2Mav 5

1 # 2Sam 8.11; 1Mav 18.11 Mũsumbĩ Solomoni amina wĩa w'onthe wa kwaka Ĩkalũ na kũseũvya syĩndũ syayo, nĩwalikilye Ĩkalũnĩ yĩu syĩndũ syonthe ila ĩthe wake Ndeviti wavathĩĩte Mwĩai Ngai, nasyo nĩ Silĩva, thaavu, na mĩio ĩla ĩngĩ. Nĩwaiie syĩndũ isu nyũmbanĩ sya Ĩkalũ sya kwia syĩndũ.

Solomoni Aiete Ĩsandũkũ ya Ũtianĩo Ĩkalũnĩ

(1Asu 8.1-9)

2 # 2Sam 6.12-15; 1Mav 15.25-28 Nĩvo ĩndĩ Mũsumbĩ Solomoni weetie atongoi onthe ma mbaĩ na mĩsyĩ ya Ĩsilaeli mombanĩe Yelũsalemu, nĩ kana makakue Ĩsandũkũ ya Ũtianĩo ya Mwĩai Ngai kuma Ndũanĩ ya Ndeviti, ĩla nĩ Saioni, mayĩete Ĩkalũnĩ. 3Andũ asu onthe nĩmoombanĩie kwa Mũsumbĩ Solomoni ĩvindanĩ ya Mboka ya Tũsũmba twa Matũ, mweinĩ wa mũonza. 4Atongoi asu onthe mamina kũmbana, Alivai nĩmakuie Ĩsandũkũ ya Ũtianĩo, 5na mayĩtwaa Ĩkalũnĩ. O ta ũu athembi na Alivai nĩmakuie Ĩeema ĩtheu ya kũkomanĩa na Mwĩai Ngai, vamwe na syĩndũ syayo syonthe maitwaa Ĩkalũnĩ. 6Mũsumbĩ Solomoni, vamwe na andũ onthe ma Ĩsilaeli nĩmoombanĩie vau mbee wa Ĩsandũkũ ya Ũtianĩo, na mathemba malondu na ng'ombe mbingĩ itatalĩka. 7Nĩvo ĩndĩ athembi maetie Ĩsandũkũ ya Ũtianĩo ya Mwĩai Ngai na mayia vala yaaĩlĩte kwiwa, Vandũnĩ vala Vatheu Mũno Ĩkalũnĩ, ungu wa nthwau sya ila syũmbe ilĩ syĩ nthwau syĩtawa akelũvi. 8Syũmbe isu ilĩ syatambũũkĩtye nthwau ĩũlũ wa vala vandũ va kwia Ĩsandũkũ ya Ũtianĩo, nginya ikayĩvw'ĩka vamwe na mĩtĩ ĩla yayĩkuaa. 9Mĩtĩ ĩsu ya kũkua Ĩsandũkũ ya Ũtianĩo yaĩ mĩasa mũno, ũkethĩa mĩthya ya yo nĩtonya kwoneka nĩ mũndũ aũngamĩte Vandũnĩ vala Vatheu nza wa Vandũ vala Vatheu Mũno. Mĩthya ya mĩtĩ ĩsu ndyaĩ ĩtonya kwoneka nĩ mũndũ aũngamĩte nza wa Vandũ vala Vatheu. Mĩtĩ ĩsu yĩ o vo kũvika o na ũmũnthĩ. 10#Kũt 10.5 Vayaĩ kĩndũ nthĩnĩ wa Ĩsandũkũ yĩu, ate o ala masengea#5.10 masengea: Sisya Kuma 24.12 elĩ ma mavia Mwose weekĩie vo e Kĩĩmanĩ kya Sinaĩ, vala Mwĩai Ngai waseũvĩisye ũtianĩo na andũ ma Ĩsilaeli ĩtina wa mauma nthĩ ya Misili.

Ũtheu Mũtisu wa Mwĩai Ngai

11Nĩvo ĩndĩ athembi maumaalile kuma Vandũnĩ vala Vatheu. Athembi onthe ala maĩ vau, matekũatĩĩa ikundi syoo, maĩ maneethesya. 12Alivai onthe ala maĩ aini, namo nĩ: Asavu, Emani, Yetuthuni na ana moo, na ana-a-ĩthe moo, nĩmaũngamie ngalĩko ya wumĩlonĩ wa syũa ya kĩthembeo, mekĩĩte ngũa itumĩtwe na ndii nzeo ndũmu. Nĩmakũnaa tũmasaya, ngitaa nene na ngitaa nini. Mainaa me vamwe na athembi ĩana yĩmwe na mĩongo ĩlĩ ala mavuvaa masoo. 13#1Mav 16.34; 2Mav 7.3; Esa 3.11; Sav 100.5; 106.1; 107.1; 118.1; 136.1; Yel 33.11 #Kuma 40.34-35 Avuvi ma masoo na aini mainie na mawasya maendanĩtye ĩmwe ta mekwina na wasya ũmwe. Mainaa maitaĩa na kũtũngĩa Mwĩai Ngai mũvea, mavuvĩte masoo, na kũkũna tũmasaya na mĩio ĩngĩ. Nĩmookĩlilye mawasya moo mataĩa Mwĩai Ngai mayasya atĩĩ,

“Taĩai Mwĩai Ngai nũndũ nĩ mũseo,

na wendo wake ũtaolekaa nĩwĩkalaa tene na tene.”

Nĩvo ĩndĩ Ĩkalũ ya Mwĩai Ngai yausũie mũumbĩ 14weethĩa athembi maitonya kũtethya wĩa woo nũndũ wa mũumbĩ ũsu, nĩkwĩthĩwa ũtheu mũtisu wa Mwĩai Ngai nĩwausũĩte Ĩkalũnĩ.

Currently Selected:

2Mav 5: KAMBA

Highlight

Copy

Compare