2Mav 6
6
Solomoni Aineena na Andũ ma Ĩsilaeli
(1Asu 8.12-21)
1Nĩvo ĩndĩ Solomoni wavoyie asya atĩĩ,
“We Mwĩai Ngai waĩtye kana ũkekalaa kĩvindunĩ kĩkamu.
2Nĩngwakĩĩte Ĩkalũ yĩ ndaĩa,
vandũ vaku va kwĩkala tene na tene.”
3Andũ ma Ĩsilaeli onthe maũngamĩte vau, Mũsumbĩ Solomoni nĩweethyũũie amasisya na amaathima. 4#2Sam 7.1-13; 1Mav 17.1-12 Nĩwaneenie asya atĩĩ, “Nĩakathwe Mwĩai Ngai, Ngai wa Ĩsilaeli, ũla ũtonyinĩ wake wĩanĩĩsye maũndũ ala wathie Ndeviti ĩthe wakwa ayasya, 5‘Kuma yĩla naumisye andũ makwa nthĩ ya Misili, ndyaanyuva ndũa o na yĩva mbaĩnĩ sya Ĩsilaeli nĩ kana nakĩwe Ĩkalũ vala ngathaithĩawa, o na ndyaanyuva mũndũ o na wĩva atw'ĩke mũtongoi wa andũ makwa Ĩsilaeli. 6Ĩndĩ yu nĩnĩnyuvĩte Yelũsalemu vethĩwe vandũ vala ngathaithĩawa, na nĩnĩnyuvĩte Ndeviti asumbĩke andũ makwa Ĩsilaeli.’ ”
7Solomoni nĩwaendeeie kũneena asya atĩĩ, “Ndeviti ĩthe wakwa nĩwavangĩte kwaka Ĩkalũ nĩ kana Mwĩai Ngai, Ngai wa Ĩsilaeli athaithĩawe vo. 8Ĩndĩ Mwĩai Ngai nĩwaneenie na Ndeviti ĩthe wakwa amwĩa, ‘Nĩ ũndũ ũseo kwĩthĩwa ũvangĩte ngoonĩ yaku kũmbakĩa Ĩkalũ nĩ kana nĩthaithĩawe vo. 9Ĩndĩ we ndwĩmbakĩa Ĩkalũ yĩu; mwana waku ũla we wĩsyaa, nĩwe ũkambakĩa Ĩkalũ yĩu.’
10“Yu Mwĩai Ngai nũminĩte kwĩanĩsya ũndũ wathanie; nĩnĩtw'ĩkĩte mũsumbĩ wa Ĩsilaeli ĩtina wa ĩthe wakwa, na nĩnakĩte Ĩkalũ nĩ kana Mwĩai Ngai, Ngai wa Ĩsilaeli athaithĩawe vo. 11Nthĩnĩ wa Ĩkalũ yĩĩ nĩniĩte yĩla Ĩsandũkũ ya Ũtianĩo, yĩla nthĩnĩ wayo vekĩĩtwe ala masengea ma mavia ma ũtianĩo, ũla Mwĩai Ngai waseũvisye na andũ ma Ĩsilaeli.”
Mboya ya Solomoni
(1Asu 8.22-53)
12Nĩvo ĩndĩ Solomoni e mbee wa andũ onthe ma Ĩsilaeli, waendie na aũngama mbee wa kĩthembeo kya Mwĩai Ngai, na ookĩlya moko make ĩũlũ. 13(Solomoni aĩ anaseũvya kĩtaa kya kyũma kĩtawa mbulonzi na akakia kĩla kĩwanzanĩ kya nza katĩ. Kĩtaa kĩu kyaĩ na ũasa wĩanene na ũthanthau wakyo; mita ilĩ na sendimita mĩongo ĩlĩ, na kyaĩ na ũtũlu wa mita ĩmwe na sendimita mĩongo ĩtatũ. Nĩwalĩsile kĩtaanĩ kĩu ĩũlũ, na atulya ndu e mbee wa wũmbano w'onthe wa andũ ma Ĩsilaeli, na ookĩlya moko make melekele ĩtunĩ.) 14Nĩwavoyie asya atĩĩ, “Ame Mwĩai Ngai, Ngai wa Ĩsilaeli, vai Ngai ũngĩ taku ĩtunĩ kana kũũ nthĩ. Nĩwĩanĩasya ũtianĩo waku na andũ maku, na nũmendaa na wendo waku ũtaolekaa, yĩla mekala meyumĩtye kũkwĩw'a na ngoo syoo syonthe. 15Nĩwĩanĩĩtye kĩla wathie mũthũkũmi waku Ndeviti ĩthe wakwa; nĩwaneenie wathana, na nĩwĩanĩĩtye na ũtonyi waku o tondũ kũilyĩ ũmũnthĩ. 16#1Asu 2.4 Yu ĩndĩ, ame Mwĩai Ngai, Ngai wa Ĩsilaeli, nĩngũũvoya wĩanĩsye ũla ũndũ ũngĩ wathie mũthũkũmi waku Ndeviti ĩthe wakwa. Nĩwamwĩie kana kĩla ĩvinda vakeethĩawa ũmwe wa nzyawa syake asumbĩkĩte Ĩsilaeli, ethĩwa makakwĩw'aa na kĩthito o tondũ Ndeviti weekaa. 17Kwoou yu, ame Mwĩai Ngai, Ngai wa Ĩsilaeli, eka maũndũ onthe ala wathie mũthũkũmi waku Ndeviti meanĩe.
