2Mav 25
25
Amasia Mũsumbĩ wa Yuta
(2Asu 14.2-6)
1Amasia atw'ĩkie mũsumbĩ e na ũkũũ wa myaka mĩongo ĩlĩ na ĩtano. Asumbĩkie vandũ va myaka mĩongo ĩlĩ na kenda e Yelũsalemu. Inyia wake eetawa Yeoatini kuma Yelũsalemu. 2Mũsumbĩ Amasia nĩweekaa kwenda kwa Mwĩai Ngai, ĩndĩ ndeekaa ũu eyumĩtye na ngoo yake yonthe. 3Amina kwĩthĩwa na ũtonyi wa kĩ-ũsumbĩ oou, nĩwooaie anini make ala mooaie ĩthe wake. 4#Kũt 24.16 Ĩndĩ ndaaũaa syana syoo kwĩanana na ũndũ mĩao yaĩtye Ĩvukunĩ ya Mwose vala Mwĩai Ngai wĩaĩte akasya atĩĩ, “Asyai mayaĩlĩte kũawa nũndũ wa mavĩtyo mekĩtwe nĩ syana syoo, nasyo syana iyaĩlĩte kũawa nũndũ wa mavĩtyo mekĩtwe nĩ asyai masyo. Mũndũ aĩlĩte kũawa nũndũ wa naĩ ĩla we mwene wĩkĩte.”
Aetomu Mayũawa
(2Asu 14.7)
5Mũsumbĩ Amasia nĩwoombanisye aũme onthe ma mbaĩ ya Yuta na ya Mbengyameni matw'ĩke ikundi sya asikalĩ ma kaũ, kwĩanana na mĩsyĩ yoo. Nĩwanyuvie anene ma kũtongoesya asikalĩ ngili, na angĩ ma kũtongoesya asikalĩ ĩana. Oombanĩtye aũme onthe ala maĩ na ũkũũ wa myaka mĩongo ĩlĩ na mbee. Onthe maĩ ngili maana atatũ. Maĩ asikalĩ anyuve meyũmbanĩtye kũthi kaũnĩ me na ũmanyi wa kũtũmĩa matumo na ngao. 6O ta ũu Amasia nĩwakomboie asikalĩ ngũmbaũ ngili ĩana kuma Ĩsilaeli kwa kũĩva kĩlo ta ngili itatũ na maana ana sya silĩva. 7Ĩndĩ mwathani ũmwe nĩwaendie vala ve mũsumbĩ amwĩa atĩĩ, “Ame mũsumbĩ, ndũkaendany'e na asikalĩ aa ma Ĩsilaeli kaũnĩ, nũndũ Mwĩai Ngai nde vamwe na andũ ma Ĩsilaeli; nde vamwe na andũ aa ma Evalaimu. 8Nũtonya kwĩthĩwa ũisũanĩa kana andũ asu nĩmeũtuma wĩthĩwa wĩ na vinya mbeange kaũnĩ, ĩndĩ Ngai nĩwe ũtumaa mũndũ asinda kana akasindwa, na nũkũtuma amaitha maku makũsinda.”
9Amasia nĩwakũlilye mwathani ũsu atĩĩ, “Nĩĩkana ata na ila kĩlo ngili itatũ na maana ana sya silĩva ĩla nĩminĩte kũmakomboa nasyo?”
Mwathani ũsu nĩwasũngĩie amwĩa, “Mwĩai Ngai e na ũtonyi wa ũkũnenga kĩlo mbingĩ sya silĩva mbee wa isu!” 10Nĩvo ĩndĩ Amasia wataanĩisye na asikalĩ asu maumĩte Evalaimu, na aekana namo menũke. Asikalĩ asu nĩmenũkie mathatĩtw'e mũno nĩ andũ ma Yuta.
11Amasia nĩweethĩiwe na ũkũmbaũ na atongoesya asikalĩ make ma kaũ mathi Mwandanĩ wa Mũnyũ, vala wooaie andũ ngili ĩkũmi ma Seili. 12Asikalĩ ma Yuta o ta ũu nĩmakwatie andũ ngili ĩkũmi, mamatwaa ndũanĩ ya Sela vandũ ũvainĩ ĩũlũ, na mamekya mathi kũvalũka mavianĩ matilĩkanga ilungu.
13Ĩvindanĩ o yĩu, ala asikalĩ ma Ĩsilaeli, ala Amasia wavatie maiendany'a kaũnĩ nake, nĩmavithũkĩie ndũa sya Yuta kuma ndũanĩ ya Samalia nginya ndũanĩ ya Mbethi-oloni. Nĩmooaie andũ ngili itatũ, na matava syĩndũ mbingĩ mũno mathi nasyo.
14Yĩla mũsumbĩ Amasia wasyokie aumĩte kũaa Aetomu, asyokie akuĩte mĩvw'anano ya ngai syoo. Nĩwaiie mĩvw'anano ĩsu vandũ, ĩtw'ĩke ngai syake. Nĩwathaithie ngai isu na aivĩvĩsya nthembo ya ũvani. 15Ũndũ ũsu nĩwatumie Mwĩai Ngai athatw'a mũno nĩ Amasia na amũtũmĩa mwathani. Mwathani ũsu nĩwakũlilye Amasia atĩĩ, “Wĩtĩkĩlile kũthaitha ngai ngeni ila iteĩ itonya o na kũtangĩĩa andũ masyo kuma ũtonyinĩ waku nĩkĩ?”
