2Mav 23
23
Andũ Mailea Kũsumbĩkwa nĩ Athalia
(2Asu 11.4-16)
1Mwakanĩ wa mũonza wa kũsumbĩka kwa Athalia, mũthembi Yeoiata nĩweeyĩkĩie vinya, na aseũvya wĩw'ano na anene ma asikalĩ ĩana. Anene asu maĩ Asalia mwana wa Yeloamu, Ĩsumaeli mwana wa Yeoanani, Asalia mwana wa Oveti, Maaseia mwana wa Ataia, na Elisavati mwana wa Nzikili. 2Nĩmangangie ndũanĩ syonthe sya Yuta mombanĩtye Alivai na atongoi ma mĩsyĩ ya andũ ma Ĩsilaeli. Onthe nĩmoombanĩie Yelũsalemu.
3 #
2Sam 7.12
Andũ asu onthe nĩmoombanĩie Ĩkalũnĩ, na me vau maseũvya wĩw'ano na Yoasi mwana wa Mũsumbĩ. Yeoiata nĩwaneenie namo amea atĩĩ, “Ũũ nĩ mwana wa Mũsumbĩ! Yu nũkũtw'ĩka mũsumbĩ o tondũ Mwĩai Ngai wathanie ĩũlũ wa nzyawa sya Mũsumbĩ Ndeviti. 4Mwĩĩka ũũ: Nguthu ĩmwe katĩ wa nguthu syenyu itatũ inyw'ĩ athembi na Alivai, ala mũendaa kũthũkũma Ĩkalũnĩ mũthenyanĩ wa Savato ĩkasungaa mĩomo ya Ĩkalũ; 5nguthu ĩngĩ katĩ wa nguthu syenyu itatũ ĩsungae nyũmba ya kĩ-ũsumbĩ, na nguthu ĩla ĩngĩ katĩ wa nguthu syenyu itatũ ĩsungae yĩ Mũvĩanĩ wa Wambĩlĩĩlyo. Andũ ala angĩ onthe mombanĩe kĩwanzanĩ kya Ĩkalũ. 6Vai mũndũ o na ũmwe waĩlĩte kũlika Ĩkalũnĩ ya Mwĩai Ngai ate o athembi na Alivai ala meũthũkũma vo. Asu nĩmatonya kũlika nũndũ nĩ avathe. Andũ ala angĩ onthe no nginya maatĩĩe ũndũ Mwĩai Ngai wĩaĩte. 7Alivai nĩmathyũlũlũke Mũsumbĩ Yoasi mamũsũvĩe, kĩla mũndũ akwete mũio wake wa kaũ. Mũndũ ũngĩ o na wĩva ũla wĩlika Ĩkalũnĩ no nginya oawe. Ĩkalaai vakuvĩ na mũsumbĩ kĩla vandũ ũĩ ĩvinda yonthe.”
8Alivai na andũ onthe ma Yuta nĩmeekie ũndũ mũthembi Yeoiata wameaĩĩte. Nĩmookie vala ũĩ me na asikalĩ moo onthe: Asikalĩ ala maaĩlĩte kũthũmũĩa wĩa mũthenya wa Savato, na ala malikaa wĩanĩ mũthenyanĩ ũsu, nũndũ Yeoiata ndaamalekya menũke. 9Yeoiata nĩwanengie anene ma asikalĩ matumo na ngao ila nene na ila nini, ila syaĩ sya Mũsumbĩ Ndeviti na syaiĩtwe Ĩkalũnĩ. 10Nĩwavangie andũ asu onthe kuma ngalĩko ya ĩtheo kũvika ngalĩko ya ĩũlũ ya Ĩkalũ na kũthyũlũlũka kĩthembeo na Ĩkalũ. Kĩla ũmwe akwete mũio wake wa kaũ nĩ kana masũvĩe mũsumbĩ. 11Nĩvo ĩndĩ Yeoiata watongoeisye Yoasi mwana wa Mũsumbĩ maumaala, amwĩkĩa ngovia ya kĩ-ũsumbĩ, na amũnenga walany'o wa kũsumbĩka nthĩ wĩ mũandĩke, na atavanw'a kana nĩwe mũsumbĩ. Yeoiata na ana make nĩmamwĩtĩkĩisye mauta na maneena mayasya atĩĩ, “Mũsumbĩ nĩekale thayũ ĩvinda ĩasa!”