18 #
2Mav 2.6
“Ĩndĩ nĩkũlya, we Ngai nũtonya kwĩkalany'a na andũ ĩũlũ wa nthĩ? Ethĩwa ndũtonya kwĩanĩa matunĩ o na ala me ĩũlũ mũno, ũkatonya ata kwĩanĩa Ĩkalũnĩ yĩĩ nĩkwakĩe? 19O vamwe na ũu, ame Mwĩai Ngai, Ngai wakwa, ĩthũkĩĩsye mboya yakwa nyie mũthũkũmi waku, yĩla ngũkwĩsũva ũmbĩw'ĩe tei. Ĩw'a kĩĩo kyakwa na mboya ĩla nyie mũthũkũmi waku ngũũvoya. 20#Kũt 12.11 Sũvĩaa Ĩkalũ yĩĩ ũtukũ na mũthenya. Vandũ vaa vala waisye kana ũkathaithĩawa vo. Mbĩw'ae yĩla nyie mũthũkũmi waku ngũvoya nelekelye ũthyũ wakwa Ĩkalũnĩ yĩĩ. 21Ĩw'aa mboya syakwa na sya andũ maku ma Ĩsilaeli, andũ maku yĩla meelekelya mothyũ moo Ĩkalũnĩ yĩĩ na kũvoya. Ĩthukĩĩasye wĩ mũsyĩnĩ kwaku ĩtunĩ, na weew'a ũitũekea.
22“Mũndũ avĩtĩsya mũtũi wake, na aitw'ĩka no nginya evĩte, na ayũka na kwĩvĩta e mbee wa kĩthembeo kyaku kĩla kĩ Ĩkalũnĩ yĩĩ, 23ame Mwĩai Ngai, ĩthukĩĩasye wĩ ĩtunĩ, na ũisilanasya athũkũmi maku. Ũla wĩ na ĩvĩtyo mũkanasye kwĩanana na ĩvĩtyo yake, na ũla ũte na ĩvĩtyo ũiekana nake, na ũimũnenga mũthĩnzĩo kwĩanana na ũĩkĩĩku wake.
24“Ethĩwa andũ maku ma Ĩsilaeli nĩmasindwa nĩ amaitha moo nũndũ nĩmakũvĩtĩsye, makũsyokea na kwĩkaĩla ĩsyĩtwa yaku, na maivoya na kũkwĩsũva me Ĩkalũ yĩĩ, 25ĩthukĩĩasye wĩ ĩtunĩ, ekea naĩ ya andũ maku ma Ĩsilaeli, na ũimatũnga nthĩ ĩla wanengie aaũmae moo.
26“Yĩla walea kusya mbua nũndũ andũ maku nĩmakũvĩtĩsye, ethĩwa makavoya melekelye mothyũ moo Ĩkalũnĩ yĩĩ, na maikũsĩĩa ĩsyĩtwa yaku, na kũeka kwĩka naĩ nĩkwĩthĩwa nĩwamakany'a, 27ĩthukĩĩasye wĩ ĩtunĩ na ũiekea naĩ ya athũkũmi maku, andũ ma Ĩsilaeli. Mamanyĩasye kwĩka maũndũ ala maĩlĩte, na ũyusya mbua ĩũlũ wa nthĩ ĩla wanengie andũ maku yĩthĩwe ng'ũndũ yoo.
