2Mav 24
24
Mũsumbĩ Yoasi Aiseũvya kũla Ĩkalũ Yaanangĩkĩte
(2Asu 12.1-16)
1Yoasi atw'ĩkie mũsumbĩ wa Yuta e na ũkũũ wa myaka mũonza. Asumbĩkie vandũ va myaka mĩongo ĩna e Yelũsalemu. Inyia wake eetawa Nzivia kuma ndũanĩ ya Mbeeli-sieva. 2Yoasi nĩweekaa maũndũ ala mamwendeeasya Mwĩai Ngai ĩvindanĩ yonthe yĩla mũthembi Yeoiata waĩ thayũ. 3Yeoiata nĩwamũtwaĩie aka elĩ, namo masyaĩa Yoasi syana sya eĩtu na sya aũme.
4Ĩtina wa ĩvinda yĩana ũndũ mũna, Yoasi nĩwavangie kũseũvya Ĩkalũ kũla yaĩ yanangĩku. 5Nĩwoombanisye athembi na Alivai na amea atĩĩ, “Endai ndũanĩ sya Yuta na mũyũmbany'a mbesa kuma andũnĩ ma Ĩsilaeli onthe, ila syumaw'a kĩla mwaka kwondũ wa kũseũvya Ĩkalũ kũla kwanangĩku. Kalaatai kwĩka ũu.” Ĩndĩ Alivai nĩmaleile kwĩka ũu na mĩtũkĩ. 6#Kuma 30.11-16 Kwoou mũsumbĩ nĩweetie Yeoiata mũtongoi woo na amũkũlya atĩĩ, “Ũleete kũkũlya Alivai maete kuma Yuta na Yelũsalemu koti ũla Mwose mũthũkũmi wa Mwĩai Ngai waisye wumaw'e nĩ andũ ma Ĩsilaeli onthe kwondũ wa Ĩeema ĩtheu ya kũkomanĩa na Mwĩai Ngai nĩkĩ?”
7Aatĩĩi ma Athalia ũla waĩ mũndũ mũka mũthũku nĩmatũlĩte na makalika Ĩkalũnĩ nthĩnĩ, na makatũmĩa syĩndũ syayo mbingĩ ntheu kũthaitha ngai sya Mbaali.
8Mũsumbĩ nĩweeaĩie Alivai amea maseũvye ĩsandũkũ ya kwĩkĩa mĩvothi, na maiyia mũomonĩ wa Ĩkalũ. 9Nĩvo ĩndĩ ũtũmani wanenganiwe andũnĩ onthe ma Yuta na Yelũsalemu, kana nĩmaĩlĩte kũetee Mwĩai Ngai koti ũla Mwose mũthũkũmi wa Mwĩai Ngai weeaĩie andũ ma Ĩsilaeli yĩla maĩ weũnĩ maumasye. 10Ũndũ ũsu nĩwendeeisye andũ onthe o vamwe na atongoi moo, na maete koti woo nginya mausũsya yĩla ĩsandũkũ. 11Kĩla ĩvinda Alivai masisya na kwĩthĩa ĩsandũkũ yĩu yusĩe mbesa, nĩmayĩkuaa na kũyĩtwaa kwa mũandĩki wa mũsumbĩ, na mũndũ ũla watũmawa nĩ Mũthembi Mũnene, namo mayumya mbesa isu na kũyĩtũnga vala yaiawa. Meekie ũu vandũ va ĩvinda ya mĩthenya mingĩ, na moombany'a mbesa mbingĩ mũno.
12Mũsumbĩ e na Yeoiata nĩmanengie andũ ala matethasya wĩa wa kũseũvya kũla Ĩkalũ yanangĩku mbesa isu. Nĩmaandĩkie andũ mesĩ kwaka nyũmba maitũmĩa mavia, andũ ala maseũvasya syĩndũ sya mbwaũ na sya syũma, nĩ kana maseũvye Ĩkalũ kũla yaĩ yanangĩku. 13Andũ ala matethasya wĩa ũsu maĩ na kĩthito, na kwoou wĩa wa kũseũvya Ĩkalũ nĩwaendeeie na mbee. Nĩmatũngĩĩie Ĩkalũ yekala ũndũ yailyĩ mbeenĩ, na mayĩlũlũmĩĩlya. 14Mamina wĩa ũsu, nĩmaeteie mũsumbĩ na Yeoiata mbesa ila syatialile, na syatũmĩwa kũseũvya syĩndũ ila syeethĩawa Ĩkalũnĩ: Syĩndũ sya kũtũmĩwa vo na sya nthembo sya kũvĩvw'a, mbakũli na syĩndũ ingĩ iseũvĩtw'e na thaavu na silĩva. Ĩvindanĩ yonthe yĩla Yeoiata waĩ thayũ, andũ nĩmaendeeie kumĩsya nthembo sya kũvĩvwa Ĩkalũnĩ.