16Mwathani ũsu aendee kũneena, Amasia nĩwamũkũlilye atĩĩ, “Ithyĩ tũneekũtw'ĩkĩthya mũtai wa mũsumbĩ? Eka kũneena, wĩenda wũawe nĩkĩ?”
Mwathani ũsu nĩwaekie kũneena ĩndĩ mbee wa ũu asya, “Nĩnĩsĩ kana Ngai nũvangĩte ũkũmina nũndũ nĩwĩkĩte maũndũ asu na nĩwalea ũtao wakwa.”
Ĩsilaeli Ĩisinda Yuta
(2Asu 14.8-20)
17Amasia mũsumbĩ wa Yuta nĩwakũlilye atai make ũtao na atũmana kũla kwĩ Yeoasi mũsumbĩ wa Ĩsilaeli, ũla waĩ mwana wa Yeoaasi na mwĩsũkũũe wa Yeũ amwĩĩte atĩĩ, “Ũka tũkomane tũkite.”#25.17 ũka tũkomane tũkite: Kĩthyomo kya Kĩevelania kyaĩtye nĩoke twonane ũthyũ kwa ũthyũ. 18Yeoasi nĩwatũmanie kũla kwĩ Amasia akewe atĩĩ, “Kĩkuthu kya mĩw'a kya Levanoni nĩkyatũmanie kũla kwĩ mũtĩ wa mũkũũ wa Levanoni kĩyasya, ‘Nenga mwana wakwa mwĩĩtu waku atwae.’ Ĩndĩ nyamũ ya kĩthekanĩ ya Levanoni yavĩtĩla vau ve kĩkũthu kĩu kya mĩw'a na yakĩkinyanga. 19Yu we Amasia wĩĩkathĩĩa nũndũ nũnasindie Aetomu ĩndĩ nyie nĩkũnenga ũtao wa ũkwĩa wĩkale mũsyĩ! Nĩkyaũ kĩũtuma ũmantha thĩna nĩ kana we wĩna andũ ma Yuta mũsindwe?”
20Amasia nĩwaleile kwĩthukĩĩsya, nũndũ waĩ mũvango wa Ngai nĩ kana asindwe nĩ amaitha make nĩkwĩthĩwa nĩwathaithie mĩvw'anano ya ngai sya Etomu. 21Kwoou Yeoasi mũsumbĩ wa Ĩsilaeli nĩwambatie amũvithũkĩa, na mambĩĩa kaũ me ndũanĩ ya Mbethi-semesi ĩla yĩ Yuta. 22Andũ ma Yuta nĩmasindiwe nĩ andũ ma Ĩsilaeli, na kĩla ũmwe woo asemba akĩĩte enũka. 23Yeoasi mũsumbĩ wa Ĩsilaeli nĩwakwatĩie Amasia mũsumbĩ wa Yuta ũla waĩ mwana wa Yoasi na mwĩsũkũũe wa Yeoaasi ndũanĩ ya Mbethi-semesi, na amũtwaa Yelũsalemu. Yeoasi nĩwaomboangie ũkũta wa ndũa ĩsu kuma Mũvĩanĩ wa Evalaimu kũvika Mũvĩanĩ wa Konanĩ. Aomboie ũkũta ũsu ũasa wa ta mita maana elĩ. 24Nĩwoosie thaavu na silĩva w'onthe ũla weethĩie, na syĩndũ syonthe ila syaĩ Ĩkalũnĩ ila syasungawa nĩ nzyawa sya Oveti-etomu, o vamwe na syĩndũ syonthe sya vata ila syaĩ nyũmbanĩ ya kĩ-ũsumbĩ. Nĩwakuie syĩndũ isu syonthe aitwaa Samalia. O ta ũu nĩwaendie na andũ onthe ala wakwatĩte asyoka namo Samalia.
Kĩkw'ũ Kya Amasia
25Ĩtina wa kĩkw'ũ kya Yeoasi mũsumbĩ wa Ĩsilaeli, ũla waĩ mwana wa Yeoaasi, Amasia mũsumbĩ wa Yuta ũla waĩ mwana wa Yoasi, ekalile thayũ vandũ va myaka ĩkũmi na ĩtano. 26Maũndũ ala angĩ onthe Amasia weekie yĩla wasumbĩkĩte kuma wa mbee nginya wa mũthya, maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta na Ĩsilaeli. 27Kuma yĩla Amasia wang'endeie Mwĩai Ngai, andũ nĩmamũseũvĩisye mũvango mũthũku ndũanĩ ya Yelũsalemu, na kwoou asemba akĩa athi ndũanĩ ya Lakisi, ĩndĩ amaitha make nĩmamũatĩĩie kw'o na mamũaa. 28Mwĩĩ wake nĩwakuiwe na mbalasi watũngwa Yelũsalemu, na athikwa Ndũanĩ ya Ndeviti vala asumbĩ mathikawa.
Currently Selected:
2Mav 25: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