28“Yĩla kwooka yũa, ũwau mũthũku, kĩseve kĩvĩvasya, mbuka, ngie, kana itooli nthĩ ya Ĩsilaeli, kana yĩla amaitha mamelingĩla mamavithũkĩe me nthĩnĩ wa ĩmwe ya ndũa syoo, makwatwa nĩ ũndũ mũthũku kana ũwau o na wĩva, 29na yĩla mũndũ o na wĩva wa andũ maku Ĩsilaeli wavoya kana eesũvana, na kĩla ũmwe ayĩthĩwa esĩ thĩna wake, na aivoya atambũũkĩtye moko make melekele Ĩkalũ yĩĩ, 30ĩthukĩĩasye wĩ mũsyĩnĩ kwaku ĩtunĩ. Ekea na ũyĩkana na kĩla mũndũ kwĩanana na meko make onthe, nũndũ noue wĩ weka wĩsĩ mosũanĩo ala me ngoonĩ sya andũ. 31Ĩkana na andũ maku ũu, nĩ kana maũkĩae na kũkwĩw'aa mavinda onthe, yĩla meĩkalaa nthĩ ĩla wanengie aaũmae maitũ.
32“O ta ũu ethĩwa mũndũ wa nthĩ ĩngĩ, ũla ũte ũmwe wa andũ maku ma Ĩsilaeli, nĩwooka kuma nthĩ ya kũasa nĩ kana akũthaithe, nũndũ nĩwĩw'ĩte nguma yaku, vinya waku na ũtonyi waku, na aivoya elekelye ũthyũ wake Ĩkalũnĩ yĩĩ, 33ĩthukĩĩasye mboya yake wĩ mũsyĩnĩ kwaku ĩtunĩ. Ĩanĩsya maũndũ onthe ala mũndũ ũsu wa nthĩ ĩngĩ wakũvoya, nĩ kana andũ onthe ĩũlũ wa nthĩ makũmanye na kũkwĩw'a, o tondũ andũ maku ma Ĩsilaeli mekaa. Nĩvo ĩndĩ memanya kana Ĩkalũ yĩĩ yĩla nakĩte nĩvo waĩlĩte kũthaithĩawa.
34“Yĩla weeaĩa andũ maku mathi kaũnĩ makokite na amaitha moo, na me vala maĩ maikũvoya melekelye mothyũ moo ndũanĩ ĩla we ũnyuvĩte, na Ĩkalũnĩ yĩla nakĩte ũthaithĩawe vo, 35ĩthukĩĩasye mboya na kwĩsũvana kwoo wĩ mũsyĩnĩ kwaku ĩtunĩ, na ũimatonyethya kũsinda amaitha moo.
36“Yĩla andũ maku maũvĩtĩsya (Nũndũ vai mũndũ ũtavĩtasya), naku ũimathatĩa na kũeka masindwe nĩ amaitha moo, na kũtuma amaitha moo mamakwata na kũmatwaa me ove nthĩ yĩ vaasa kana yĩ vakuvĩ; 37me nthĩ ĩsu matwaĩtwe me ove, maalyũla ngoo syoo na kwĩlila na kũkwĩsũva mayasya, ‘Nĩtũvĩtĩtye, nĩtwĩkĩte naĩ, nĩtwĩkĩte maũndũ mathũku;’ 38ethĩwa makeelila na ngoo na thayũ woo w'onthe, me nthĩ ĩla matwaiwe me ove, na maikũvoya melekelye mothyũ moo nthĩ yoo, ĩla wanengie aaũmae moo, ndũanĩ ĩla we wanyuvie na Ĩkalũnĩ yĩla ngwakĩĩte ũthaithĩawe vo; 39ĩthukĩĩasye mboya na kwĩsũvana kwoo wĩ mũsyĩnĩ kwaku ĩtunĩ, na ũimew'ĩa tei. Ekea andũ maku ala makũvĩtĩsye.
40“Yu, ame Ngai wakwa, tũsisye na ũyĩw'a mboya ila syĩvoyeawa vandũnĩ vaa. 41#Sav 132.8-10 Yu ũkĩla, ame Mwĩai Ngai, na ũyũka vandũnĩ vaku va kũthũmũa, vala tũkũseũvĩsye we vamwe na Ĩsandũkũ yĩla yonanasya vinya waku. Ame Mwĩai Ngai, eka athembi maku methĩwe na ũtangĩĩo, na atheu maku nĩmatanĩe ũseo waku. 42Ame Mwĩai Ngai, ndũkamũlee mwĩtĩkĩw'a mauta waku. Lilikana wendo ũtaolekaa ũla wamwendete mũthũkũmi waku Ndeviti naw'o.”
Currently Selected:
2Mav 6: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
