2Mav 4
4
Mĩio ya Ĩkalũ
(1Asu 7.23-51)
1 #
Kuma 27.1-2
Mũsumbĩ Solomoni nĩwaseũvisye kĩthembeo kya mbulonzi kyaĩ na ũasa wa mita kenda, ũthanthau wa mita kenda, na ũtũlu wa mita inya na nyusu. 2Ĩtina wa ũu nĩwaseũvisye ĩtangi ya kĩthyũlũlũ ya mbulonzi, yĩna ũthanthau wa mita inya na sendimita mĩongo ĩna, kuma ngalĩko ĩmwe kwĩsĩla katĩ nginya ngalĩko ĩla ĩngĩ, ũliku wa mita ilĩ na sendimita mĩongo ĩlĩ, na ũasa wayo kũyĩthyũlũlũka waĩ mita ĩkũmi na itatũ na sendimita mĩongo ĩlĩ. 3Ĩtheo wa ũtiivo w'onthe wa ĩtangi yĩu kũyĩthyũlũlũka, vaĩ mĩthĩa ĩlĩ ya mawanake ma mavisa ma nzaũ, mũthĩa ũmwe wĩ ĩtheo wa mũthĩa ũla ũngĩ ila syaseũvĩtw'e ikwatanĩte na ĩtangi yĩu. 4Ĩtangi yĩu yailĩĩlĩtwe mĩongonĩ ya nzaũ ĩkũmi na ilĩ sya mbulonzi; nzaũ itatũ isyaĩtye ngalĩkonĩ ya ĩũlũ, itatũ isyaĩtye ngalĩko ya ũthũĩlonĩ wa syũa, itatũ isyaĩtye ngalĩko ya ĩtheo, na itatũ isyaĩtye ngalĩko ya wumĩlonĩ wa syũa. Itimba sya nzaũ isu syonthe syeelekele ngalĩko ya nthĩnĩ. 5Kĩemo kya ĩtangi yĩu kyaĩ sendimita mũonza na nyusu. Ũtiivo wayo wailyĩ ta ũtiivo wa kĩkombe, wĩkumbĩte nza ta ĩlaa ya lili. Ĩtangi yĩu yaĩ yĩtonya kũsũw'a nĩ kĩw'ũ kya lita vakuvĩ ngili mĩongo thanthatũ. 6#Kuma 30.17-21 Ĩtina wa ũu nĩwaseũvisye tũlaĩ ĩkũmi, na aia tũtano ngalĩko ya ĩtheo, na tũtano ngalĩko ya ĩũlũ ya Ĩkalũ. Tũlaĩ tũu twaĩ twa kũthambĩsya syĩndũ ila syatũmĩawa ĩvindanĩ ya nthembo ya kũvĩvw'a. Kĩw'ũ kĩla kyeethĩawa ĩtanginĩ yĩla ĩnene kyaĩ kya athembi kya kũthamba.
7 #
Kuma 25.31-40
Solomoni nĩwaseũvisye syĩndũ ĩkũmi sya thaavu sya kwilĩĩla taa, syĩndũ isu aiseũvisye kwĩanana na ũndũ syathĩĩwe kũseũvw'a. Aiee syĩndũ isu Ĩkalũnĩ; itano ngalĩko ya ĩtheo, na itano ngalĩko ya ĩũlũ. 8#Kuma 25.23-30 O ta ũu nĩwaseũvisye mesa ĩkũmi, na aia itano ngalĩko ya ĩtheo, na itano ngalĩko ya ĩũlũ ya Ĩkalũ. Ĩtina wa ũu nĩwaseũvisye mbakũli ĩana yĩmwe sya thaavu. 9Solomoni nĩwaseũvisye kĩwanza kya nthĩnĩ kwondũ wa athembi, na kĩwanza kĩngĩ kĩnene kya nza, na aseũvya mĩomo katĩkatĩ wa iwanza isu na amyũmbĩĩa mbulonzi. 10Nĩwaiie yĩla ĩtangi konanĩ ya Ĩkalũ ĩla yĩ ngalĩko ya wumĩlonĩ wa syũa kwelekela ngalĩko ya ĩtheo.
11O ta ũu Ulamu nĩwaseũvisye mbisũ, mĩko, na mbakũli. Kwoou Ulamu nĩwaminie wĩa ũla weeaĩwe nĩ Mũsumbĩ Solomoni atethye kwondũ wa Ĩkalũ ya Mwĩai Ngai. Ii nĩsyo syĩndũ ila Ulamu waseũvisye:
12Ituĩ ilĩ; ngovia ilĩ iilyĩ ta mbakũli, ila syeekĩĩtwe mĩthyanĩ ya ituĩ isu, nyololo ivĩlanganĩtw'e sya kwanakavya kĩla ngovia,
13makũngũmanga maana ana ma mbulonzi, mavangĩtwe mĩthĩa ĩlĩ ya makũngũmanga ĩana yĩmwe kĩla mũthĩa, kĩla ngovianĩ,
14makasya ĩkũmi#4.14 makasya ĩkũmi: Sisya 1Asu 7.43: Maandĩko ma Ngai kĩthyomonĩ kya Kĩevelania maiwetete ũtalo ũũ, ĩndĩ maĩtye nĩwaseũvisye makasya. vamwe na tũlaĩ twamo ĩkũmi,
15ĩtangi na nzaũ ĩkũmi na ilĩ sya kũyĩtw'ĩĩka,
16mbisũ, mĩko, ũma sya kũtonya nyama na syĩndũ syonthe ila iendanasya nasyo.
Syĩndũ isu syonthe ila Ulamu-avi waseũvĩisye Mũsumbĩ Solomoni kwondũ wa Ĩkalũ ya Mwĩai Ngai syaseũvĩtw'e na kyũma kya mbulonzi kĩkute. 17Mũsumbĩ Solomoni nĩweeaĩte syĩndũ isu ikaseũvĩw'e vandũ vaĩ yũmba ya kũseũvya syĩndũ katĩkatĩ wa Sukothi na Nzalethani, Ũiĩnĩ wa Yolotani. 18Solomoni nĩwaseũvisye syĩndũ mbingĩ mũno, weethĩa vai mũndũ waamanya ũito wa mbulonzi yonthe ĩla yatũmĩiwe kũseũvya syĩndũ isu.
19O ta ũu Mũsumbĩ Solomoni nĩwaseũvisye syĩndũ sya thaavu sya kwĩkĩa Ĩkalũnĩ ya Mwĩai Ngai. Syĩndũ isu syaĩ: Kĩthembeo na mesa sya kwilĩĩla mĩkate ĩthembewe Ngai, 20syĩndũ sya kwilĩĩla taa, na taa iseũvĩtw'e na thaavu mũthei, ila syakanaa syĩ mbee wa Vandũ vala Vatheu Mũno, kwĩanana na ũndũ syathĩĩwe; 21mawanake ma malaa, taa, syĩndũ sya kũkwata makaa; 22syĩndũ sya kũvosya taa, mbakũli sya kũminzangĩsya, tũlaĩ, syĩndũ sya kũtoeesya ũvani, na syĩndũ sya kwoka mwaki. Syĩndũ isu syonthe syaseũvĩtw'e na thaavu mũthei. Mĩomo ya nza ya Ĩkalũ na mĩomo ya Vandũ vala Vatheu Mũno yoombĩĩwe thaavu.
Currently Selected:
2Mav 4: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