Maũndũ ala Mambĩlĩĩlw'e nĩ Yeoiata Maivĩndũwa
15Mũthembi Yeoiata nĩwekalile thayũ akũa mũno, na akw'a e na ũkũũ wa myaka ĩana na mĩongo ĩtatũ. 16Nĩwathikiwe ndũanĩ ya Ndeviti vala asumbĩ mathikawa, nũndũ wa wĩa ũla wathũkũmĩte Ĩsilaeli, Ngai na Ĩkalũnĩ yake.
17Yeoiata amina kũkw'a, atongoi ma Yuta nĩmaendie kũla kwĩ Mũsumbĩ Yoasi, mamwĩsũva na mamũnenga mawoni, nake eetĩkĩlana namo. 18Kwoou andũ nĩmaekie kũthaithĩa Ĩkalũnĩ ya Mwĩai Ngai, Ngai wa aaũmae moo, na mambĩĩa kũthaitha ngai sya mĩvw'anano na mũvw'anano wa ngai nga ĩla yĩtawa Asela. Ĩvĩtyo yoo nĩyatumie Mwĩai Ngai athatĩa Yuta na Yelũsalemu. 19Mwĩai Ngai nĩwatũmie athani mathi andũnĩ asu makamakany'e nĩ kana mamũsyokee, ĩndĩ andũ nĩmaleile kũmethukĩĩsya. 20#Mat 23.35; Lk 11.51 Veva wa Ngai nĩwalikile Nzekalia mwana wa mũthembi Yeoiata. Nzekalia nĩwaũngamie mbee wa andũ vandũnĩ vaĩ vatũlangu na amea atĩĩ, “Mwĩai Ngai emũkũlya mwĩtũla mĩao yake na kwĩyĩetee ũthũku nĩkĩ? Nũndũ nĩmũmũtiĩte, o nake nũmũtiĩte!” 21Ĩndĩ nĩmavangĩie Nzekalia mũvango mũthũku, na Mũsumbĩ Yoasi aumya mwĩao Nzekalia akimangĩwa na mavia kĩwanzanĩ kya Ĩkalũ akw'a. 22Mũsumbĩ Yoasi ndaalilikana ũndũ Yeoiata, ĩthe wa Nzekalia wamwĩkaa nesa, na kwoou Yoasi nĩwooaie Nzekalia. Aikw'a nĩwaneenie asya atĩĩ, “Mwĩai Ngai nĩone ũndũ ũũ na ayĩĩvanĩsya.”
Kĩkw'ũ kya Yoasi
23Mũminũkĩlyonĩ wa mwaka ũsu, asikalĩ ma kaũ ma Silia nĩmavithũkĩie Yuta na Yelũsalemu. Nĩmooaie atongoi onthe na matava syĩndũ mbingĩ mũno, maitwaĩa mũsumbĩ woo ũla waĩ Ndamasikũ. 24O na vala asikalĩ asu ma kaũ ma Silia mayaĩ aingĩ, Mwĩai Ngai nĩwatumie masinda asikalĩ aingĩ ma Yuta, nũndũ andũ asu nĩmamũtiĩte Mwĩai Ngai, Ngai wa aaũmae moo. Kwa nzĩa ĩsu, Mũsumbĩ Yoasi nĩwakaniw'e. 25Asikalĩ ma Silia matiie maũmĩsya Yoasi mũno, na yĩla maendie, elĩ ma anini ma Yoasi nĩmamũseũvĩisye mũvango mũthũku na mamũaĩa ũkomonĩ wake. Maĩvanĩasya nũndũ Yoasi nĩwe wooaie mwana wa mũthembi Yeoiata. Yoasi nĩwathikiwe Ndũanĩ ya Ndeviti, ĩndĩ mayaamũthika mbũanĩ sya kĩ-ũsumbĩ. 26Andũ ala mavangĩte mũvango ũsu wa kũmũaa maĩ Nzavati mwana wa mũndũ mũka wetawa Simeathi ũla waĩ Mũamimoni, na Yeosavatu mwana wa mũndũ mũka weetawa Similithi ũla waĩ Mũmoavi. 27Ũvoo wa ana ma Yoasi, ndeto sya wathani ila syathaniwe ĩũlũ wake, na ũndũ waseũvisye Ĩkalũ kũla yaĩ yanangĩku, ũandĩkĩtwe Ũelesyonĩ wa Ĩvuku ya Asumbĩ. Amasia mwana wake nĩwatw'ĩkie mũsumbĩ ĩtina wake.
Currently Selected:
2Mav 24: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
