wa asikalĩ make ma kũlĩsa mbalasinĩ. Nĩwaakie syĩndũ syonthe ila waĩ na vata nasyo nthĩnĩ wa Yelũsalemu, Levanoni, na kũndũ kw'onthe kũla ũsumbĩ wake wavikĩte. 7Andũ ala angĩ onthe matialĩte nthĩ ya Ĩsilaeli, ma mbaĩ ya Aititi, Aamoli, Avelisi, Aivi na Ayevusi (andũ asu mayaĩ ma Ĩsilaeli), 8ala nzyawa syoo andũ ma Ĩsilaeli mataaĩthĩwa matonya kũimina vyũ, nĩmo mathũkũmĩthiw'e na vinya nĩ Solomoni. Ũu now'o kũilyĩ kũvika o na ũmũnthĩ. 9Solomoni ndaatw'ĩkĩthya mũndũ o na wĩva wa Ĩsilaeli ngombo; nĩmo watw'ĩkĩthisye asikalĩ make ma kaũ, atongoi nthĩnĩ wa ũsumbĩ wake, anene ma asikalĩ ma makasya make ma kaũ, na asikalĩ ma kũlĩsa mbalasinĩ. 10Anene onthe ala maĩ ũsumbĩnĩ wa Solomoni, ala maũngamĩe andũ ala matethasya wĩa maĩ maana elĩ na mĩongo ĩtano.
11Mũsumbĩ Solomoni nĩwathamisye mũka wake, ũla waĩ mwĩĩtu wa mũsumbĩ wa Misili, amumya Ndũanĩ ya Ndeviti amũtwaa nyũmbanĩ ya kĩ-ũsumbĩ ĩla wamwakĩĩte. Eekie ũu ayasya atĩĩ, “Mũka wakwa ndaĩlĩte kwĩkala nyũmbanĩ ya kĩ-ũsumbĩ ya Ndeviti mũsumbĩ wa Ĩsilaeli, nũndũ kũndũ kw'onthe kũla Ĩsandũkũ ya Mwĩai Ngai yalikile nĩ kũtheu.”
12Mũsumbĩ Solomoni nĩwathembeie Mwĩai Ngai nthembo sya kũvĩvw'a ĩũlũ wa kĩthembeo kĩla waakĩte mbee wa valanda wa Ĩkalũ. 13#Kuma 23.14-17; 34.22-23; Mot 28.9-15; 28.16—29.39; Kũt 16.16 Eekie ũu kwĩanana na motw'ĩo onthe ala Mwose weeaĩte maatĩĩawe mavindanĩ ma kũthemba nthembo ila syathembawa mĩthenyanĩ ya Savato, Mboka ya Kũtisa kwa Mwei, na mavindanĩ ma ila mboka itatũ sya kĩla mwaka: Mboka ya Mũkate ũte Mbota, Mboka ya Ngetha, na Mboka ya Tũsũmba twa Matũ. 14Solomoni aatĩĩe motw'ĩo ma Ndeviti ĩthe wake, nĩwanyuvie ikundi sya athembi sya kũtethasya wĩa woo wa kĩla mũthenya, na nĩwanyuvie ikundi sya Alivai sya kũtethya wĩa woo wa kũtaĩa, na kũtetheesya athembi mawĩanĩ moo ala mathĩĩwe kũtethya kĩla mũthenya. O ta ũu nĩwanyuvie ikundi sya asikalĩ ma kũsunga mĩvĩa ya Ĩkalũ, nũndũ ũu nĩw'o Ndeviti mũndũ wa Ngai weeaĩte. 15Nĩmaatĩĩie motw'ĩo onthe ala Mũsumbĩ Ndeviti weeaĩie athembi na Alivai ĩũlũ wa ũndũ o na wĩva, na ĩũlũ wa kũla kwaiawa ũthwii.
16Kwoou wĩa w'onthe wa Solomoni nĩwaminie kũtethw'a, kuma mũthenyanĩ ũla mũsingi wa Ĩkalũ ya Mwĩai Ngai wambĩĩe kwakwa, nginya yĩla Ĩkalũ yĩu yathelile vyũ.
17Nĩvo ĩndĩ Solomoni waendie Esioni-ngeveli na Elathi, ndũa ilĩ sya nthĩ ya Etomu ila syĩ ũtee wa Ũkanga Mũtune. 18Mũsumbĩ Ilamu nĩwatũmanie meli itwaĩwe Solomoni iũngamĩwe nĩ athũkũmi make mwene, ala maĩ na ũmanyi wa kũthũkũma na meli ũkanganĩ. Athũkũmi asu nĩmaendie kyalo mesĩlĩte ũkanganĩ me na athũkũmi ma Solomoni nginya mavika Ovili, na masyoka makuĩte thaavu wa kĩlo mbee wa ngili ĩkũmi na itano maetee Solomoni.
Currently Selected:
2Mav 8: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