12Yĩla Athalia weewie andũ masembete na kũlonzany'a makathĩĩe mũsumbĩ, nĩwaendie Ĩkalũnĩ vala andũ moombanĩe. 13Athalia nĩwoonie mũsumbĩ aũngamĩte ũtee wa kĩtuĩ, ũlikĩlonĩ wa Ĩkalũ vala asumbĩ maũngamaa. Ala anene ma asikalĩ na andũ ala mavuvaa soo maĩ vakuvĩ na mũsumbĩ. Andũ ala angĩ onthe malonzanĩtye na ũtanu mavuvĩte masoo na makatongoew'a ũtanunĩ ũsu woo nĩ aini ma Ĩkalũnĩ o namo makũnĩte syĩndũ syoo sya mbathi. Athalia nĩwatembũangie ngũa syake nĩ woo na aneena na wasya mũnene asya atĩĩ, “Nĩmwaleana na ũsumbĩ wakwa! Nĩmwaleana na ũsumbĩ wakwa!” 14Yeoiata ndendaa Athalia oaĩwe Ĩkalũnĩ. Kwoou nĩweeaĩie anene ma asikalĩ ma kaũ amea atĩĩ, “Mumaalyei e katĩ wa mĩthĩa ya asikalĩ ma kũsunga, na mũyũaa mũndũ o na wĩva ũla ũkũtata kũmũvonokya.”
15Nĩmakwatie Athalia mamũtwaa nyũmbanĩ ya kĩ-ũsumbĩ, na mamũaĩa mũvĩanĩ ũla wĩtawa Mũvĩa wa Mbalasi.
Maũndũ Ala Yeoiata Weekie
(1Asu 11.17-20)
16Mũthembi Yeoiata nĩwaseũvisye ũtianĩo katĩ wake na andũ onthe, o vamwe na mũsumbĩ kana makeethĩawa me andũ ma Mwĩai Ngai. 17Nĩvo ĩndĩ andũ onthe maendie Ĩkalũnĩ ya ngai ĩla yĩtawa Mbaali na mayĩomboanga. Nĩmaanangie ithembeo na mĩvw'anano ya ngai ĩsu, na mooaĩa Matani mũthembi wayo vau mbee wa ithembeo isu. 18Yeoiata nĩwaiie asikalĩ ma kũsunga Ĩkalũ maũngamĩwe nĩ athembi kuma mbaĩnĩ ya Livai. Athembi asu nĩmo ala Ndeviti weeaĩĩte methĩwe maũngamĩe Ĩkalũ, maithembea Mwĩai Ngai nthembo sya kũvĩvw'a, o tondũ kũandĩkĩtwe mĩaonĩ ya Mwose, me na ũtanu na mainĩte o tondũ Ndeviti weeaĩte. 19O ta ũu Mũthembi Yeoiata nĩwaiie asikalĩ mĩvĩanĩ ya Ĩkalũ mamĩsungae nĩ kana wĩthĩe vai mũndũ ũte mũtheu ũtonya kũlika vo.
20Nĩwaendanisye e na ala anene ma asikalĩ, andũ me ndaĩa, atongoi ma andũ, na andũ ala angĩ onthe maumaasya mũsumbĩ kuma Ĩkalũnĩ athi kũlika nyũmbanĩ ya kĩ-ũsumbĩ. Malikile nyũmbanĩ ĩsu mesĩlĩte Mũvĩanĩ wa Ĩũlũ, na mekalĩlya Mũsumbĩ kĩvĩlanĩ kya kĩ-ũsumbĩ. 21Andũ onthe ma nthĩ ĩsu nĩmatanie. Ndũa yonthe nĩyakilĩtye nũndũ Athalia aĩ anooawa na ũvyũ.
Currently Selected:
2Mav 23: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
